Pastor leh missionary service aṭanga pension tate fuihna

Sawrkar hnathawk, officer lian leh te deuh, department-a a hotu chan chang pha leh zirtirtu, headmaster/headmistress ni pha te, an pension hma kum li/nga la awm tihah chuan ser huan–valencia, nimbu hmun, kuhva hmun, etc. an rilruah a lo lang ṭan a. A bikin headmaster aṭanga chawl tate.

Chutiang zel chuan zirtirtu senior hna aṭanga chawlh (pension) mai hnai tawh te, an vanneiha an hrisel ṭhat phei chuan mahni ser huan fang kual tura chak tawk chauh an ni em maw ni aw tih turin, kum 60 hnu lamah pawh an la valai viau thei a. A lawmawm lam zawng a ni e. A neinung fa deuh phei chuan thlam changkang tak, thingtlangpa thlam ang ni lo, hmeithai in aia ziaawm mah tur an nei thei a. Hetiang nei thei nih chu thil lawmawm tak a ni narawh e.

Pathian lam hnaih deuh phei chuan, chu thlam changkangah chuan, thlam tukverh lam hnaih bang kil dawhsanah, Bible thuthlung thar bu hlui tawh lam leh Vanglaini chanchinbu hlui leh thil chhinchhiahna ni awm tak lehkhabu te an han rem thuah âm a. Chhak lam kilah, huan sâm khawl ṭha pui pui, ṭhenkhatin in lamah pawh ka neih zawh loh, engine oil bur ruak nen an dah thal rum thei a. An lunglen chângin car changkang tak nen, a hma seat (front seat) vei lamah mihring aia ui hmul buk ṭhuttirin, thermoflash changkang pui pui car hnung lamah rem tle tuar chungin, hlawhfa tlemtê nen, pension hlawh lak tur la awm hre reng chungin mahni sêr huan lam an pan a. A aia nun hlimawm a vâng viau thei awm e.

Eng vangin maw? E, an zalen tawh. Sawrkar kal fuh lohna thurawn pe angreng, khak pah deuhin, chair nghenchhan âwnah chanchinbu chhiarin, tarmit fual deuha vuahin, thlam changkang veranda-ah ni lum ai pahin thingpui sen hâng an dawm thei tawh a. Fa, sawrkar hnathawk nei duah tawh tan phei chuan, an pension hlawh pawh chhungkaw ei bêl atana hmang lovin, damlo kan nan leh mitthi râlna atan chuan a chhenfakawm hle thei bawk a. Nun hi a va nuam awm em!

Mahse maw, nang, pastor leh missionary hna (service) aṭanga chawl (pension) tate u, kum 60 tlin thlenga hlawh neia Lalpa rawng in bawl thei hi a va lawmawm tehlul em! Chuvangin, a chunga kan sawi takte ang hi chuan in zalen a rem ve lo. A chhan chu, hlawh lak tur nei chunga Pathian rawng in bâwl chhung zawng leh a hnu lam thlenga GP fund withdraw tur nei ve ngai lo, TA bill nei ve thei lo, thla tin hlawh lak tur nei ve ngai lo, ûm zuitu pension hlawh nei ve reng reng lo, chutiang neih ahnêka rau lo nih hlawh fo ṭhin, in tana ṭawngṭai ṭhin, kohhran upate nen in service a inang dawn chauh. A chunga sawi lan takte angin, ui te var vulhin, ser huan, kuhva huan, etc. in enkawlsan ve thiang lo.

GP fund withdraw-na hun vawi khat i la nei a. Service kum atan kum bithliah a awm tawh lo. Kohhran upate nen GP fund withdraw-na hun vawi khat chiah in nei ta. Chu chu chatuan GP fund a ni tawh ang a. I withdraw ni chuan khawvel GP fund la neite’n an vui ang che. I pension hlawh pawh hman zawh mai mai theih tawh loh, i nupui fanaute leh kohhran mite'n mita hmu lo va, a sawia an sawi tur an eipui theih tawh loh che a ni ang a, nangmah chauhin i ring tawh ang. Kohhran upate nen in pension dan a inang tawh ang a, khawvela rawngbawlna aṭanga pension ang a, pension hma kum tlemtê la awm aṭanga tihfel ngai tur a awm ve tawh lo vang. Engkim tihfel sa vekah, i pian tirh aṭanga i service chhiara i ACR ziaktu, Lalengkimtitheia hnenah i servive bu enin i ACR chu i thlir thei ang.

ACR ṭha nei turin Lalpa rawng bawl hi pension-san mai chi a ni ve lo; "Châwl hman kan ni lo, muang thei kan ni lo, kan hmabak hlen tur a tam si."

Lalpa'n malsawm rawh se.

- Lalrinhluna Ralte, Ratu