LO ZAWH HLA

Tunlai hian chanchinbuah lo zawh rûnpui tihte leh kût phuahchawp (phuah belh) kan hmu ta zauh zauh a. Huau huau lamah ni lovin hmasawnna lamah ka ngai. Tourism Minister pawhin tourism tihhmasawn nan lo zawh runpui neih a ṭhat tur thu te a sawi kan hmu ta hial a.

Lo zawh hla hi Mizovin kan nei tam pawhin ka hre lo va; he ‘Lo zawh hla’ Pu C Zachhûnga, Baktawng hla phuah thiamin a phuah aia mawi leh ṭha leh inhmeh hi ka la hmu lo. A thu leh thlûk te hi a inrem em em a, ka rawn tar lang ve a ni. Tu emaw zai thiam deuhin han sa se, lo zawhnaah leh a sehsâmahte ring deuhin han zaitir ila, lâmpui hut hut atan a ṭhain, a nuamin boruak a siam hle ang. Youtube-ah te han dah se, kan vaiin kan sa thiam nghal mai dawn a. Nakum 2026 lo zawhnaah chuan kan hlimpui ber hla a nih hman ka ring.

1. Ṭuan zai rêlin ramloh hnuchhâwl pui ka hmachhuan e,

A lo her chhuak tahpuan ang zawh ni,

Zingṭian bawhâr zai mawi te a fam ngei ang.

Lâwm lungrualte’n hnutiang kan chhawn rih dawn che,

Rûnpui lawia suihlung rual dialin,

Thlangah sappui nun zir lêng rual,

Zai vâwrin, tlai khua pawh vâr zain.

2. Thlangah sappui rûna hun mawi no ka thlang ngei ang,

Chawltui ianga sakhmêl pawl riaiin,

Ka tâwk ang che ka lâwmte, ṭuan mawi ber mai.

3. Hunpui her chhuak ṭhâl favâng lênkâwl a êng ṭan ta,

Lâwm lungrualte’n hnuhchhâwl kan kuai zo,

Rêngpan awihlai sawmfâng riak a cham dêl e.

- V.L. Hruaia, Tuikual South. Ph 8118911123.