KRISTMAS TAK TAK

Lal Isua piang kha lawmpuitu mi tlemte chauh kan hria a nih kha, nimahsela, a lo pian avang erawh chuan khawvel a buai a, a kum rualpui eng emaw zatin an thih phah zawk kha hriatthiam a har asin! Eng nge a chhan ni ang le?

A hma kum 400 vel daih tawh khan he nausen lo piang tur hi hrilhlawk a ni a, a awm dan tur leh a thiltih tur engkim hrilhlawk a ni. Chutiang chuan ani chuan rawn tidik zel a, a hun tawp ber thlengin a zawm a. A lo pian hun laia khawvel buaina pawh chu thleng tur reng a ni a, a chhan chu van-mi a nih tlat vang a ni. Khawvela a hmangaihte’n nun an neih nan nun hlan turin a rawn kal a, natna an tawrh ai tuar turin amah a rawn inpe a, an thih aia thi turin a nun a rawn hlan ta a ni.

Lal Isua min hmangaihna hi teh phak rual a ni lo a, chhiar theih pawh a ni lo a, hriat thiam phak pawh a ni hek lo. Zir zawh sen a ni chuang lo a, a thuk em em a, a sang em em bawk a, a zau em em bawk a ni. Chu chu Thuthlung Hlui hun aṭang tawhin zawlneite'n min lo hrilh tawh a, fiah lo ruaiin kan hria a, a dam lai hunah famkim lo takin kan hria a, a thih meuh erawh chuan fiah takin kan lo hre ta a ni. Chumi hre fiah a, hre famkim tur erawh chuan thlaraua tihvar erawh kan mamawh thung.

Chumi hre lo chuan keini erawhin thawmhnaw thar neih kan tum a, kan theih ang angin mita mawi turin chei mawi kan uar bawk a nih hi. Chhungkaw tinin hlim taka hman kan tum a, naupangte lahin hun danga an tih ngai hauh lohin dawhthlak dawh ngei an lo tum bawk a. Kohhrante lah chuan vawi hnih nge vawi khat ruai kan ṭheh ang, tiin ruai ṭheh dan kan lo ngaihtuah a. Tlangval ṭhenkhatte lah chuan zu leh sa nena hman tumin a hma aṭangin an lo hmanhlel a, sumdawng mite lahin hemi hun atan hian an lo inla khawl bawk. Krismas tak tak hi kan ṭhelh deuh lawng maw?

Krista rilruah chuan nun nei lote’n nun an neih nan a theihna mai pawh ni loin, a nun hial rawn hlan a ngam a, a hlan reng bawk a. Chumi hre renga hlen ngei turin chuan Mari chhûl a rawn hmang a, Bethlehem bawng inah (a pianna hi bawng in chu a ni chiah lo nâin, bawng in angin kan ngai tawh si a) a rawn piang a; khawchhak lam aṭanga rawn kal mifingte pawhin an neih thil hlu an rawn hlan a nih kha.

Josepha fapa nih mai kha a ropui lo a, kan hriat rengna pawh a ni hek lo. A hmaa a tih tur hautak tak avang chuan chu nausen rawn piang chu a lawmawm a, lawm a phu a, thilpek hlu tak pek kha a phu hliah hliah a ni. Chumi hre reng chuan keini pawh hian he hun hi mi dang tan hmang ila, kohhrante ngei pawh hian ruai atan kan sum hi hmang lo hian khawi lai hmun emawa kan unau harsa tak tak zawkte tan sum leh pai hi hmang ta zawk ila. Chhungkaw tinte pawh hian mas thawmhnaw leh kan in cheimawina atana sum kan hman ṭhin hi keini aia harsa zawkte tan theh chhuak ta zawk ila a mas bik zawk lawng maw?

Krista an kan tum a, kan inzirtir bawk a. Hetiang hunah takte hian Krista rilru ang pu ila, Krista angin mi dang tan nun hmang ila, mahniin duhtawk ngah hnua mi dang tana inphal chauh ni loin, mahni tana kan tih kha mi dang tan hlan ta zawk ila. Kan sa ei ai te hi hlanin sa ei lo ngam ta zawk ila, Krista rilru ang pu kan ni zawk ngei ang. Chutah ngei chuan Krista chu a takin kan hre tawh ang a, khawvela a rawn kal chhan chu thlarau aṭanga hria ni mai loin, thinlung pawh ni loin, tisa ngeiin kan hre tawh ngei ang. Hmangaihna avanga a retheihna chu kan hre tawh ang a, Krista annaah kan ṭhang lian tawh zawk ngei ang.

Chu ngei chu a ni Kristmas tak tak chu.

- Mahmuaka Chhakchhuak