Party chhungkuaah Zonun mawi inzirtir a ṭul

Mizo mipuite hian social media kan khawih nasa ta lutuk a, kan hnam nun hi mawi loh phah niin ka hre ṭhin. Social media khawih nasat hrim hrim hi chu hnam dang pawh an nih ve ka ring tho a, thil ṭha lo leh mawi lo tihna atana hmang pawh an awm ve ṭeuhin ka ring a, mahse, Mizote ang em ema social media-in hnam nunphung a sàwi chhiat hi a awm ang em aw ka ti ṭhin.

Social media hi lehkha thiam sang tak te, mi fing tak takte'n an khawih nasa a, mahse, anni chauh khawih tur a nih loh avangin mi mâwl tak takte pawh kan han khawih ve zel lo thei lo a. Matric pass chu sawi loh, high school takngial pawh rap lote nen lam social media hi kan hmang tawh mai si a, mi tam chuan kan âtzia leh mâwlzia lan chhuahtirna atan kan hmang mek chu a nih hi.

Eng ni bik lo mah ila, political party worker te, party politics ruihchilhte ngat phei social media-a an râk dan vel hi chu a hahthlak ka lo ti ve ṭhin. Mawi leh mawi lo pawh thlu loin, dâwn loin an sapatâl vel ni ber hian ka hria. Anmahni pawhin thu dik lo a ni tih an hriat chiansa reng te, anmahni emaw, an thurualpuite emaw phuah chawp, dâwt thu tih an hriat rengte pawh an thehdarh duh tlat mai a. A zialo tak zet a ni.

Heng social media-a mi tihmualpho tum, a bikin an khingpui party leh party hruaitute tihhmingchhiat tum râna thu leh thlalak thehdarh vel ṭhin ho hi Zonun ze mawi tichhetu langsar ber an niah ka ngai. Zonun ze mawi kan tih, tlawmngaihna te, hawihhâwmna te, aia upa zahnate an bosal hle a ni.

Awm honaa titinaah hi chuan thu dik lo deuh pawh sawi se, a thlen chin a thui lo a, social media-ah chuan a thleng thui fu tawh si. Zonun ze mawi tak an tihkhaw loh dan hi a nasa bik riau a ni.

Political party mite hi an party chhungah Zonun ze mawi an lo inzirtir thar a ngai viau mai. An worker-te tun ang reng renga social media vela an râk mai mai chuan, kan Mizo hnam nunphung ṭha hi ṭhangthar zelte'n an hre lo tial tial dawn. A chhan chu, social media-ah thu an post peih si, an comment peih si; chu'ngte chu ṭhangthar zawkte'n an hmu lo thei bik si lo. An ṭawngkam chhe tak takte hi mi dang, a bikin naupang zawkte tan entawn chin a awm lo thei lo.

Chuvangin, political party mite u, in party chhungah ṭheuh Zonun ze mawi hi lo inzirtir uar nasa teh u. Kan ram neih chhun kaihhruaitute leh kaihhruai tuma beitute in ni a, in tan Zonun ze mawi hi ngaih pawimawh tak zet a ṭul a ni.

- Zothankhuma