KA MAL LEH ṬHIN

Nupui nei lo nafam chu, pavalai hming list-a chuan ve ngawt a rem chiah si lo va, kumin uai deuh tawh mah se, KṬP ah theihpalingkawhin ka inhmang ve hram hram a, leader thlengin u enin min en ṭhup asin le. Kel pachal upata upa na nâ nâ chu, eng emaw nikhuaah ka ding zing ut a. Pian tirh aṭang renga nausen hmelṭha tia an sawi ni ngai lo ta chu, tlangval puitling ka nih thlengin khaw khat, veng khat tlangval hmelṭha tia sawi hat hat ni mawlh hek lo le, tun thlenga rizai pawh sawihpui tûr nei rih lo pawh ka ni ta ve ang.

Suangtuahna chuan a ṭha leh fel ber berte chu ka hre ve ker kur bawk a, dinhmun leh hmelin zir ngang hek lo, pianpui felna leh nun ṭhat vang em em pawh ni si lovin, zar buaitu nei loh vang leh zan tin len luhna hriat loh vang zawkin kohhranahte ka in hmang ve lawp lawp a. In vawn him duh vang êm êm pawh ni lem lovin, tawn loh vang zawkin, pûk chhe hula hul hi a lo awm ve theih dawn khawp mai.

Khawchhak aṭanga khawthlang lama vawi tam ni a chhuah a, a her liam ve zel avangin kum pawh a lo tam ve zel a. Kan kawm tawk an naupang tial tial a, engkim mai deuh thaw tawnhriat kan nei a, râwn kan hlawh zing hlur a. Kan rawlthar ṭha leh azeng pawh ni lovin, kan mawng a zâng em em a. Khawtlang thil tih nikhuaah a thusa berah kan ṭang a. Nang hi chu i fel ṭhin teh e maw, tih kan hlawh rualin, engto zui erawh kan hlawh lo.

Thurâwn kan dawn zingah nupui nei rawh, tih a ni reng a. I fel a, kohhran mi i ni a, duhtu che an tam âwm em mai, ti siin, an fanu, an farnu tân erawh min iai leh si. Huiham, piang lo ngaiin kan rûm a, duhthusamin zan mu kan chhing zan tin, nileng zel mai zawng a nih hi.

Nipui a tawp leh ang a, furpui a her liam ang. Thlasikin kan piancham an rawn her chhuahpui leh dawn; awi awi, kum a tam leh dawn chiang. Ni khi chelh ding thei ni ngat ila, ka nupui neih hma chu eng vangin nge ka chelh din loh teh lul ang le. Mosia bân phartir leh tak a nia ka nâp ni.

KṬP, YMA hnatlân nikhuaah kan thurâwn nghakin ka lamah an mit a fû a; aw, ka va han pawimawh ṭhin tak em, kei tak hi chu! Bawng tar pawhin luang no an duh ang bawkin, mit han la ve deuhte dah lo'ng maw, tih beiseina de rê rê nen an rûn chhung ka han lawi lut ve rawi a. Chhungkaw pa berin, “E, a ve teh mial che chuan, lo leng rawh,” inti fel fahranin min lo chhawn a. Nanga min lo welcome teh chiam ka ngai lo ve, tia ben thluk tawp mai hi ka châk asin. Pa ber kâwm turin ka leng hlawl si lo. Huiham, khua hi a va han var lo tak em. Keini thingtlangah ngat hi chuan, kan han ṭhu deuh chauh a, YMA no lian khat thingpui sen hâng min lo pe a, ka tei thei der si lo va, in loh lah mawi bawk si lo; pum puar ṭeuhin kan zung kan zung mai a ni. Kal (kidney) lam talin a ṭhatpui em ta ve ang chu maw.

MLA/VC inthlan hnai deuh se, inti politician takin kan ṭan lam kan sawi vung êm êm a, result a lo lang a, eng ruai kan ni leh si lo. Thil hre lo nih kan duh lo va, hre ber nih tum rânin thu kan sawi a; hnung lama dâwt sawi hmang tak niin min sawi tih rêng kan hre si lo. Khumlaizâwlah val luck ber ang maiin, nupui ṭha tur kan suangtuah a, taima deuh ka neih chuan, an thinchhe duh an ti bawk si, kei lah nupui ngam viau tur niin ka inhre si lo va, nei lo phawt teh ang. Zaidam êm êm leh eng chawhmeh pawh hmehpuiin, anthûr hâng nen chauh pawha thlan tla buan chunga ei thei ka neih dawn chuan, tlema ṭhâm ṭhen, sawmkua pakua vel an ni duh an ti leh zel bawk si. Ka phû tawk nia ka hriatte’n min lo iai ve leh zel si a, ka mal leh ṭhin a nih hi.

- Zothansanga, Chhiahtlang Kawnveng, 9612333536