Kan minister-te ṭang zel teh se

Zep thu a cheng loa, ZPM-in sorkarna an han chan chhoha minister-te'n hma an han la ṭan kha chu, kan minister-te chu duhthu an sam lo hle. Beisei an phak hlawl lo ti ila kan sawisual awm lo e.

Kan minister zingah hian sorkarna fawng vuan lama tang an la awm loh bakah, MLA vawi khat nihna ringawt pawh paruk an awm a ni. Kan Chief Minister ber pawh MLA chu ni ngun mah se, eptu lamah hlir a la awm. Sorkar lama tel ve tawh anga ngaih theih chu PWD Minister hi a nimai a, ani pawh dy. speaker a ni. Hengte vang hi a nimahna, kan minister-te duhkhawp an nih lo em em.

Mah se, hun a kal deuh a, kan minister-te an inzir peih tih a hriat a, hma an sawn hlawm hle. An department-ah hmasawnna hmel hmuh tur a awm chho ta zel a, a lawmawm takzet. Han ṭang chho zel teh se. Chutihrualin, minister hmasawn tak tak an awm laiin, hmasawn lem lote pawh an awm tih ila kan sawisual awm lo e.

Sorkarna an chan hmaa minister a nih chuan mipuiin kan beisei san em emte hi hmasawn lo zingah a tel lo ti ila min sawisel an awm pawhin, sawi dik minti eng emaw zat an awm ngeiin ka ring. Minister zinga kan hmeichhe neih chhun hi a tir lamah chuan beisei pha lo ber zinga mi a niin a rinawm a, tunah erawh hmasawn ber a nih loh pawhin pahnihna chu a ni ngeiin a rinawm.

Kan Home Minister hi police lak, ruihhlo do leh kuhva tawlh do kawngah fak a phu takzetin ka hria. DP&AR lamah pawh a thawk tha viau. Chutihlaiin UD&PA lamah erawh a hnathawh lian tak han sawi tur a vang rih viau. Ruahmanna ṭha tak tak chu a nei niin ka hria mah se, hengte hi a hlawhtlin hma chuan fak UD&PA bikah chuan fak a har ka ti.

Kan Revenue leh Supply changtu hian a hna a tlin takzetin ka hri a, fak a phut. A bikin Revenue Department-ah phei chuan change nasa tak a thlen ti ila kan sawisual awm lo. Tourism Minister hi a hmathlir a thui viauin ka hria a, hetiang zela kan kal chuan kum 3/4 a liam chuan tourism hi kan sum lakluhna hnar lian tak a niin ka ring.

Sports Minister a nihna zawnah erawh mipui nawlpui tan chuan fak hluai a har deuh maithei. Infrastructure lam aiin a grassroot aṭanga sports chawikan a tum niin a lang. Hei hi a hlawhtlin chuan sports hmasawnna atan thil pawimawh tawpkhawk a ni. Hunin a la rawn hril chho anga, tun dinhmunah chuan fak emaw sel hun loah ngai rih ang.

Kan Chief Minister hi a ṭawng tam hret em aw tih loh rual a ni lo. A thusawi hi mipuiin nuih chanin kan chang mai ang tih a hlauhawm. A hnathawh kawngah erawh sel chiam emaw fak chiamna tur ka hre lem lo. A hotupa ber a ni a, a chetdan leh a thusawite hian nasa takin kum 2028 MLA inthlan hunah an party-ah nghawng a nei ang.

Hun dangah duh leh minister dangte chu han thlir leh ila. Minister ṭhenkhat hi chu fakna tur awm lem lo, selna tur pawh awm lem lo. Minister ve tawp an ni berin a lang.

- Lallianpuia