A PHEL LEHLAM

Ṭum khat chu Pastor Laldanmawia Ralte-in dawhkân te a siam a, a chungah chuan darthlalang hmangin, rin ai takin a siam thiam roh va! Kei ta pek chuan a in chhunga a hun ṭhat hle hle lai chu ka en vung vung a, “Tlêmin a sawi deuh a nih hi,” ka ti ve ngawt a, min chhan dan erawh a zahthlak. Ani chuan, “Mistiri deuh lo chuan an hre miah lo asin,” ti chauhvin min chhâng. A rilru tak chuan a thilsiam sawiseltu kha min lawm vak ka ring lo va, mahse mi a chhânna chuan kei, thiam thil reng reng nei lo hi mawi takin sawi leh tur chuang nei lovin min siam a ni. Ṭawngkam mawi lo zawk a tam nen, a mawi zawk, a phel lehlam a hmang ta hlauh kha ka la hre reng.

Zawngfian phel an sawi ang lo takin mihring hian phel lehlam kan nei a, mite hnena lan chhuahtir kan duh zawk chu kan târ lang mai ṭhin. Mihringah chauh ni lo, engkim hian a thlirtu azirin phel lehlam a nei chiang a ni.

‘Frank’ taka thil sawi ṭhin, mi lang tlang taka insawi in hre ṭhin ngei ang a, anni hian an hmuh mawh deuh leh ṭha lo deuh nia an hriat chu zep buang bar lovin an sawi phawng mai ṭhin a; a dawngsawngtu tan erawh thil nuam em em a ni hran lo. Mahse mak deuh mai chu, anni hian ‘frank’ taka an nihna sawitu hi an lawm chuang der lo nia! Pawm thiam tak chu an awm tho na a.

Mi dang dik lohna na tak taka sawi a, chhuih zui a, ṭawngka nem pawh hman ṭul ti vak lo hriat rûk ka nei a, mahse a dik lohna miin an sawi a hre hlauh a nih zawngin chu mi chu mi sual ber chhuahin a chhuah lêt thung si. Mi ṭhenkhat chu mi an biak dan ang chiah hian be ve ta ngat ila ‘mawl’ min va ti dawn tak.

Hna thawkho ṭheuh ṭheuh pawh hi rilru a inang mawh viau zel a, kan thil thlir dan pawh a inan loh chang a tam. Dik kan tih a hran châng a awm a, mahse thawkho turin kan hnathawh leh thil tih chuan min phut tlat lawi a. Kumin a chal delh vang emaw, kam tam vanga mahni duh dan kal tlangpui ngawt tum lah a awl phian bawk nen, keimahnia Pathianin chhia leh ṭha hriatna a dah pawh kan hmang hman lo lek lek fo a nih hi. ‘Meeting’-naah naupang zawkte ‘member’ an nihna-in an duh zawng sawi phalna a pe ve a ni tih hre hauh lovin, anmahni namnul taka rorelna kaihruai ṭhin kan la awm ang tih ka hlau! Mahse, a phel lehlam, keimahnia a ṭha zawk hman chhuah tur a awm tih hre reng ila.

“Kan hnuaia thawkte hi kan thawhpui angin en ila, kan thawhpuite pawh kan thawhpui an nihna ang chiahin en leh mai ila, kan hotute pawh hotu angin en ila, thawhho a nuam a ni mai law’m ni?”

‘I thu ber lo’ titu, engkim hi kan thuhnuaiah a awm vek loh thu sawitu, Dr. C Lalhrekima khan “Mahse, thu berna i nei ve asin! Pathianin i kuta a dah, i rilru erawh i thuhnuaia mi a ni a, i nungchang leh khawsa zia pawh i thuneihna a ni,” tiin a ziak tel asin.

Hun a liam a, kum pawhin Siamtu zahngaihna avangin ni chhuak ngai bawk her chhuahpui leh turin liam zai rel a tum leh ta uk uk mai. Khawvel chhandantu, ran ina pianga kha lawm turin, kan thinlung pawh Bethlehem lam kan hawitir hlawm a, Eden huan aṭanga mihringte thinlung tipheltu, Setana hnathawh hnenh thei awm chhun, Isua Krista chu kan thinlungah piang nawn leh bawk sela, a va lawmawm dawn em!

Mihring kan ni a, vanduaina hi kan tawh theih, kan chunga thleng atana kan duh loh leh beisei loh ber pakhat a ni a, chu thil chu vawiina kan ruahmanna-a tel ve miah lo, thil inzep tlat a ni thung si! Horatio Spafford kha chung mi vanduai zingah chuan a tel a, a fapa neih chhun a chân hnuah a sum zawng zawng deuhthaw chânin, chuta chhapah a fanute pali lawng chetsualnaah a chân leh a, a mihring mihrinna aṭanga thlir chuan a nat dawn teh lul nen, “It is well, with my soul, it is well, it is well with my soul” tiin Pathian a chawimawi thung. Amahah Krista a piang tawh a, a nuna a phel lehlam, a ṭha zawk Krista chu a inthununtir ta zawk a! Chu chu Amah neitu, CHHANDAMTU chunga rinna nghat tlattu-in harsatna a hmachhawn dan a ni. He vanduaina harsa taka paltlang hram hram thei tur hian, a thinlungah vawi eng zat tak Lal ropui chu pian nawntir ang maw?

Kan hmaa hunpui lo thleng mai tur leh kan dam chhung kan chhiar zelna turah hian, keimahnia a ṭha zawk hmang chhuak thei turin, thil ṭha ti tura min tlantu hmingin ‘Krismas’ chibai le.

- Amawia Ralte