Kan hruaitu lu pahnih CM leh HM te thusawi thlamuanthlak

Ni 9th February 2026: Sairang leh Silchar inkar Rel service thar hawnna Sairang Rel Station-a inkhawm buatsaiha CM Pu Lalduhoma thusawi pawimawh lo bih thuak thuak ila.

Chief Minister hian PM Modi kaihhruaina hnuaia Act East fakin, Sairang leh Silchar rel service tur hi Assam nena kan inpawhna tiṭha lehzualtu tur a nih bakah, Sawhthing leh thlai dang kan tharchhuahte hralhna tur zau zawk min hawnsak ang a, kan flagship prog. Bana Kaih tichaktu tur a ni, tih a sawi hi a pawimawhin a pawmawm hle.

Tin, CM ngenna vanga Sairang leh Silchar inkar rel tlantir hi tihhlawhtlin a ni, tih hi theinghilh chi a ni lo.

CM hian, Mizoram loneitute tan Sairang Station-a Warehouse sak a ṭul thu a sawi hi thil pawimawh tak mai, kuthnathawktute tana thu lawmawm tak a ni. "Silchar hi ṭhenawm state khawpui a ni satliah lo va, hman aṭanga ei leh bar leh mamawh chi tin kan chawkluhna khawpui pawimawh a ni," a tih hi a dik chiah a. He Rel service thar hi sumdawngten man tlawm zawka bungrua an chawkluhna leh thlai thar kan inhralhtawnna atan kawng pawimawh a ni tur hi thil chhinchhiahtlak tak pakhat a ni.

Hei bakah, Delhi–Silchar Rajdhani Express chu Delhi–Sairang ni tura tihsei (Extension) ṭul thu a sawi tel pawh hi thil pawimawh tak a ni. CM ngenna anga Sairang Rel Station, World Class Rel Station-a siam tura tihfel a ni leh, hemi atana railway thuneituten Rs. 97 Crore an sanction leh tender an tihchhuah tawh thu te leh, tender hi thla thar March thla tir lama hawn an tum thu an sawi hi thu lawmawm leh kan ram hmasawnna tur chikhat a ni.

Hetih mek lai hian Home Minister Pu K Sapdanga chuan ZPM Party inkhawmah thu a sawi ve thung a.

Kan HM in, "Dik leh fel takin Police kan la leh dawn – ṭhalaite lo inring rawh u," a ti ngam hi a ropui a, kalphung thar sorkar a takin kan hmu tih a chiang.

Sorkar kalta kum tam tak kan hrawn tawhah khan kan Home Minister ten khitiang thu khi an sawi tawh em? Sorkar PR leh rorel lai party press release zawng zawng hi keu chhuak leh vek mah ila, khitiang thusawi khi a awm ka ring lo.

Home Minister hian, Police Post ruak 4,666 a awm a, financial year tharah police 200 lak leh tum a ni, a ti. ZPM sorkarah hian police constable mi 250 lai an lo la tawh a. Kha mi ṭum pawh khan dik taka lak a nih theih nan Infoclab Solutions Private Ltd. (Delhi) te kha rawih an ni a. Tun hma lama kan hriat lar em em, Hnam Run List, Bhavan List, leh duhsak bik (favouritism) a bo vek a, ruling party mi ngei ngei te pawh an vui lek lek zawk a nih kha.

HM in, "Kuhva Smuggling kan do a, politician inrawlhte mipuiin an hnawl a, Police inrawlhte pawh an pension zel a, kum 2 chhungin Hachhek bialin a rah an tel a. Kan sorkar chuan kuhva smuggling hi kan khap zel dawn a, Service lai an ni emaw, civil mi an ni emaw, inhnamhnawih an awm chuan kan dim dawn lo,” a tih pawh hi dikna duh inti tan chuan han sawisel tur a vang hle mai.

AR ram chhuahsan vantlang tana hman ṭangkai dan tur a sawi te pawh hi a bengvarthlak hle.

Sorkarin ruang 1,888 phurh nan cheng vbc. 2 a seng tling ṭep tawh a. MUHCS hnuaiah damlo mi 79,856 enkawl nan cheng vbc. 116.40 sen tawh niin, tunah hian pek chhuah mai theih turin cheng vbc. 9.99 peih fel a ni leh tawh bawk a, "Damlote tlukin empanelled hospital-te an lawm a ni,” a tih pawh hi sorkar hmalakna ropui tak mai, ruling party mite tan phei chuan mi zingah sawi chhawn leh nuam tak a ni ngei ang.

Kan CM leh HM thusawi ngun taka han chhiar hian kan sorkar hian kuthnathawktute a ngaihpawimawh zia te, ram mipuite hmasawnna tur a dah pawimawh zia te, dik tak leh fel taka rorelna kalpui an tum zia te, sum hi eiru lova a nihna tura hman chat chat chuan hmasawnna leh mipui tana a ṭangkai theihzia te a langchiang hle a ni. Kalphung thar - Mipui sorkar dik tak kan hmu zel e.

- Hruaia Kawlni, ZPM Media