Hawng 400 aia hlauhawm zawk hawng khat vawrhtute

A hmasa berah chuan kan Sorkar ka han fak mawlh mawlh duh a. September ni 1, 2025 atanga Mizoram Police hotu IGP ho meuha Survey nei hmasa a tih takzeta Ruihhlo kan rama lo lut man tur leh lo dangchat tura hmalakna lian tak mai a kalpui hian nasa takin rah tha a rawn chhuah a. Ruihhlo tamtak man a ni leh ta, ti a nitin deuhthaw News hrang hranga kan ngaihthlak thin kha a tlem ta hle mai a. Mizoram mipuite hian a hlut zia kan man phallo ang tih a hlauhawm rum rum mai.

Kan thupuiah han lut dawn ila. Mizoramah hian ruihhlo min tibuaitu lian ber Heroin No.4 kan tih hian lo luh chhan chi hnih a nei a. Pakhatna chu a siamna hmunpui Golden Triangle kan tih mai Myanmar, Thailand leh Laos atanga khawthlang ram hrang hrang a kal zelna kawng kan nih vang a ni a. A pahnihna ah chuan Mizoram chhung ngeia ngawlveite tan leh ngawlvei leh zel tur te tan a lo lut a ni.

Champhaiah kum 9 ngawt Mizoram Police hnuaia ka thawh chhung khan Heroin ngawlvei tamtak kan buaipui a. A then jailah kan dah laiin a then kan zilhhau a, Addict Centre-ah te kan dah bawk a. Mahse thil pakhat chiang deuha ka hmuh chhuah chu, Heroin No.4 hi a sim hlen theihloh, tih hi a ni. Champhai paho titi in fate Heroin addict an awm chuan a tih dan awm chhun chu ‘Vuakhlum’ a ni mai e, tia beidawng taka an sawi hian a ti chiang ber awm e. Heroin addict 1000 rual teh meuh kha zan reiah rukruk tur zawngin an phe suau suau mai a. Eirawngbawlna gas, a bur neih chuan lak tawp theih tih hunlai phei kha chuan zan khatah bur 5 tawp in hrang hrang atanga rukbo report te kan dawng thin. Chhun lamah an thil ruk hralhin Heroin an lei a , in jectionin khawimaw kawmkarah an mu bo leh mai thin a ni. Champhai leh a chhehvel khaw hrang hrang atangin an addict-te hi an rawn fuankhawm a ni ber mai thin a, thilbo hi a tam em em ringawt mai a ni.

Kum 2016 khan Champhai Police Station-ah indaihlohna vangin officer-in-charge in min awmtir ve a. Champhai khawchhung hmun lunlai bera kan neih C.Denga Colony kan tih maiah khan Heroin No.4 zuar (Vawrh) hi zuzuar standing kan tih mai ang hi an awm thin a. Police tan a mualpho thlak ka tih em avangin kan thawhpui tenen kan han man tak tak a. Engemaw chen kha chu an reh ta duak nghe nghe a. Mahse harsatna lian tak kan nei ta a. Heroin No.4 vawrh tute hian dan (ND&PS Act) an hrechiang em em mai a. A tamtham sahbawn bawma dah ‘Hawng’ kan tih chin kha chu an keng duh reng reng lova. Tlem te tein Penicillin vial ah te, chhin sen kan tih mai Syringe chhinna angah te khan an pack vek a, an zuar ta thin a ni. ND&PS act ah chuan khatianga tlem tham kha chu small quantity a ni a, a hremna na ber pawh kum khat chhung jail tan a nia (Hremna nalo ber chu ni khat chauh tan pawh a ni thei, Magistate thu thu a ni), Bailable a la ni lehnghal a. Kan Magistrate te an fel hlauha bail lova kan thawn luh te pawh Jail lamah an lo judicial hlauh thin zawk a.

Kha Heroin no.4 small amount kan tih gram 5 tlinglo leh a hremna na lo ,bailable ni bawk si khan pawi a khawih theih chu a lian leh em em lawi si. Penicillin vial khat ringawt pawh khan Drug addict thar mi 4/5 lai a siam thei tlat si a ni. No.4 hi vawi hnih tichhin chu an addict tlangpui tawh a. Tun hma in KTP hruaitu a lo ni tawh thin tihte khan awmzia reng reng a nei lova, Biakin rawktu ahte an tang ta zawk hlauh thin a ni. Mizorama ruihhlo ngai addict kan neih zawng zawng hi small amount tih chhin vanga addict lo nita an ni . A thehdarhtu te lahin a tamtham thukru-in small amount bak an keng duh der silo kha beidawn rum rum na tham a ni thin.

Tunah phei chuan Heroin No.4 hian hlauh ang ngei ngeiin Aizawl leh khawpui dang dang pawh a fan hneh ta hle mai a. A hnawksak ber mai ‘Vawrh’ kan tihte hi hun rei zawk dahbo theihna dan hi kan mamawh ngawih ngawih a ni ta a. Kan dan siamtu Legislator te hian ngun taka an zirchiana kan ram mila ND&PS act hi an siamrem deuh chu a van ngai em aw ka ti vawng vawng thin .

Awle, kan thupui ah hian kan chiang viau tawh awm e. Heroin No.4 leh Methamphetamine tamtham, ramdang pan zel tur buaipuia hlawkna um te hi chuan anmahni leh an tu leh fate tan anchhia leh vanduaina an dawng turah ngai ta ila. Mahse a mizopui ngei ruihhlo ngaia siamtu a ‘Vawrh’ kan tihte leh a supply tute hian kan ram chu an tichhe nasa em em a. Kan chhungkua, khawtlang leh ram hmasawn theihna tur atana theihpatawp chhuah tur thalai tamtak mi pangailo mai nilo, rukhmang, chhungkua ei kawrawka kan khawtlang tana mihnawksak nita tamtak siamtu an nih vang hian kan ram hmelma lian ber an ni kan ti thei hial awm e.

- Dza Ralte