THE BIBLE SAYS SO!

Nakin lawka lo thleng tur Lal Isuan a mi thianghlimte- piangtharte vana a hruai chhoh hun tur thu hi hman ni khan kan sawi deuh nual a. Mahse, thupui pawimawh dangah kan pensan leh ta a. Tun ṭumah hian i sawi chho dawn tak tak teh ang. Eng vangin nge mite hian mi thianghlim lâwr hi awm dawna an rinna chhan hi? E le, Bible-in a sawi chiang em alawm! Bible-in a sawi chuan pawm mai tur a ni. A nih khawi khawiah nge a sawi le?

Lal Isua ngeiin, a zirtirte rilru zam leh lungngaite hnem nan, “In thinlung mangang suh se, … in tan hmun siamin ka kal dawn hi. Tin in tan hmun ka han siam chuan ka lo kir leh ang a, ka hnenah ka la ang chu u, ka awmnaah nangni pawh in awm ve theih nan,” tih a sawi (Johana 14:1-3). Lal Isuan vana a lawn chhoh dawn thu a sawi a, ringtute tana awmna hmun a siam tur thu a sawi leh a. Ringtute awmna hmun a siam zawh chuan a lo kir leh dawn a, leia amah ringtute chu a la chho ang a, a hnenah an awm ve tawh ang! Amah ringtute a rawn lak chhoh dawn thu chu a chiang ti rawh!

Mi thianghlim lâwr tih ṭawngkam hi kan Bible-ah hian a awm hleinem! Trinity tih pawh a awm hleinem! A hming, a ṭawngkam awm lo mah se, a thu a awm alawm. Pa a awm a, Fapa a awm a, Thlarau Thianghlim a awm bawk a. Bible-ah a inziak kur ngiai nguai a. Hei hi sawiin trinity chu Pathian pakhata Pathian nihna nei pathum awmte sawi nan hman a ni ta a ni. Lal Isua chu vanah a chho dawn, a lo kir leh dawn, amah ringtute a hnenah, a awmnaa awm ve turin a hruai chho dawn tih thu chu kan Lalpa’n a sawi chian hle hi. Hei hi mi thianghlim, piangtharte lawr khawma lak chhoh tih sawina a lo ni ta a ni.

Hmun dangah Paula’n fiah takin a lo sawi ve leh a. Lal Isua chu van aṭangin piangthar thi tawhte thlarau rawn hruai thlain leia amah ringtu la damte leh ringtu thi tawhte thlarau a rawn hruai thlakte chu thlan ata kai thovin, vanah a hruai chho dawn tih kan hmu chiang hle mai (I Thess 4:13-18). Heta ringtu thi tawh leh la damte a ruala lak chhoh thu hi Korinth mite hnenah pawh Puala hian a sawi bawk a ni (I Kor 15:50-52). Van chhawng thumna meuha lak chhoh Paula hian Thessalonika ringtute hnenah hian, “Hei hi Lalpa thuin in hnenah kan sawi a ni,” ti meuha a sawi hi tu nge hnial thei awm ang le! (I Thess 4:15).

Lal Isua hian amah ringtute hi a han senghawi hmasa ang a, sakawlh tan hun a’n pe hlek ang a (II Thess 2:7-8). Thupuan bung 6 aṭanga bung 18 thenga thil rapthlak pui pui lo thleng tur Apostol Johana’n a sawi kha a lo thleng ang a. Israel fate pawh an lo harhin Lal Isua chu an Messia atan an pawm tawh ang a, Pathian ngaihdamna changin chhandam an ni vek dawn a ni (Rom 11:25-27).

Mi zawng zawng tana pawimawh chu mi thianghlim lâwrah hian i tel ve ang em, i piangthar tawh em tih hi a ni.

- F. Lal Thanzuala, 9436141242