Kristian, tho r’u, mu rei s’u
Kristiante hian ram rorelnaah eng nge kan tih ve ang? Roreltute hi Pathian ruat an ni a, Nimahsela, roreltute hian Pathian duh danin ro an rel vek lem lo. Roreltuten Pathian duh dana ro an rel loh erawh chuan, an rorel sak ram leh hnamin buaina leh harsatna namen lo tak a tawk ṭhin a ni. Mizoramah pawh hian, kum rei tawh tak aṭang khan, kan ram roreltuten Pathian duh dana rorel lovin mahni pumpui hma chauh ngaiin ro an rel ṭhin avangin kan ram leh hnamin buaina leh harsatna namen lo tak kan tawrh phah a ni.
Kan ramah ruihhlo nasa takin a hluar a, ruihhlo avangin ṭhalai tam tak an thi tawh a, tunah hian ruihhlo ngai, sim thei tawh lo, mi tam tak kan la nei a ni. A va rapthlak tak em, Eirukna (Corruption) lahin bu a khuar nghet hle mai bawk a, Ram hruaitu tura kan thlan chhuah MLA-te chu eiru tura ngaihna lian tak kan nei a, an fihlim lo tlangpui niin a lang bawk a ni. He sual lian tak hian, Mizote hi a lian ber aṭanga a te ber thlengin min fan chhuak a, sum hman dik lohnain kan ram hmasawnna tur a tiṭhuanawp zo vek a nih hi. Hetih lai hian, hmeichhiat mipatna hman khawlohnain a hrin chhuah HIV hrikin min luh chilh thuk hle bawk a ni, Kristian inti, piangthar tamna ramah hian sex hman khawlohna avanga buaina tawk kan tam hle bawk a. Hnam bo ral mekte lan chhuanna ni fo ṭhin, mipa kan thi zawih zawih ta mai a. Mizote hma lam hun a thim tak zet zet a ni. Pathian duh zawnga kan ram roreltuten ro an rel loh vang a ni.
Kristian ram kan ni, tiin inchhal mah ila, kan Kristian nun erawh a mumal hleithei lo a nih hi, Mi tam tak sum ngainatna bawihah kan tang tawh a, sum hmuhna tur a nih phawt chuan mawi leh mawi lo pawh kan zawng thei tawh lo a. Kan ramah dan leh hrai mumala kenkawh a ni loh avangin, sual a huangtauin a ngampa em em a, Sawrkar hnathawk aikal lak tihte chu nunphung pangngaiah kan ngai hial hman a ni. Hetih lai hian, kan rama sualna lo pung nasa tak hi, kan ram roreltute chuan, pawi tihna an nei lo emaw tih mai tur a ni a, Dawt leh thu tak pawh hriat hleihthei loin mipui min bum reng a. An lal theihna tur a nih phawt chuan tih hreh lah chu an nei der si lova, Kan ram leh hnam chu sualna khur thuk takah min luhpui ta a nih hi. He sualna khur aṭang hian Kristiante tan pawh, kawng dik zawh chu a har em em mai si a, Chuvangin, Kohhran leh tlawmngai pawlte bakah mi ṭhahnemngaiten kan ram leh hnam a lo dinchhuah theih nan Pathian hnena ṭawngṭai chungin nasa takin an bei tak meuh meuh a ni.
Kan Pathian thu chuan, "Dil rawh u, tichuan an pe ang che u, zawng rawh u, tichuan in hmu ang, (Mt 7:7) tiin min hrilh a, Beidawng loa mi ṭhahnemngaite beihna azarah Pathian chuan Mizo Kristiante hi mi hawi san lo a, Chuvangin, tunah chuan kan ramah hruaitu thar, "Ka eiru lo vang" tia intiamte min pe ta a ni. Kum hnih lek ro an rel chhung hian, India ram state zinga eiru (Corrupt) lo ber state kan lo ni ta der mai. Dan lo anga kuhva ro tawlh ruk (smuggling) titawp turin hma an la nasa hle bawk a, a va lawmawm tak em. Kan rama ṭhalai tam tak suattu ruihhlo dona beihpui sawrkar berin a thlak ta mup mup ta mai le, Nu leh pa tam takte, fate ruihhlo avanga lungngai indawm kun mekte pawhin beiseina thar an nei leh ta e. Mizote tan Lalpan hun lawmawm a rawn her chhuah tir leh ta.
Unau duh takte u, rualin i tho vang u, Kan Pathian ral kapho i ṭanpui ang u, Kan ram tichhe theitu, dan sual min timangtu, tireh tur leh ngam turin i bei ang u. Kristin tho r'u, mu rei s'u, ṭap kan chawlh san dawn em ni? Lalpa'n thu min pek lai hian, Kan ṭhu mai mai dawn em ni?
- Hausanga Hauzel