Electric bill ka complaint

Hmanni chu kan electric bill a hma aiin a lo san chungchangah an side office ah complaint turin ka kal a, mi dang complaint tur pawh an lo awm nual a, ṭhenkhat chuan smart metre vuah hma ai daihin a tam thu an lo sawi nak nak a.

Keipawh ka'n sawifiah ngial a, a thawktute chuan uluk takin kan metre vir zat an enfiah a, thla khat bill tur thla khat leh ni 18 lai bill-ah chuan a lo tel a, a thla lehah a tlem tawh ang, a huam a zau a nih hi an ti a. Thla tharah chuan a rawn tlem ta reng a, ka fiah ve chauh a ni.

Smart metre an vuah hma kha chuan kan duh duhin electric wire kan pawt kawi a, a ṭhen heater leh tui lum nan metre kaltlang loin kan lo hmang hiau hiau kha a lo ni a, smart metre vuah chinah chuan a dik taka current min vuahsak tak avangin kan chawi tur dik tak kan chawi ta a, kan lo hmang hnem ve hrim hrim a lo ni.

Electric bill tihsan anga Congress ṭhalaite'n an sawi kha Power department Secretary hoin engineer ten an sawiho a, a bill tihsan awzawng a lo ni lo tih an sawi aṭang ka fiah ta a ni.

Mizote hi depdé tak hnam kan ni a, a theih ang anga sorkar a tlaran zawnga ei tum ràn kan ni hlawm. Tui a ni emaw, current a ni emaw, engpawh ni se a thlawna dawn theih ang ang dawn kan tum hi chu kan inenfiah ve chu a ngai a ni.

Current ngat phei chu Sorkarin min tumsak (subsidise) nasa em em a, chutih karah metre kaltlang loa a tam thei ang ber pawh ruk kan tum ta ṭhin a. Inbum theih lohin smart metre an han vuah meuh chuan kan current hman ang chiah chiah min han bill ta a, chu chu electric bill tisangah sorkar kan han puh ngawt a, kan rinawm loh vang a ni reng si.

Plug-te pawh current kan làk dawna vuah si lo, current pawhluh hnuah kan duh zat zat kan vuah a, kha'ng plug vuah belhte kha man chawi ngai vek an ni a, a rukin rei tak kan lo hmang a, smart metre an han vuah khan current a lo hmang tam ta a, chu chu electric bill sangah kan puh ta mai mai zawk a lo ni.

Sorkar lo party hian engkim sawisel tumin mipui min hruai khawloh an tum a, hrawk phiar ṭawng ṭawngin an inaukhum a, mipui min tih chiai tumin an hmanhlel nasa hle. Mahse mipui hian political party awmzia kan hria a, an sawi apiang kan awih duh tawh bik lo tih hre mawlh teh se

-Lalkhirhvela