Kawng ṭha kan nei ṭan, kan lawm e
Mizoram hmun hrang hrangah sorkar hmalaknain kawngpui siam ṭhat hna thawh a ni a, a lawmawm takzet. Kawng ṭha hi Mizoram tan hmasawna a ni a, a chengte tan a hlu a, sorkar lai pawhin mipui ngainat an hlawh phah sawt ang.
Vanglaini, January 30, Zirtawpni chhuakah khan PWD minister Vanlalhlana chuan, "Sorkarin kawngpui siamna tura sum a pekte chu a nih dan tur ang taka hman a nih avangin sorkar sum daihzai zawka hman a ni," tiin a sawi a, khawpui chhung kawng thlirin PWD Minister thusawi hi a dik ngeiah a ngaih theih.
Leitan-Sihphir kawng siam zawh rualin Zuangtui leh Selesih inkar kawng siam ṭan nghal a nih tur thu tarlan a ni bawk. Hei hi Durtlang leh a chhehvela chengte tan chanchin lawmawm a tling ang.
Fur kan thleng leh ṭep a, Durtlang kawng chho hi chu engtik lai pawha min thei reng a nih avangin a panna kawng ṭha dang hi a pawimawh takzet. Zuangtui leh Selesih kawng a ṭhat hi chuan Durtlang leh Leitan bakah Sihphir mipui thlengin an hlawkpui thei dawn.
Dutlangah Synod Hospital, Govt Zirtiri Residential Science College, ICFAI leh ATC bakah hmun pawimawh ṭhahnem tak a awm a, kal pawhna kawng a ṭhat loh chuan a nghawng hi a lian tham tawh hle. Sorkarin fur huna harsatna awm thei su kianga kawng an siam ṭha hi a lawmawm hle.
Sorkarin Durtlang kawng chauh siam loin Aizawl hmun hrang hrang kawng a siam ṭha a, khawpui kawng tam zawk chu a mam ṭha ta hle. Tun ang zela kawng hi an siam chhoh phei chuan thla hnih ral hnuah Aizawl kawng ṭhat ber hun kan thleng thei hial ang.
Hetah chiah hian mipui kan pawimawh dawn a, uluk taka kan enkawl a ṭul dawn. Veng ṭhenkhatah chuan thla khat em pawh a la ral hmain pipe phumna tura lai chhe tawk an awm a, siam ṭhat leh mai a har avangin hetianga kawng lai chhe tawk an lo awm hi a pawi takzet.
Kawng siam zawh hian kawngah balu nawi te a awm ṭhin a, lirthei tan chetsual a hlauhawm. Mizoram State Road Safety Council (MSRSC) bul tumin February thla aṭangin Road Safety Month hman ṭan ni a, hman dan tura tarlan loh han belh hram teh ang. Mahni in bul kawng ṭheuh hi phiat fai ṭha ila, hei hian nasa takin chesual a veng thei ang a, kawng a ṭha rei bawk ang.
Sorkar hian kawng bakah side drain lam pawh a ngaihtuah tel niin a lang a, chutihrualin Mizoram sum dinhmun enin a ti ṭha vek seng dawn lo tih erawh a chiang. Hetah tak hian LC leh YMA te an pawimawh dawn a, mahni veng ṭheuh side drain tih fai leh siam ṭhat hi chu mahni tan ṭheuh a ni hriain khawtlanga tihfai/siamṭhat theih hi a pawimawh hle.
- Lalhriatzela