Ngaihthlâk

Chanchin Ṭha Luka 10:41-42 kan en chuan, thil tam tak a ngaihtuah avanga Marthi buai thu leh Isua’n a zilhhauna thu kan hmu a. Thil pakhat chauh pawimawh a hrilh bawk, chu chu amah leh a kianga awm a, a rawngbâwl a, a thu ngaihthlak hi a ni.

Mari chu Lal Isua ke bulah a ṭhu a, a thusawi a ngaithla a; Isua a hnaih bik hle. Hetih lai hian, Marthi erawh chu hah taka rawngbâwlin, a buai hle thung. Chuvangin, a thinlungah thîkna a lo piang a, Isua hnenah a zualko ve ta a ni. Mahse, Isua chuan, “Marthi, Marthi, thil tam tak i ngaihtuah a, i buai a nih hi: thil pakhat chauh a pawimawh e; Mari’n chan ṭha chu a thlang a, chu chu lâksak tur a ni lo ve,” a ti ta zawk a nih kha!

Isua hian a kianga awm a, a thu ngaithla a, uluk taka dawngsawngtute chu a lawm ve deuh pawh a ni ang. Hretu, hriatpuitu a mamawh pawh a ni ve thei a. Ngaihthla a, hretu dik nih hi rawngbawlna pawimawh tak a ni tih min hriattir a duh pawh a ni thei bawk ang.

Isua chuan ngaihthlak hi rawngbâwlna tlingah a lo pawm reng a. Luka 10:25-11:13 inkar thute hi Isua’n zirtir nihna chungchang a sawina a ni a. Chuti anga rawngbawl a zirtir laia chan ṭha tih meuha a sawi chu ngaihthlak hi a ni. Rawngbawlna hlu tak leh ṭangkai, hlawkthlâk leh malsawm dawnna pawimawh tak a lo ni reng mai! Pathian aw hi a kianga mite lo chuan an hre phâk/thei ngai lo.

Rawngbawla kan hmanhlelh em em lai leh, ṭhahnemngai taka kan theihna zawng zawng nena buai taka hun kan hman mek lai hian, a rawng kan bâwl, Pathian hi kan ngaihchân leh fo a ngai a, min duhna leh min hruai a tum dan te kan hriat thar fo theih nan a aw hre tura kan insiamrem ve leh ṭhin a ngai bawk. Chuti ang chuan, pâwlna thar changin, thlarau thara rawngbawlna kan ṭan ṭha leh thei ṭhin dawn a ni.

‘Sawi’ aia ‘ngaihthlâk’ a tam chinah mihringte hian puitlin lam kan pan a ni, an ti ṭhin a. Zirtir nihna kawngah pawh hian mi puitling, rawngbawlna puitling zawk nei thei turin ngaithlatu kan nih ve ṭhin a ngai. Pathian aw hriat hi rawngbawlna hlawkthlak tak a ni reng bawk!

- H.Lalroluahpuia