KRISMAS CHHUNG TIN TAN

Kum 2025 Lal pian hun champha pha lo herchhuak tur chu ni tlemte chauhvin min dai dan leh ta.

Kumtin khawvel ram hrang hranga Kristian ten he hun lo her chhuak tur nghakhlel taka kan lo hmuah leh chhungtinten chhungkaw kima hman kan thlakhlelh em em chhan hian ngaihtuah chian a va phu em.

Kum ral ta Krismas ni leh kum leh thar tur Krismas inkarah hian ni 300 chuang khawvel mihringte hian hun kan lo hmang thin a. Hetih chhung hian chhungkaw tam tak chu thihna avangte leh chhan dang dang avang te in chhungkaw kima Krismas hmang tawh ngai reng reng lo tur kan awm kumtin thin.

Chu kan hringnun chingchivet avang chuan Krismas hunte hi chhungkaw kima hmang thei chhungkaw tan hun rangkachak a nih laiin, chhungkaw tam tak tan erawh chhungkaw zinga kim ta lote ngaia nun khawhar a rum vawng vawng hun a ni lawi thin si.

Hla siamtuin, "Chhung kim dar ang len lai kha ngai zualin, ṭapin luaithlipui an nûl ngei ang" a lo ti mathlawn lo reng a. Hmun thenkhatah ve thung chuan, "Isu kan hnenah lo cheng rawh, zan tlai khuarei pawhin, lawmin tlaikhua min varpui rawh, i hming chawimawi turin," tiin zai an lo vawr dap dap bawk.

Ni e, he hun Kristiante tana hun rangkachak lo thleng hian chhungkaw tam tak tan inremna thlentu lo ni se. Nun kawng dai pelh vanga kumtluana chhungkaw zingah pawh khawsa mumal tawh lote tan kan nunhlui sirah hnawl a, min ngai a min thlahlel em emtu te, kan nu leh kan pa, kan u leh nau, chhungte lungngaihna thlentu ni lo va, hlimna thlentu ni tawh zawk turin,

"Chatuan Salem kawngkhar ropui chu kan tan a rawn hawng leh ta e,

Boralna rama leng tawh hnu kha vankhua min chantir a,

Lawmin i zai ang lal thar a piang ta,

Lei hi chatuan hla mawiin nghawr vel rawh se

tiin kan chhungkua a pang ber aṭanga nu leh pa ber thlengin chhungkua kan inzawnawlna hmun atan biak in leh a vel lo ni mawlh se, chhungkua kan va hlim dawn em.

Lei lalte’n amah do mah se la, mipuite zawng pawhin, “Kei chu ka lal duh ka lunglai hnemtu, hmun khawharah pawh ama’n min awmpui ang," ti chung zelin kumin Krismas chu chhung tinte’n hlim tlang taka kan hman theih nan duhsakna sang ber inhlan mawlh mawlh chungin Krismas chhung tin hlim takin le.

- Lawta Khiangte