THAWHRIMNA HI A HLU

Thawhrimna hlutzia chu kan hre tlangpui ṭheuh a, mahse, tam tak hi chu kan thawkrim peih lem hlei lo va. Tun hma ai khan sum leh pai mamawhna leh duhna hi a nasa ta niin a lang. Hmanlaite kha chuan pawisa nei em em lo pawhin anmahniin huan leh lo an nei a, an ni tin eikhawp an thar chhuah kha chuan an duh tawk viau ṭhin. Nawmsakna leh nawmchenna lam pawh kha an thlir em emin a lang lo. Tunlai hunah erawh in leh lo leh silhfen leh ei in tur piah lamah mamawh leh ṭul tih hi kan ngah ta khawp mai. Ei leh in tur lah a tam ta, pawisa neih chuan ei tur tui tak tak khawvel ram danga an ei ang pawh lei tur a awm zel tawh mai.

Silhfen lah a tam ta a, lirthei phei chu a maka maka tam kan ramah pawh a awm tawh a ni. Kan naupan ve lai, lirthei la tam vak hma tea kea kan kalna te kha kan en let hian, tunlai angah chuan ka kal peih hauh tawh lo mai; a hun lai khan hrehawm pawh kan ti lem lo. Tuikual mawng lam aṭangtein Bazar Bungkawn (Dawrpui)-ah te kea step chho taka kal te kha hahthlak pawh kan ti ngai lo. Hmawmsawm lah kha a la tlem khawp, vai bujia lian pui pui leh S chhang leh chhangthawpte kha kan chhun hmeh chu a ni mai ṭhin. Mahse, kan hrisel zawk daih a, natna em em kan neih ngai pawh ka hre lem lo.

Tunlaiah chuan ei tur chi hrang hrang, ṭha awm tak tak, tui deuh deuh kan ngah tawh a. Damdawi inenkawlna lam lah a changkang tawh rual hian kan hrisel lo ta em em a, natna leh thihna lah a tam ta viau mai bawk a nih hi. Tun hmaa kan la hriat ngai mang loh, taksa natna pawh tih tawh nâk alaiin, rilru lam natna lah a pung nasa a, mahni intihhlum te chu thihna tlanglawnah kan ngai lek lek tawh zawk a ni. Hahdam lutuk te, ei tui lutukte hi Pathian thu hian a lo remti mang hauh lo mai a, Pathian hian kan hriselna tur leh kan hlimna tur hi engkim min lo ruahmansak a, mahse, thu hi kan awih duh lo miau a, natna leh thihna hi chu a pung tual tual dawn a ni.

Pathian rinna kawngah lah hian kan chhe tual tual emaw tih mai tur a ni a. Hmanlai chuan an hriat kha a tlem rualin, thuawih takin an zawm tawp mai a, an nun kha a entawntlak daih zawk emaw tih tur a ni. Tunlaiah chuan mi thiam pui pui, thusawi thiam fe fe kan ngah tawh a, camping, crusade, worship kan nei awl lo va, kan ṭhat phah chuang em em hlei lo va. Sualna lah a pung tual tual emaw, tih tur a ni a, Pathian thua tuihal leh buai fe fe lah an pung tual tual lawi si.

Pathian thu chuan “I kut thawh rim rah chu i ei dâwn si a; lâwm takin i awm ang a, thawvengin i awm bawk ang (Sam 128:2) a lo ti a. Thawhrim rah ei tur kan nih rual rual hian thawhkrim lova ei dan tur ngawt hi kan ngaihtuah a, Chu chuan kan ramah chhiatna a thlen nasa a, kan lungawi phah hek lo. Fate duat leh tihnawmsak kan intihhmuh a, fa sual kan ngah tual tual lawi si. Naupangte pawh hi duat poh leh an pawng tual tual a, duh an ngah tulh tulh mai. Fa duat vak mang lova kan ngaihte hian fa tha an nei duh phian.

