SAWHTHING LEI LEH ANG AW... (February ni 2 aṭangin sawhthing lei ṭan a ni ang)

Tun sorkar chuan a lo intiam tawh ang ngeiin nikum aṭang khan sawhthing a lei ta a, Pu Lalduhoma'n hun rei tak a lo vahvaihpui tawh chu a takin a thleng mêk a ni. He thilthar hian thingtlang kuthnathawktute beiseina a neihtir a, an táivawn ip pawh a puar phah bawk.

Thawh khatna:

A thawh khatna chu nikum lamah puitlin a ni tawh a, sawhthing leina man zawng zawng pawh sorkarin nikum November ni 27 khan Agriculture Minister Pu PC Vanlalruata'n pêk tlak a nih thu a sawi.

Nikum khan sorkarin sawhthing kg. 3,38,35,182 (quintal 3,38,351.82) a lei a, a man atan cheng vaibelchhe 137.72 a sêng a ni.

Thawh hnihna:

Kumin February ni 2 aṭang hian Mizoram sorkar chuan kuthnathawktute thar sawhthing a lei ṭan leh dawn ta a. District Agriculture Marketing Committees

(DAMCs) kaltlangin lei a nih tur thu state agriculture and farmers’ welfare department thuneituten an sawi.

Maximum Support Price (MSP) Kg-ah Rs 50 zêl a ni leh ang. He ruahmanna hi nikum December thla khan Mizoram Agricultural Marketing Board (MAMB), Chief Minister Pu Lalduhoma chair-na hnuaiah rel fel vek tawh a ni.

Sawhthing Society:

Nikum lama sawhthing leina kawnga fel tawk lo, la thiam tawk lohna te kuminah erawh siamṭhat a ni dawn a. Tunah hian Mizoram pumah Secondary Collection Centres (SCCs) 65 ruahman a ni.

SCCs a sawhthing hralh turte hi Registered Sawhthing (ginger) Cooperative Society member an ni tur a ni a, hei hian sawhthing lei leh lei tura petute chhinchhiah a ti awlsam dawn a ni. Registered Society member te chauhin SCC-ah hian sawhthing an hralh ang.

Sawhthing sawngbawlna:

Sawhthing thar chhuah a ṭhahnem deuh deuh dawn a, hei vang hian sawrkar lam pawhin a sawngbawlna a ngaihtuah zêl a. Kuminah hian tualchhuak sawhthing zaina leh tih rona hi collection centre-ah dah tum a ni.

Mizoram Agricultural Marketing Board hnuaia Handholding Scheme hnuaiah Ginger Processing Unit, Sairang Horticulture Centre-ah siam a ni a, Chief Minister-in a hawng tawh nghe nghe.

Tlipna:

Kuthnathawktute chhawr tur hmasawnna hi a tuma tum chuan a takin a thleng thei a ni tih tun sorkarah hian kan hmu mêk a ni.

Sawhthing hi a lian thama kan sawi a ni rih mai a, a nihna takah chuan hmunphiah te hlei hlei hi hlawkpuitu an ṭhahnem em em bawk. A 'grade' a thliar a ni tawh dawn lo a, kumin aṭang chuan hmunphiah hi kg. 1 cheng 80-a lei a ni dawn tawh bawk.

NITI Aayog-in 'stakeholders' consultation on Mizoram ginger' New Delhi-a nikum November ni 24-a a neih ṭum khan Mizoram chu 'Ginger Capital of India'-ah a puang a ni.

~ Zoa Tlau, Buannel Cabin