SESSION SPECIAL

Sum puk duh luat avanga Mizoram leibat zat leh state lian leh hausa Maharashtra leibat zat patla khata khai duh tlat, State debt-to-GDP sawi lang duh lo Finance enkawltu Chief Minister ZPM sorkarah kan nei ve lo hi kalphung thar a ni. Chu mai ni lovin kan budget a lan mawina atana kan Revenue Expenditure tihtlem tuma state matching share ngai ngei ngei tur ziak lang ngam lo sorkar kan nei ta lo leh, a nihna dik taka kan state sum dinhmun pharh ngam Chief Minister kan nei hi a lawmawm hle.

MNF sorkar laia health care leiba nuai 5,000 chuang rulhsak ngai hian an sorkar lai hian thil ṭha leh ropui tak tak an sawi ṭhin. Cheng nuai 3 sem tumin Rs. 25,000 an sem ang hian a tak ram hmuh tur a awm lo. ZPM thawh rahah thangṭhat lak an rawn tum a, ZPM a sorkar rei poh leh MNF hian a zar an zo ve dawn a lo ni. Chuvang chuan, ZPM sorkar zel se ti hliah hliah tur an ni.

MNF sorkar laia sorkar hnathawk hlawh thla thar ni 10 hnua pe thei chauh, sum dinhmun a chhiat avanga Treasury khar ngai lek leka awm, electricity bill nuai 2,000 chuang lo ba khawl, sorkar hnathawk pension benefit 900 chuang awrh chauh chinfelsak thei khan state university pahnih din te, school provincialisation leh adhoc grant-in-aid tur te, sorkar hnathawk lak belh chungchangah te an duh zah zah oppostion ṭhutna aṭanga an rawn aupui ve hian kha leh chen sorkarna an chelh lai khan eng nge an tih? Kan sum dinhmun ena financial emergency-ah Mizoram min hnuk lut lo chauhtute hian ZPM sorkar kum hnih awrhah hian hengte hi sawi ve ngam tur an ni em?

MNF sorkar liam taa ha doctor lem latu leh advertisement chhuah lova qualified loa za tel lo latute hian, thlanlung hnawih var ang maiin thil ṭha duh ber ang maiin an rawn au chhuahpui ve a. Mahse, mipuiin an nihna an hre chiang e.

Kuhva ro tawlhruk mit lo siaitu MNF sorkar a han tlak meuh chuan kuhva ro tawlhruk an rawn haw thar ta thut a. Hachhek Bialtu MLA Robert Romawia Ralte phei khan chuan opposition lama an awm takah chuan a ngaih pawimawh panga zingah a telh a nih kha. Mizo chhulchhuak tan chuan zah a tuar chak mah mah a ni. MNF sorkarah kuhva ro an tawlhruktir karah khan ruihhlo eng zat tak tawlh ru ang maw, tih hi Zoram mipuiah zawhna lian tak a ni.

MNF MLA-te hi House chhungah hian an ṭhu thatchhe riau a, a chang chuan pahnih chauh te an ṭhu ṭhin. An awm chhunin thu an basa-ngam a, an rinthu hi ring deuh deuhin an sawi a, an sawi zo a, mi dang thusawi ngaithla lovin an bo leh diak ṭhin. Tun term-a junior ber Dr R. Lalthangliana ding hian vawi sarih thlan tlin tawh a nih thu hi inti senior zetin a sawi chhuak chamchi bawk.

- Dr. Mamawitea