Ka duhthusam – KC Lalmuana leh Seikunga Day

Kum kal ta dt.07.03.2025 khan “HNAHLAN KHAW PASALṬHA PU K.C. LALMUANA LEH PU SEIKUNGA” tih kha ka rawn thailang ve zeuh tawh a. Kum khat a lo liam leh ta reng mai.

Ka sawi tawh ang khan Hnahlan khaw dintu hi Sailo Lal Saiṭhuama, kum 1820 vela Aizawl dintu Sailo Lal Lalsavunga fapa, Sailo Lal ropui Vanhnuailiana tuchhuan kha a ni a.

Mizoram khawvela chanchin hriat reng tur leh kum tin March ni 7 a lo thlen apianga kan rilru a rawn thar leh zel ṭhin tur, Mizoram khawpui Aizawl mai baka India Sawrkar Thlawhnain a kah/hal; Hnahlan khua hi a khaw len emaw tet emaw lam ni loin, hla thuin “Aw Bethlem Judai khawpui te zingah I te ber tawp lo e,” a lo tih ang mai khan palenna thuruk a nei ve tlat chu a ni. Chutiang ngaihtuahna chuan duhthusam ramah min hruai lut a, hnim hring dup hmunah ka awm ta ni berin ka inhria.

March Ni 7, 2026 varṭian, vai pathian thawh hma an tih ang hun velah tlangau a rawn au ta lauh lauh mai le. Lukham leh beng inkara kut zeh luh pahin ngun takin ka han ngaithla a, “Sailo Lal Saiṭhuama khua te tana hriattirna pawimawh i lo ngaithla ang u. Vawiin hi Hnahlan Pasalṭha K.C.Lalmuana te ṭhian dunin Hnahlan khua an humhim ni GOLDEN JUBILLEE a lo ni ta reng mai a. Hemi ni hi Mizoram Sawrkar chuan “K.C. LALMUANA LEH SEIKUNGA DAY” tiin a rawn puang ta a ni, Hnahlan khaw mipuiten i chhinchhiah ang u khai, he day lawm tur hian tukṭhuan eikham veleh Community Hall ah kalkhawm vek tur a ni. Chawfun a ngai lo ang a, fatute'n ruai anlo buatsaih dawn a ni," ti hian ka hria a.

A ni tak asin, Jubillee hi chu keini Mizo te chauh ni lo khawvel hnam hrang hrang te hian an ngai pawimawh vek mai a ni. Israel ho chanchin Bible-a kan hmuh theihah te pawh Jubillee hi chu an lo ngai pawimawhin urhsun takin an lo hmang tawh ṭhin. Amaherawhchu, chhiatna lam thu erawh hi chu han lawm hup hup chi chu a ni chiah si lo. Hriatrengna thil dangin kan lantir ṭhin thung awm e.

Dt.04.03.2025-a Pu K.C.Lalmuana Nupui Pi Kaithiangi nen kan inkawmnaah khan Pi Kaithiangi chuan dt.06.03.1966 zana Pu K.C.Lalmuana te ṭhian dun, Sipai Camp aṭanga Hnahlan khaw lam an panna kawngah khan silai mu ni ngei tur rawn thlawk sen fua fua an hmuh thu leh, khaw chhunga an luh khan Volunteer te awmna Primary School lam an pan nghal a, Jet Fighter-in khua a rawn kah/hal tur thu min hrilh a. Kha thu an hriat veleh khan mipuite chu khaw chhung chhuahsan turin an phek buai ta nghal a nih kha.

Kum 60 (sawmruk) zet a lo liam dawn takah chuan, Hnahlan Pasalṭha pahnih hming hian eng emaw tak chu tih a ngai a ni. Vanapa leh Mizo Pasalṭha dangte hriatreng nan, hmun hrang hrangah an hmingchawiin hall te din a lo ni nual tawh a. Chutihrualin, he Hnahlan khaw chhanchhuaktu Pasalṭha Pu K.C.Lalmuana te ṭhian dun erawh hi chu an hminga DAY siam hi a inhmeh hlein a lang.

Tichuan, Mizoram Sawrkar hian Hnahlan khaw tan bik K.C.LALMUANA LEH SEIKUNGA DAY tiin March Ni 7 hi min puansak ta se a va han lawmawm dawn em. Hnahlan khua chuan lo puang ve mai se te pawh kan ti thei awm e. Amaherawhchu, sawrkar ngeiin official taka min puansak chuan a hlu lehzual dawn asin.

Chutiang boruakin ka ngaihtuahna khawvel a luah mek lai chuan famta Pu Rampuia'n (Zoramliana) Mizo hnam tana hla ṭha eltiang a phuah, Daduhin thiam taka a sak chang thumna:

“Ram tana tuartu thlafam chang tawh te,

Nghilhni awm thei silo;

Lungduh par vullai an chul mai tur hi,

Ka ngai ngam lo, aw thinlai rukah”

tih hian chiang tak mai hian min han tiharh thut mai a.

- Hrangchhuana Sailo

Ph : 9436352280/ 8837095663