MOTOR KHU – POLLUTION

January 27, 2026 khan Lunglei panin ka motor, Creta-in kan kal a. Serchhip daiah Enforcement lama thawk mi pahnihin min tiding a. “Pollution Certificate i motor-in a neih loh avangin Rs 10,000/ chawi tur i ni a, mahse kan khawngaih ang che,” an ti a. Tichuan a tlem thei ang ber Rs 2000 ka chawi ta a. Min khawngaih avangin ka lawm a; an duty an tihṭhat avangin heng mite hi fak an phu.

Ka motor hi kum khat leh ni 15 chauhva upa, Km 2819 chauh la tlan a ni a. Ka motor hian boruak chhia siam se, environment lamah mi dang tan harsatna siam se zawng, chawi tur an tih zat zat chawi mai tur ka ni. Hrem leh pawisa tam tak chawitir ka nihna chhan chu ka motor-in boruak chhia a siam vang ni lovin, “Boruak chhia a siam lo,” tih Lehkha (Certificate) neih loh vang chauh a ni a. A tha natthlak deuh em aw ka ti a. Tin, mi dang ka ngaihtuah tel bawk a ni.

Sorkar Dan siam MV Act 1988 section 190(2)-ah chuan heti hian a inziak a: “Any person who drives or allows to be driven, in any public place a motor vehicle, which violates the standards prescribed in relation to road safety, control of noise and air pollution, shall be punishable with imprisonment up to 3 months or with fine up to Rs 10000/ or both,” tih a ni a. Sorkarin he dan a kalpui danah chuan motor reng reng kum khat a tlin dek dek tawh chuan Km 5 chauh pawh tlan raw sek sek “boruak chhia a siam lo” tih Lehkha a neih loh chuan motor neitu chu thla 3 tantir emaw, Rs 2000 aṭanga Rs10000 thleng chawitir tur a ni.

He Dan kan sawi mek hi India ram leh Mizoram tan ngei pawh Dan ṭha a ni. Aizawl khawpuia motor ṭhenkhat khu dum ngiai nguai chhuah chunga tlante chungah te hian hman ni se aw! Delhi khawpui boruak chhe lutuk tana thil ṭha hi Mizoram, boruak thianghlim tak nei tan a ṭha ve lem lo thei. Sorkar Laipui Dan leh thuchhuah hi a nih ang anga pawma hman ve ngawt hi State ṭhenkhat tan hian a ṭha ber lem lo.

He dan, MV Act 1988 section 190(2) tuna kan kalpui dan hi chuan mipuiah harsatna namen lo a thlen bakah, pawisa tam tak kan chawi fo dawn emaw a ni ringawt a. Kan motor-in “boruak chhia a siam lo” tih Lehkha la turin ni khat nileng patlingin hun sen a ngai a. Ni khat tha a uiawm lutuk. Vai ram anga boruak chhia nei ve tawh ni ila sawi buai thu a awm lo.

Sawi ve ta mai mai ila, ka pension hma kum 2023 khan Home Ministry in Dan thar a siam, BNSS section 176 dungzuiin Mobile Forensic motor India ram District tinah awm se a duh a. An duh dan chuan Europe ram ho hman ang motor laihawl a hnung lama Laboratory awm a ni a. Pawisa pawh Rs 65.00 Lacs thleng motor pakhatah an sanction thei a. An duh ang motor lian fu, sei zet hi kan ram ang tlangram, kawng te tak te te atan crime scene-ah a hman theih loh tiin ka ṭang tlat a. Harsa ti deuh mah se kan Plan angin motor pakhat Rs 46.0 lac zelin Scorpio min pawmpui ve mai. Anni aiin kan State mamawh kan hre zawk kan ti ve tlat a ni.

India ram hi a zau va, kan dinhmun a inan loh avang hian Sorkarin Dan a siam tam tak hi State Sorkar-in anmahni State mila a siamrem, Amend phal a, entirnan CrPC te IPC te pawh. Chutiangin MV Act 1988 pawh hi kan ram milin kan siamrem, Amend thei tho a ni.

MV Act 1988 section 190(2) kan ram bika kalpui danah rawtna ka han siam dawn teh ang. Mi mal motor leh two wheeler Kum 5 chung lamah emaw, Km 50000 tlan chinah emaw, he Dan hi hman ni se. Tin, Sumo/Bus/Motor lian kum 2 chung lamah emaw, Km 80,000 ah he dan hi hman ni se. Tin Taxi tan kum 3 chung lam emaw, Km 50000 emaw ah he Dan hi hman ni se. Tuna kan hman dan ang chuan mi tam tak tana harsatna siamtu Dan a ang mai dawn.

- H. Sangchungnunga