TUTE NGE KAN HREK?

Kan tlin loh tûr leh kan tih loh tûr thu nên lam kanin tiam a, kum 38 ṭha zet mai, Congress leh MNF ten sawrkharna an invawn chhawk a. Khatih chhung zawng khan kan châkkhai lak luhna ber Silchar kawng kha eng tik fur lai mahin a ṭha ngai lo.

Tuna sawrkhar naupang takin a enkawl mek a. Kawng chhiat avangin Truck Owners Association ten nawrh an lo huaihawt ve bawk a. Anni an nawrh hian tute nge an hrêk? Oil man a sang a, ni tin mamawh man a to nghal a. A nuarate chhungkua ngei pawhin an tuar. Sorkhar mite tân harsatna lian a thlên lem lo; keini ang miretheite min hrêk a, sorkhar nawr nan kan lo tuar hlauh asin le.

Tuna sorkhar mekte tân hian he kawngpui hi siam ṭhatna hun pawh an la nei meuh loh, a tih theih awm e. Kum sawm tel tehmeuh lo Sorkhar tawhte pawhina an siam ṭhat zawh loh kha, opposition a ṭangin na tak takin demna thu an chhuah a, an la zak miah lo leh nghal a. Ngati nge, kawngpui, kan châkkhai lakna ber hi heti taka an ngaih pawimawh si chuan, an sorkhar chhung khan an siam mai loh? Kum thum hmel hmu ṭan ṭawk ṭawk sorkhar siam ṭha thei tûra an ngai hi, Congress leh MNF te hian ZPM sorkhar hi an lo va ring chak êm êm ve, tih hi ngaihtuah peihte chuan kan hre mai awm e.

Zorama hi zawng, vâna vântirhkohte meuh pawh hian hruai se la, kan sawisel tho tho ang. Phunchiar hnam, mahni dik tum si lo, mi dang dik tura phut tlat kan ni a. Thlir vel mah u la, eng pawl emaw a ding a, chu pawl hruaitute sawiselna tûr zawng ngar ngar ṭhin kan ni.

Hawh u, mite fel lohna aiin, an fel ve chhun leh an tih ṭhat ve te hi inhriatsak ila, a va Kristian zia dawn em. Nang leh kei hian a fawng vuan ve ila, eng ruai hi kan nih ka ring bik lo. Khawvela hnam tlem ber zingah chhiar hmaih miah lo tûr kan ni a, kan la lungrual lo êm êm mai te hi eng vang nge ni ang? A ṭha lam châan vek kan duh vang a ni.

Biakina kan nun dan leh kan sum lak luhna hmuna kan nun dan hi a inpersan mah mah lo maw?Bawhchhiatna fahrinte zingah hian uirenu deng hmasa thei kan awm lo ve. Kei pawh harsatnain a ensan ngai loh, mangannain a zui reng mai pawh hian tih sual leh dai sual chang ka va ngah tak em. Sumin min ko a, ropui duhnain kan khat a; chu ngei chuan kan thu tiama min dintir thei lo a ni hi.

Ram zau tak neiin, mi chak tak pawh ni ila, kan dam hlen dawn lo. Chak taka thuam ni mah ila, thlan khur thuk tak chu kan kal pêl thei dawn si lo. Kan tih theih taka tiin, mite hrêk theitu i ni thei e, nang pawh an la rawn hrêk ve ang che.

Kan kête hian min din zawhpui theih loh hun a lo la thleng ang a, kan kutte hian tha chak loh hun a la nei ang. Kan chak lai hian mite tân phurrit thlêntu mai ni lovin, mite phurrit chhawktu ni tûrin kan inbuatsaih thei a ni.

- Zothansanga, Chhiahtlang, Kawn Veng, Ph : 9612333536