MI DANGTE EI ATAN

Eden huanah khan Lalpa Pathian chuan mihringte eitur leh rin tur thei rah chi tinreng a dah a. Chubakah lei chunga a thilsiam chi tinrengte chu an dam khaw chhuah theihna turin an eitur leh rin tur a dahsak vek a. Chutiang ang fakau chuan siamtu chuan a thlahthlam lo va, a enkawl zui zel a ni.

Khawvela sum zem lian ber US Treasury te, United Nation sum zemte chuan khawvel hmun hrang hrangah retheite eitur leh rin tur a pe chhuak mawlh mawlh a, hengte bakah hian khawvel hmun hrang hranga NGO tlawmngai pawlte a té ber thlengin mite ṭanpui hna an thawh bakah eitur nei lote hnenah eitur an pe chhuak reng bawk a ni.

Chhungkuaah pawh chhungkaw Pa berin a chenpuite eitur neih loh hlauvin nasa taka hna thawkin ni tin a buai reng a. Hetiang karah hian nang leh kei hian mi dangte rin tur leh ei tur engtin nge kan thawh chhuah a, kan pek chhuah vele tiin mahni ṭheuh inngaihtuah ila. Mahniin thawh chhuah ve tum lova mi dangte thawh chhuahsa ringawt ring chunga kan awm mai mai a nih chuan, kan awm dan chuan innghahna mumal nei lovin mi dangte kutah kan nung ve mai mai tihna a lo ni ang. Mi taimate angin mi dangte ei tur pek chhuah chu a tih ve theih dawn lo a ni.

Mahniin kham khawp kan thawh chhuah hmain mi dangte eitur kan sem chhuah zel theih chuan, chu chu LALPA duh dan a niin a thawh rahah malsawmna a dawn belh ṭhin.

Ṭanpui ngaite eitur leh rin tur pe chhuak lovin, ni eng zat nge kan hun hi kan hman liam ṭhin tiin inngaihtuah ila. Mahni tan chauha inthawk khawla mi dangte sem ve ngai lo mi kan nih chuan nakinah Lalpa hmaah kan nun chu inchhirnain min hmuak dawn a ni.

Tam tak thawh khawl hnuah mi dangte ei tur pe chhuaktu thinlung aiin neihchhun mi dangte tan pechhuaktu thinlung chu hmangaihnain a khat a, sumah a innghat lo va, Lalpa’n ṭha a tihpui zawk a ni.

Mi duham mahni hma chauh ngaihtuahtu chuan ram chhuahnaah chawhmeh a zawn pawhin a awm zawng zawng lak zawh vek a duh ṭhin a. Chutiang mi chuan mi dangte lak ve atan zuah nachang an hre lo. Chutiang ang mi chu khawmual leh lui dungah nungchate tiremtu an ni ṭhin.

Hmanlai Mizo pasalṭhate chuan an sa kahsate chu mi dangte an sem hmasa phawt zel ṭhin, ram lam leh in lamah eitur an hmuhte pawh ui nei lovin ṭhenawmte an sem a, saum leh chingal thlengin an insuah tawn ṭhin. “Sem sem dam dam ei bil thi thi,” an lo ti ṭhin.

Kan neih rosum mite'n an thlir,

I hlan ve ang;

Ṭanpui ngaite zawng ve ila,

Chutin kan nun a hlim ve nan.

- H. Neihchungnunga, Durtlang North