KA MITHMUL LEM!

Kar hmasa lamah khan Krismas laia lan mawi ve deuh beiseiin, Mapuii Beauty Studio ah kan kal a. Kan tum sa reng eng engemaw kan tihtir hnu chuan nula pakhat in mithmul (eyelash) lem a lo vuah tir mek chu ka en a, a mitmeng a tilang nalhin a hmel a that phah riau niin ka hmu a. Ka’n zawt vel a, anni lah an lo phurin ka mithmul chu a lem hmanga chei ve kan rawt thlu ta anih chu!

Engemaw lai aṭang khan hmeichhe incheina, hnawih neuh neuh bâkah hian mithmul lem vuah hi a lar chho phian rèng kha a ni a. Kei ngei pawh hi ṭumkhat chu, MZU-a Miss kan thlan dawnin endiktu zinga ka tel ve dawn avang khan ka hmai te min chei sakin, _Mithmul Lem_ ngei pawh chu min vuah sak ve tawh ngei a. Khami ṭuma mi kha chu a lem dan kha a lem chiangin a sei bawk si, ka khap suau suau mai a, hnawk ka ti angreng phian a, in ka thlen veleh ka pawtthla a, ka hahdam huai nghe nghe!

Tun ṭuma ka mithmul lem vuah hi chu a mal te tea uluk taka vuah a ni a, a sei suau lem lo bawk nen, ka men pawh a tibuai nasa lova, ka meng mawi sawt niin ka inhre bawk a ka 'confi' zaih mai!

Kan hawng ta a. Ka pasalin Scooterin min phur a, a hnungah dan pangngaiin mipa ṭhutin ka ṭhu a, kan tlan ta alawm le… mithmul lem tih takah thli thawah chuan a phu ta siau siau mai a, a thlawn mai dawn ni te khan ka hria a, ka tarmit lachhuakin ka vuah ta nghe nghe a, a him deuh beiseiin...

Ka mithmul lem chu darkar 24 chhung tihhuh loh tur tih chiang takin min hrilh a, chumi hnuah chuan enkawl hranpa a ngai lo an ti bawk a. Kei, hmaiphih pawha mit vel tui nena nuai nawk nawk thin tan chuan, darkar 24 rei ber ṭum a ni hial awm e.

Chu darkar 24 chu tunah hian ni 8 zetin a pel ta a, nidanga ka hmaiphih leh ka mit nuai ang khan ka la phihin ka la nuai ngam mang hauh lo mai a, ke pahnih nei lirtheia ka chuan pawhin a la bu siau siau tih hi zep ka tum lem lo!

He ka thil tawn mek hian ‘a lem’ leh ‘a tak’ danglamna engtin emaw tak min zirtir (leh pek) anih chu!

Mi tak bula awm hi a hahdam thlakin, venthawn ngai lo bula awm hi a thawven thlak zia ka hrechhuak a. Engemawti hleka thil danglamin a chhem a phu nghal dual thei milem bula khawsak chu fimkhur kim a har ṭhin tihte ka ngaihtuah thlen phah bawk a. Ka mithmul, ka pianpui, Pathian min pek ngei mai aia mawipui tura ka inngaih *Mithmul Lem* chu ka zalenna hloh ṭhenna a lo ni reng mai a lo ni. Ka duhtawka hmai phiha tui nena mit nuai theia ka zalenna chu a lem hmangin ka kut ka inphuar a. Thli eng anga nasa pawhin chhem mahsela tla hauh lo tur ka mithmul chu, hlauhthawnna nena enkawl ngai, ‘a lem’ in ka’n chei belh chu a ni si a!

Kan neih sa aia tha zawk nia kan ngaiha kan awh hi, kan tana harsatna thlentu a ni thei tih ngaihtuah lova zawng ruai ruai ṭhin te hian, ‘a lem' hian min phatsan hun a nei ṭhin tih hriat a va ngai tehlul em… Zia leh nungchangah te hian a lem na na na chuan a tak hi a tluk thei ngai dawn lova, mawia langin a tir lamah duhawm viau mah se a tlo lo zawk a ni fo ang a, chhemtu thli a lo thawtin a bul nghet lo ta chu a nghing awlsam hle mai ṭhin dawn a lo ni.

Kan hnathawhnaah te, thian zingah te leh Pathian leh ram rawng kan bawlnaah te pawh hian, tute hi nge kan tana ‘a tak’ ni a, tute nge ‘a lem’ tih hi hriat a har khawp mai. Ka mithmul lem atanga ka ngaihtuah tak chu, ‘a lem’ hi chuan hun harsa a lo thlen a, thli a lo thawta a lo tleh hunah, nghet taka min dinpui lovin min nghin sanin min thlawn san thei mai dawn a lo ni tih hi a ni a. Ka menmawi pui (ni a ka hriat) ka mithmul lem pawh hi, ka duh anga zalena ka awm theih loh phah fo dawn ai chuan ka la thla leh vek mai dawn em ni aw…. tiin ka rilruin ka vau nasa mai anih hi.

Ka tan a hnawka, ka mawipui aia ka harsatna a thlen tam zawk anih chuan, ka duh hunah ka pawtthla thei hi, tlèma ka inhnemna chu a ni a. Harsa leh hrehawm deuh pawh, lan mawina tur a niha tuar ka huam anih erawh chuan, a maha a thlawn hun ka nghak mai ang chu!

Mithmul mai mai, chupawh a lem a ni tih hriaa ka vuah chungah na na na chuan thu ka nei ve tlat a.

Min bum tum rana kan laka lemchang an awm anih erawh chuan, kan hriat lawk theih miau loh avangin, kan duh hun leh kan duh anga kan hnawla kan thlawn mai theih an ni ve lo thung hi, hringnun ti chingchiveta tihrehawmtu a ni fo mai. Kan khawvel, a lem leh a tak inawmpawlhna hmun, a tak aia a lem a itawm zawk fonaah hian a tak aia a lem kan thlan sual avanga mimal, chhungkua, khawtlang, kohhran leh sawrkarin a tawrhna hi a tam tawh awm asin.

A tak tehna hranpa leh a lem chhuichhuahna khawl awm thei lo kan mihring ziaah hian, keimahni mimal theuh hian ‘a tak’ hi lantir ṭheuh ta zawk ila, chu ‘a tak’ chu midang tana hnawksaklo ni bawk ta sela, kan buaina tam ber hi a bo duak mai dawn a lo ni.

Mahse…. chu duhthusam chu keini Chhura thlahte hian, “Naa chu ni se…” tiin, kan kawih kur sa pawh kan thlah leh mai ṭhin a lo ni e.

- Dikteii Hnamte