DAWN TISEI – MIZOTE LEH RUIHHLO

Kum 2025 hi thla khat zetin la tawp lo mahse kum 21 chhunga ruihhlo avanga thi tam ber kum a ni phak tho mai tih, chanchinbu pakhat The Aizawl Post (4.12.2025) chuan a tarlang a. Zep leh thup kual theih pawh a ni tawh lo. Tunlai thil awmzia thlirin kan ram khawpui, a bikin Aizawl chhunga zu leh ruihhlo a hluar ta em em leh a zuartute pawh an ngampa ta em em mai hi, a dotu leh mawhphurtute hian tihngaihna an hre tawh lo em ni aw? Nge mit an siai khum zawk? tih mai a awl khawp mai.

Ram tam takah pawh zu a tam, Mizo anga buaipui an awm hriat a ni lo. Ruihhlo hluarna pawh a awm nual, Mizo anga ngampa taka chetna hmuh tur a awm lo. Hnam ral tur zia emaw ni dawn le? tih min ngaihtuahtir hial a ni. Kan chhiat lehzual hma hian theihtawp chhuaha hma lak a hun hle tih mai loh chu sawi ngaihna a awm tawh lo a ni.

Ni tin mahni eizawnna hna ṭhulha ruihhlo ngaite buaipui tur chuan kan tlawmngai pawl hrang hrangte tan pawh chet reng ngaihna a awm bik lo; sorkar pawhin chhawr ṭangkai dan tawk a hriat a ngai.

Sorkarin hlawh neia a rawihte ber hi thawk nasa ber turte chu an ni a, an thawk mek reng bawk a. Thlen chin aṭang erawh chuan hmasawn ṭulna a tam hle mai!

Engtin nge hma kan lak tak ang le? Tun dinhmunah chuan Sorkar leh Kohhranin ruihhlo ngaite enkawlna tur hmun an siam thei lo a nih pawhin, Mizoram chhunga ruihhlo ngai enkawlna hmunte hi a theih ang anga ṭanpuiin vil rawh se. Mizoram sorkarin Polytechnic thar din a tum lo a nih rau rau chuan heng Champhai, Kolasib, Mamit, Lawngtlai leh Siaha a Polytechnic thar tur Building-te hi ruihhlo ngaite enkawlna hmun atan ruahman se, an mamawh dan azirin thiamna bik zirna tur Skill Training Centre dinna remchang pawh a ni nghal hial awm e.

Engpawh nise, tunlai thil awm dan thlir kualin mit siai khum emaw, uipui tuilian thlir ringawt chu a hun tawh lo a ni e.

- H Lalchhuanvela