ZO TUI THIANG TE, LUANG DEM DEM LA
Thlasik khaw vawt tak mai a kiang a, tlang tin leh mual tinte chu, romei chhumin a rawn bawh paw leh ta chiai mai le. Vah tlai thli a thaw vek vek a, thing hnante a chhem tla chum chum leh ta. Ruah surna a rei tawh a, khua a tuihul leh ta hle mai, fur laia a hlutna kan hriat lem loh, tlang kara kawrte tui luang ker ker, fim leh thianghlim em em mai, damdawi hmanga tih thianghlim chawp ngai lo, Mizote tana Pathian thil thlawn pek hlu tak mai chu, a hlutzia a lo lang leh ta. Rokunga'n "I mawi em e, kan zoram hmun sang, Fiara tui thing kan dawnna," tiin a lo phuah reng a ni. Tlang kar kawrte tui fim tak leh vawt dai raih mai, kan rama a awm hi, Mizote hian Pathian hnenah lawmthu sawi mawlh mawlh tur kan va ni em, Hetiang siktui thiang leh fim tak mai, sum leh paia lei ngai miah lova, man loa kan dawng hi a hlutna hre thiam lo ṭhangthar zingah mi eng zat tak awm ang maw?
Mizoram hian hmasawnna kawng kan zawh ve zel a, Kawngpui ṭha pawh kan mamawh hle a ni, Chuvangin, kan ramah kawngpui ṭha nei turin, Chhak leh thlang, chhim leh hmar tan tlang turin hmalak zel a ni a. He hmasawnnain a ken tel kawngpui laih hian kan ramah tuihna a chhilh bo nasatzia chu, a hretu vek kan ni awm e, kawngpui laihna leivung paih dan ṭha zawk pawh mi ṭha-hnem-ngaiten an sawi chamchi chung pawhin, zawm a hlawh mawh hle a nih hi. Tunhmaa tuihna ṭha tak awmna ṭhinahte chuan, tunah chuan tuihna hmun tur a awm mumal ta reng reng lo va. Nula leh tlangval ṭhalaiten, hlim tak leh phur tak mai a, "I mawi em e, kan zoram hmun sang, Fiara tui thiang kan dawnna", an lo tih ṭhin kha, tunah chuan tihngam a ni tawh lo mai dawn a lawm. Fiara tui thiang a bo mek zel a ni si a, Kan ram dung leh vang hi, han hawi vel ila, kawrte tui luang hiau hiau, hmun tur a va vang ta em em ve, Kan rama luipui tuite pawh, a hnar ber kawrte tui fim leh thianghlim a bo zel avangin an nu phut tawh mai a nih hi, Kaikuang te, chengkawl leh chakai, sanghate chenin chenna tlak loh an chang mai dawn niin a lang, Mizorama tuite hi, "Zo tui thiang" tih ngam pawh a ni tawh dawn hleinem le, Chuvangin, Mizoram hmasawn dan hi, hmasawnna hrisel lo takah kan chan tir mai dawm em ni ang le? Ram mawi leh nuam tak, hmasawn si ni turin ṭan i la teh ang u.
Kan ram hian, tuihna tam tak kan nei ṭhin a, "Zo tui thiang te, luang dem dem la", tia kan lo chhuan em em ṭhin ram kha a ni, Nimahsela, tunah chuan kan rama tuihnate an bo zo mai dawnin a lang ta e, He tuihna tlem tial tial hi, tu tihdik lo nge, tu nge a mawhphur tiin puhmawh tur zawng zawng mah ila, tuman mawhphurtu nih kan duhin a rinawm si lo a, chuvangin, kan phun lungawi leh mai mai dawn niin a lang. Hawh teh u, a ti dik lotu zawng buai mai mai loin, Zirsangzela Hnamte-in min hrilh angin, keima tih tur a ni, tiin kan rama tuihna bo mek hi, tuihna tam zawk kan neih theih nan leh tuna kan tuihna humhalh tur hian, mi tinte hi kan pawimawh tih hria ila, Tlang tin mual tina Zofate u, kan rama tuihnate humhalh tur leh tipung turin kan theina zawn ṭheuhah ṭan i la tlang ang u. Khua kan tlai hma ngei hian, Pathianin Mizote malsawmna min pek "Zo tui thiang te, luang dem dem la, Tuipui fawn vel panin" kan tih zel theih nan, Tuihna i humhalh ang u.
- Hausanga Hauzel