KHAWPUI FAINA LEH HRISELNA

Kan Aizawl khawpui leh keimahni hmun hma ṭheuh kan vawn fai hi a mawina leh kan ram tlawhtu mikhualte laka kan lan mawina atan mai a ni lo. An fakna leh lawmman hmuhna atan maia tih pawh a ni hek lo. Khawpui vawn fai leh vawn thianghlim hi a mi chengte hriselna atana pawimawh leh tih makmawh a ni. Kan sawrkar leh a changtu department-ten theihtawp an chhuahna azarah Kawngpui tlangdung chu a fai tha ta khawp mai a. A lawmawm khawp mai. Kawngpui aṭanga peng kawng tê zawk leh step-te erawh hnawm paihna hmun turah kan la ngai deuh mai niin a lang. Khawi lai hmun pawh a faia a thianghlimna tur chuan kan rilru lam a pawimawh. Fai leh thianghlim duhna rilru kan neih a ngai a ni.

Kan thil paih turte silfai : Hnawm paih chungchangah hma kan sawn tawh viau. Mi ṭhenkhat a paihna tur motora paih lo, kan la awm nual nia hriat a ni. Thil pawimawh deuh pakhat kan hmasawnna tur chu, kan paih turte sil fai hi a ni. Ṭin chi a ni emaw bottle a ni emaw, kan ei ruah tawhna, kan paih turte hi i sil fai vek zel ang u. Sangha ṭin, butter bawm ruak, Jam bur, ṭin leh thil dangte pawh ṭhuah fai lohva kan paih hi tho leh natna pu darh thei rannung dangten an bawm ṭhin a, chu chuan natna hrik min kaitir ṭhin a ni. Chuvangin, kan paih tur hetiang lam chi reng reng hi chu i silfai vek zel ang u. Chu chu ram changkang tawhte tih dan a ni.

Fai chu taksa hriselna a ni : In vawn fai leh in vawn thianghlim hi mihring hriselna a ni. Mahni in leh a vel kan vawn fai loh hian kan hriselnaah nghawng thui tak a nei. Rannung seh natna tam em em mai pawh hi kan invawn fai loh rah a ni thei. He natna pu darhtu hi sazu leh rannung dang te an ni an ti a, chuti a nih chuan kan hnawm te hnawm paih motor-ah paih lova, kan in vela kan thehdarh hian heng natnate hi min kaitir a ni tihna a ni.

Chinai tah rân : Kuhva zuartute leh a eite fimkhurna tura ṭha han sawi kai hram ila. Kawng vawnbân leh kawr sir ban leh bâng vela tah rân pawh a ziaawm ta khawp mai. Kuhva khawr zuartute dawr kawngka biang leh bang vel erawh a la rang nasa deuh. Kawngkama kuhva zuar te hian anmahni dawrtuten chinai an tahna tur towel emaw puan eng pawh a biru deuh laiah khai se, dawr khar rualin dah lut zel se la a ṭha ngawt ang. Kuhva ei sawi takah chuan, kan sawrkar mi liante zingah fai vang mai, in vawng thianghlim tak tak an awm laiin, central lam aṭanga lo kal hotu lian leh mi pawimawhte nena meeting neih ho changa kan mizo Officer chhuanvawr, kuhva ṭhial nuau nuai, ka sen huam mai tv-a lo lang ṭhinte hian hnam min ti mual pho deuh a ni lawm mi aw! Sim hlauh atan a ṭha khawp mai.

- Commissioner Lalkiamlova, President, Clean Aizawl City.