CHAPCHAR KUT KAN LO HNAIH LEH TA

Kumthar 2026 kan chuang kai a, rilru kil khatah, Republic Day leh Chapchar Kut a lo lang leh a, a chhan pawh, mi zawng zawng tana hun hlimawm leh sawrkar hnathawkte pawhin hna ṭul kalsana zalen taka hun an hman theih, India ram pumpui tana hlimni (Republic Day) phei chu a ni a, Chapchar Kut erawh Mizo hnam hrang hrang te chanvo bik a ni. Mizote pawhin kan ngaihlu telh telhin, kan hmang uar deuh deuh ni pawhin a hriat a ni. Nikum 2025 Chapchar Kut kan hman zawh hnu khan, Chapchar Kut kan hman leh huna ka duhthusam, zaithiam te leh Chapchar Kut Committee te hnena ngenna ka siam, he chanchinbu zahawm tak, Vanglainia ka rawn ziah kha, zaithiamte leh Kût Committee ten an lo mangnghilh takin ka han thual leh teh ang.

Nikuma ka ziah tawh ang khan Chapchar Kut kan hman apiangin thupui mawi leh ṭha tak tak kan nei ziah a, kha'ng thupui kan hman tawh zawng zawngte khan ram leh hnam hmangaihna leh humhalhna, zo nun ze mawi tlawmngaihna, rinawmna, aia upa zahna(etc) a kawk vek a, kum tinin heng thupui hi kan hotuten ṭhahnemngai tak leh thiam tak, sawi rei hlau a inthlahrung takin thu ṭha min hrilh ziah ṭhin a. Ngun tak leh tihtakzeta lo ngaithla tan chuan, Mizo mipui zawng zawngte hian kan lo hlamchhiah ṭeuh tawh zo nun ze mawi nunpui turin bul ṭan ṭha vek thei ila aw! tih vawng vawngna tur niin ka hre ṭhin.

Chumi hnu hun hnihna mipui nawlpuiin Chapchar Kut kan hman chhan ber emaw tih mai palh awl, zai leh lam, ṭhalai leh naupangte hlim taka lam kan thai hun a lo thleng ta a, zaithiam larte'n mipui min àwi ṭan a, Lammual chhungah zaithiamte zaipui turin lamtual kan mawi ta. Hemi hun tak hi a ni, Chapchar Kut kan hman apianga ka duhthusam lo lai, zaithiam zai turte ka thu rawn duh leh, ka ngen nawn duh chu. Thenkhatin ‘Love Song’ ni danga an larna hla ulh pui pui, lampui rem lo fahrante, ṭhenkhatin zawm theih miah loh ‘Rap’ an ti emaw ni, eng thu thu emaw rang tak takin an chham zuah zuah a, Lammual khata ṭhalai lam chakte tana lampui theih mang lohte an sa bawk a. Heng hi chu dah ṭhain, kan thupui leh Chapchar Kutin a ken tel zo nun ze mawi phochhuaktu leh zo nun ze mawi nei tura fuihna hla leh, Mizoram chawimawina hla etc, Chapchar Kut programme-a sak zawh sen loh, Pu Rokunga’n min phuahsak a, hengte hian mipui min awi zawk ta ula, field zawla ṭhalai leh mi tam zawkin kan zawm theih vek leh lampui chakawm em em vekte an ni si a, he hlatea mipui min awi tur hian, zaithiamhote u ṭhangharh lul teh u.

Nangni Chapchar Kut programme siamtute u nangni pawhin, a hnuaia Pu Rokunga hla te ka han tarlante hi sa turin zaithiam in sawm turte kha lo ngen ve hram turin ka ngen a che u.

1. Kan tlang, kan ram a hring a mawi Tlawmngaihna pangpar mawi a vul Rangkachak leh lunghlu aiin,

Chu pangpar chu a mawi zawk e.

2. Kan zotlang ram nuam hi, Chhawrpial run i iang e.

3. Kan ram rorelna pawl hi

Aw Pathian malsawm la.

4. Raltiang i kai ve ang.

5. Mizo kan nih kan lawm e.

6. Aw Zoram nuam i hming a mawi mang e.

7. Aw nang Mizoram tlang nuam.

8. Kan Zoram nuam leh mawi, mi hrang pianna.

9. Ekhai! Hlim rawh u, nui rawh u..

10. Aw ka pianna ram, kan Zoram nuam, Ka thinlungin ka hmangaih che,

Tu m'a bawih atan ka phal lo che, Tho la, I kein ding rawh.

11. Heng bakah hian, opening song ni lovin, vantlang inkhawm bulṭanna hla, khawimaw veng YMA Zaipawl ten ‘Aw, Nang Kan Lal, Kan Pathian I Hming Ropui Ber Se,’ tih te hi sa bawk se la.

Hetiang taka Chapchar Kut hun hnihna kan hmang thei a nih chuan Chapchar Kut kan hman danah hma kan sawnin, kan hlawkpui hleah ka ngai ang. A chhan chu zaithiamte hla sak hian mi rilru a hneh thei em em a, heng hla tha tak tak, Mizote rohlu tling ṭhangthar zawkten an sak thiam toh loh leh sak ngai loh ho hian, Mizo kan nihna leh ram leh hnam hamngaihnaah te, rinawmna leh hawihhawmna kawngah te, ṭhalaite rilruah a tuh thar leh ang a. Hmana pi leh pu te nun dan mawi zawk kha theihchang se lo kirin kan Zoram nuamah, pangpar angin vul leh se, dikna rorelna, tia lam auh lawm lawm leh kan chhuan ber tlawmngaihna, puan ang chul ta kan tih te pawh kan Zoramah hian a lo vul leh ngei ang tih ka beisei tlat a ni. He thu ka ziak chhan ber pawh a ni e.

- KC Chhangte, Nursery Veng, Mb. 9436361653