Lenkawl a lo êng e

Zan thim tak hnuaiah natna hrehawm tak tuara kan han rum tlawk tlawk changte leh kan hmangaih leh ngainat em em ten thihna avanga mual min liam san zan a, kan ṭah hawm hawm changte hian, zing khawvar hun kan nghakhlel em em ṭhin a, khua lo var thuai thuai sela, kan natna tawrhte leh ṭahnate hi ziaawm deuh tura ngaihna kan neih ṭhin a ni. Ni e, lungngaihna te, manganna te, natnate hi zan thim tak hnuaia tawrh ai chuan khaw eng hnuaia tawrh hi a ziaawm fo reng a ni. Chuvangin, zan thim tak hnuaia lungngai taka kan awm chang a, khua lo var dawna khawvar turin kawl a rawn chhun ente hian beiseina rilru thar neiin "Lenkawl a lo eng e," tiin kan inthing har ṭhin a nih hi.

Mizo mipuite pawh hi, hun rei tak chhung chu sawrkar hnathawk ve lote leh kut hnathawktute chu, zan thim tak hnuaia hrehawm tinreng tuara kan rum tlawk tlawk ang mai hian, sawrkar kan hrawn takte hnuaiah khan kan rum tlawk tlawk a, a chhan chu, Pathian ṭihna leh hlauhna nei miah loten ro an rel vang a ni. A dik a dikin kan sawrkar hrawn takte thil tum ber kha chu kan ram leh hnam, hmasawn tir ni loin, mahni pumpui hmangaih a, inhampuar kha ni berin a lang. An hmathlir ber pawh, Inthlan leh a awm huna tlin leh roreltu nih reng kha a ni a, Chumi tur chuan tihhreh reng reng an nei lo a ni. Nimahsela, tunah chuan Mizoramah ZPM party sawrkarna hnuaiah chuan, sawrkar hnathawk ve lote leh kut hnathawktute tan kawl a lo eng ve ta e.

Kan hriat ṭheuh angin, Mizoramah hian, sawrkar hnathawkte dinhmun a ṭha hle ṭhin a, Political party ten an duhsak zawngte sawrkar hna an pe nasa reng a ni. Hengte avang hian, mi tinin sawrkar hnathawh chak avangin sawrkarna fawng vuantute kan intlawn siak hut hut mai a nih kha. Sawrkar hnathawkte chu thla bia hlawh la an nih avangin dammawh hritlan pawh tawkin, Office kal thei lo mah sela, an hlawh a kiam chuang lo va, damdawi ina awm ngai pawiin damlo mah sela, an damdawi in awm man sawrkarah an bill leh thei zel mai si a, Sawrkar hnathawk ṭhenkhatte phei chuan aikal lain sum lak luhna dang an dap thei a, han sumdawng ta lawp lawp pawh an awm reng bawk a ni. Revd Chuauṭhuama (L) phei kha chuan, "Mizoram chu sawrkar hnathawkte paradis ka ti mai," a ti hial a ni. He tih lai hian sawrkar hnathawk lote tan chuan sum lak luhna a vang em em mai a, Sawrkar laipuiin kan ram hmasawnna tura sum min rawn pekte pawh sawrkar hnathawk lote tan chuan, chan alawi kan nei lo a tih theih hial awm e.

Nimahsela, tunah chuan ZPM sawrkarna hnuaiah chuan sawrkar hnathawk lote tan kawl a lo eng ve ta e, Mizo mipuite i lawm ang u. Mizoram Univarsal Healthcare Sheme (MUHCS) hian, sawrkar hnathawk ve lote tan damdawi in awm a ti awlsam ve ta hle mai, tunhma zawng a, Damdawi in awm chungchanga sawrkar hnathawk leh thawk lote kan inthlauhna em em ṭhin kha, tunah chuan ZPM sawrkarin a ti bo ta a ni. Heti ang healthcare system ṭha Mizo mipuite mi chhawp chhuah sak hi, kalphung thar min tiam chu a ni dawn lawm ni. Sawrkar hnathawk lote tan chuan a ṭhain a lawmawm hle a ni. Mi chhumchhia leh rethei zawkte pawhin dammawh hritlan kan tawh pawhin damdawi in awm chungchangah harsana nei loin kan awm ve thei ta a ni. Heng ang hi tunhmain Mizoramah a la awm ngai lo a, tun hma a, mi tam tak harsat avanga damdawi ina awm thei lo ṭhinte tan pawh. Kawl a lo eng ta e.

Tuna kan sawrkar hrawnah hi chuan Sawrkar hnathawk aikal lak an awi lo a, zelthel taka sawrkar hnathawhte an awm a remṭeuh tawh lo ni tur a ni, sawrkar hnathawkte hun vawn dik tir an ni ta bawk a, Sawrkar hna lak chi hrang hrangah dik leh fel taka lak nia langte leh Kut hnathawktute thlai thar lei an ni tate hi, tunhmaa kan la hmuh ngai loh a ni, Hei lo pawh hi, kan rama nu leh pa tam takte ṭahna titamtu ruihhlo do-na kawngah pawh kan sawrkarin beihpui a thlakte hi a va lawmawm tak em, Chuvangin, Mizote i lawm ang u, kan rama lungngaihna chhumpui zing ṭhin kha, ZPM sawrkaiin an vai kiang mek zel a ni, Ei ru lo tur intiamte rorelna hnuaiah Hlim leh lawmna kawl a lo eng ve ta e.

Aw, Zoram, lo ding chhuak rawh,

l tan khua a var dawn ta,

Hun sul ang a liam zel a,

Zantiang kawl a liam dawn ta,

Lenkawl a lo eng e.

- Hausanga Hauzel