Eng kan ti zo ta nge Mizote hi?

II Lalte 2:19

Tin, chumi khuaa mite chuan Elisa hnênah, "En teh, hei, he khaw hmun hi a nuam hle mai a, kan pu pawhin i hmu ve reng a; nimahsela tui hi a ṭha lo va, a ram pawh hi nau chhiatna ram a ni," an ti a.

Pu Rokunga (L) chuan, "Kan Zotlang ram nuam hi chhawlpial run i iang e, Hal lote'n lungruala dar ang kan lênna," tiin, an lo chawi a. Tunah zawng, nau chhiatna ram a chang zo ta em ni?

Kan dinhmun hi a him ta lo hle mai, ho lam te têah tual thihna a thleng mawlh mawlh mai si a, Social media lama thu hre hmasatu nih duh avangin thu dik tawk lo a darh chuai chuai a, kan mamawh aia tam Youtuber kan nei hi kan manganpui mek a nih hi maw!

Kan bul ṭanna a fuh lo va, a ler aṭangin kan ṭhuai a, a bul ṭanna chhungkua kan inthlahdah leh si a, Kohhranin Kristian chhungkaw din pawimawhzia kum tam a lo âu chhuahpui tawh a, chhungkaw tam takin a ṭhatzia leh hlawkzia an hria a, chungkaw hlim tak an din mek laiin, Mosia'n Thlalera Dar rul a khai kân en duh lote chhungkua an thi zel ang maiin, Kristian chhungkaw din tum lo va. Sum hma chhuântute chuan, an chhungkua leh mi dangte chhungkuaah ṭah leh ha ṭhialna an tuartir mek a nih hi. Tu nge dik a? Dik lo zawk tih pawh mipuiin kan hre thei lo va, a buai nuaih a, a chiri nuaih a, keini ang mahni thawh theih tawk, kawla ni chhuak chhiara thawk tlauh tlauh ṭhinte tân zawng, lo hriat chian tum buai ve chiam nân hun kan nei lo ve, kan ṭan lam zawngte thlavang kan hauh natzia hi kan inbihchian a ngai, ringtu nunah chuan mite an dâm kan duh chuan kan nat a ngai si a.

Thu dik chuan thiam loh chang mah se, lan chhuah hun a nei tho tho a, dik lo zawk ni reng si a, thiam chân tum tlat Pathian mi an awm ngai lo, mihausa ber pawh vuiliamin an awm a, mi chak ber pawh thlankhur thuk tak a pumpelh thei bik lo. Ram zau tak neiin, In ṭha tak neiin, i duh duh i ei in thei a ni mahnâ, chhungkaw hlimna erawh i lei thei ngai lo vang. A thar kan nei a, a aia thar kan duh leh ṭhin, he thinlung a tawk ta e, tih nei lo hian Kristaah chauh muanna leh tawk chin a nei ṭhin. Tuna kan ram dinhmuna hian tu mah kan lung a awiin ka ring lo, bul ṭan nân khua a la tlai lo va, Mizo hnam inlungrual kan ni lo'm ni? Hawh u, tlawmna nun nên bul i ṭan ṭha leh ang hmiang. Bawhchhiatna fahrinte hringnuna thil ropui tak mai chu, Pathianin kan tihsual aṭanga ding chhuak tûr leh, hma lam pan thei tura HUN duhawm min la pe hi a ni.

Kan nulate pawhin hmel lang leh lang lo, video-a sum zawng lovin, kristian chhungkua din duhna neiin mahni thawhchhuah ngei hmangin bul ṭan tawh rawh se.

He khawvelah hian kan dam hlen dawn lo. I hmelṭhatnate a la chuai ang a, in hma lam hun hi a êng viau lo a nia aw. Kan kohhran ṭheuhah hian Kohhran hian a tih tûr chu a ti a ni, mipuite hian kawng dik hre siin, kawng dik lo lam kan zawh lui tlat a, chu chuan buaina leh harsatna min thlên a, Social media-a rak tam a piang hi mi dik an ni lo, tih hi kan hre ching tawk tawh e. Mi tin mahni hnaah kan buai tawh a, chu tih lai karah tual thihna thu hriat reng mai hi zawng, kristian rama thleng atân chuan a inhmeh lo em mai. Kan nunah hian mi dangte dah pawimawhna kan neih a ngai a, kan kê pen tin mai hi fimkhur a va ngai tak em. Nang leh kei hian kan ram leh hnam tân hian tih tûr chu kan nei a ni, hei lo hi ram dang kan nei lo va, hei lei lung lo hi lu nghahna kan nei hek lo. Mizo takin dam ila, tun ang zela kan khawsak chuan e, ṭhang leh tharte nun kawng tûr hi ngaihtuah ngam pawh a ni lo ve, kan Nu leh Pa ten kawng dik zawh tura rahbi min tuksak hi zawh pial lo tûrin kan nun ṭheuh i vawng him zel ang u.

Hlun lo tûr rama chêngin, dam hlen tûr ang maiin, duhâmnain ka ṭânghma ka hâi a. Ka ṭhiante sahrang ka hmu lian a, mahse, ka chana lâwmna rêng ka nei chuang si lo. Bawhchhiatna fahrin te nun hian tlâkchham a nei reng mai zawng a nih hi.

- Zothansanga, Chhiahtlang Kawn Veng, 9612333536