Thawkrim lova neih dan kan zâwng hian kan nun a tichhia a, chhungkua, khawtlang leh rama a tibuai zawk. Hmanlaia kan mi hausa hmasa, Pu Hauva leh Pachhunga te pawh kha an hauhsak thut kan hre hran lo. Rim takin an thawk a, rei fe hnuah an hausa chauh a ni. Sumdawnnaah te hian hauhsak thutna tur a váng hle ang. Tunlai kan mi hausa tam tak hi chu kum hnih khatah an hausa em em mai ṭhin te hi belhchian a dâwl ngût ang em ka ti ṭhin. Fate hian nu leh pate hausa leh sum nei viaua min hriat hi chuan an rilru a hrisel duh lo hle.

Woodland neitupa Pu C Lalpeka chanchin ka hriat hian min hneh thin khawp mai. A tlangval lai chuan tlangval hrisel lem lo, khawsa ve nawk nawk, rethei ve tak a ni ṭhin. Evangelist mitdel pakhat kaihza vengin a kaihruai ṭhin a, chu mitdel thuhriltu kaihruaitu leh kaihza vengtu ber, a kalna a pianga zui chawt mai a ni. Tuna a rawn hausak tan dante hi a entawn tlak ka ti ṭhin. Stool chhetê siam aṭanga bul ṭanin, a thawkrimin a thawk hah em em ṭhin a. Chuta ṭanga tun hun khu a lo thlenga lo hausa ta a ni a. A hmaa cheng sangkhat vel hlawh ṭâwk ṭâwk ṭhin khan, tunah chuan a nuai telin a um zui tawh a nih khu.

Pu Jimmy Pachuau London-a awm mek, pa hausa leh hlawhtling ni a kan hriat ngei pawh khu – a tira a bul ṭan dan hautakzia leh London-a a awm hnu pawha thawhna mumal pawh nei lo va, mi lu meh tur zawng kual ringawta baihvai taka bul a lo ṭan dan leh tuna a hlawhtlin tak dante hi entawntlak a tling asin. Tunlai kan ṭhalaite hi chuan thawhrim hi an peih lo va, thawrimna pumpelh hram dan hi an zawng emaw tih tur a ni. Chu chuan kawng dik lovah hruaiin an nunah harsatna nasa tak a thlen ṭhin.

Rinawmna kan tlachham a, teirei kan peih lo bawk a, nawmsak kan duh a, inchei nalh kan duh bawk si a, kan nun kan tichhia tih reng kan inhre phal lo. Hnam dangte’n heti khawpa kan ramah mistiri, labour leh mutia aṭang ringawt pawha hlawhtlinna an hmuh theih chuan, kan ramah hian mi taima leh teirei peih tan chuan sum thawh chhuahna chu a chhe lem lo tih a lang.

Burkina Faso hruaitu Ibrahim Chaure vengtu rinawm tak kha fakawm ka ti khawp mai. Khawvel ram dang aṭangin Ibrahim Chaure a that thei a nih chuan dollar maktaduaih nga leh dam chhung khawsakna nuam thei ang ber an tawktarh chung pawh khan, khang zâwng zâwng kha a hnawl ngam tlat kha a ni. Cheng sangkhat lek pawha thlem thluk theih kan tam nen; Kristian pawh a ni lo lehnghal a nia.

Mahse, a rinawmna khuan hmingthatna leh chawimawina lallukhum chu a la hlawh ngei a rinawm a ni. Mi tam ber hi chuan chawimawina leh hmingṭhatna hi kan nghak peih lo a ni ber mai. Tuna neih nghal kan duh a, sum lak luhna thianghlim leh thianghlim lo pawh kan ngaihtuah duh lo va, kan hmingṭhatna kan hlauha kan nun kan tichhe ṭhin. Chinese thufing chuan, ‘Mi taima tan thil harsa a awm lo,’ a ti a. Ṭhalai zawkte hian taimakna, teirei peihnate hi kan uar deuh deuh a, rinawmna vawng nung renga kan ram, kan hnam leh khawtlang tungding tura kan beih sauh sauh hi a ṭul tak zet a ni. Thawhrimna nena hlawhtling tur a hma kan lak hi a pawimawh tulh tulh a. Thawkrim lo va, hauhsakna leh nawmsaknate hi sirah hnawl ngam ila; kan hnam nunphung siamṭha tur hian ṭhalai zawkte hian ke pen uar deuh deuh a ṭul tak zet tawh a ni.

- Reuben Lalnunthara Hnamte