THE BIBLE SAYS SO!

Krismas hun lai hian mahni nun ṭheuh lo inenfiah teh ang u. Zoramah na nâ nâ hi chuan Kristianna hi kan va la urhsun tak êm tih loh rual a ni lo. Vanram hi kan kai deuh vek lo'ng maw tih a awl. Mahse a khawtlanga kan buaipui ang hi chu kan nih erawh rin harsatna tak chu a ni tlat si. Engtin nge Bible hian a sawi tih hi bih chian a ngai a ni. I han inbih dawn teh ang aw!

(A). Krismas hi Missionary Day ropui ber a ni. Van Missionary chuan A Lalna ram van khawpui A rawn chhuahsan ta! Hmasang zawlnei pakhat chuan BC 700 vel daihah khan kan tana Naupang lo pian tur thu a lo sawi lawk a, "Kan tan Naupang a lo piang a... Remna Lal an ti dawn," a ti (Isaia 9:6). Lalram A rawn din dawn a, remna tak tak thlen hun tur a ni ang," a ti bawk (Isaia 9:7). Chu lalram chu hril darh zel turin A zirtirte leh Amah ringtu zawng zawngte, keiniho chenin, thu min pe a nih hi (Math 28:19).

Chuti chuan he krismas ni hi Lal Isua Missionary Day a nih avangin Chanchin Ṭha hril darh leh chhandamna la chang lotute ngaihsakna thar kan neih a va ṭûl êm! He rilru hi hre chang lova mahni hlimna leh tuina ringawt ûm kan nih chuan Krismas lo awmna chhan chu kan thinlungah a dai hle tawh tihna a ni ang.

Khawvel pum puia hriat hlawh tak Evangelist pakhat TL Osborn-a chuan, "Lalpa, kan krismas te hi min ngaidam ang che," tiin ṭawngṭaina thu a sawi zu nia. Hman lai Israel-te pawh khan inkhawmpui ropui an uar a, an hlimpui ngei mai. Mahse Pathian chuan A hawisan daih tawh a, an ṭawngṭaina pawh chhân A tum loh thu kan hmuh kha (Isaia 1:2-20). Krismas Ni hi Missionary Day ropui ber a ni a, Missionary rilru tel lova kan lâwm a nih chuan kan tisual nasa hle ang! Pathian lawm zawng a ni miah lo vang. Mahni lâwmna zawng lovin kan Pa Pathian duhzawng leh lawm zawng i zawng zawk ang u.

(B). Krismas chungchang thua Bible ṭawngkam rêng rêngah hian chhandamna thu chauh a ni ngai lova, Lal Isua "Lal Nihna" thu hi, a serh zinga a mei ang tia Mizo upate lo sawi angin, a tel ziah ṭhin. Chumi awmzia chu Lal Isua hi LAL A NIHNA TEL LO CHUAN CHHANDAMTU A NI THEI LO TIHNA A NI. Hei hi i hre mawlh ang u. Tun lai Zoram evangelist majority hi chuan "Chhandamna Made Easy" an hril ṭhin! Min chhandam tawh, khati khan chhandam i ni reng tawh" et cetera tiin Lal Isuan zirtir A koh dan zawng zawngte bara khawng lovin mi tam tak an hruai bo tawh a ni. Lal A nihna, i chunga thuneitu A nihna, i nun a puma neitu A niha A hnêna i pek loh chuan, Lal Isua hi i la ring lo tihna a ni, chhandam i la ni rih lo! Vântirhkoh khan berampute hnenah khan Chhandamtu chu Lal Krista A ni an tih kha (Luka 2:11). Lal Isua pian tur thu puangtu hmingthang ber pakhat Isaia chuan Lal A ni a tih mawlh mawlh bawk kha (Isaia 9:6,7). Peter chuan Juda hote hnênah chuan Lal Isua kha Lal leh Chhandamtu A nih a hrilh a nih kha (Tirh 5:31). Kan ram hian chhandamna thuchah kimchang hi hmaih nei lovin kan hril loh zel chuan he Pathian Thu hman dik lohna rah hi kan tuar chho zel ang. Chhandamtu A nihna hi Lal A nih avanga nei a ni tiin evangelical theologian hmingthang tak John Stott-an a tih hi i bengkhawn ang u. Krismas a kan lawm Isua hi A Lal nihna nen i nunah la lut la, Krismas i hmang tak meuh ang!

(3). Lal Isua lo piang hi khawvela thlarau lam lalram din tura lo piang a ni. Pianthar hi chu thlarau lam lalram (spiritual kingdom) a luhna chu a ni tiin Aman A sawi kha (John 3:3,5). Chu Lalram chu nangmahah khan a ding tawh em? Khawvel pumpui awha lalram lo ding tur hi (Math 9:28: Thup 11:15; 20:4) chu A lo kal leh hunah a ni ang. Chumia lut ve thei tur chuan tunah ngei hian chu thlarau lam lalramah chuan i luh a ngai alawm (John 3:3,5). Piangthar apiang chuan Lal Isua lalna hi nuam an ti a, an lâwm ṭhin. Piangthar ve lo, an nun Lal Isuan A Lalna nena A la luh chilh ve lohte erawh chuan Pathian thu thu aiin mahni thu thua awm hi nuam an ti zu nia! Eng vang nge ni? An nuna Setana'n ro a la rel avang a ni.

Krismas Niah hian Isua Krista chu ka Lal a ni tiin lawm takin aw i chhuah teh ang u.

-F.Lal Thanzuala, 9436141242