Revenue Department

Sawrkar hi mipuite ta, mipuite siam a ni a. Sawrkarin eng nge a tih tih hi a siamtu mipuite’n hriat hi kan chanvo a ni. ZPM-in sawrkarna a chan aṭangin kum khat leh thla riatna a kal mek a. Sawrkarna a chan hnuah hian eng nge a tih, engtiang chiahin nge hna a thawh tih te a theih ang angin, department hrang hrangte a tahtawlin tarlan kan tum dawn a ni.

A hmasa ber atan, Land Revenue & Settlement Department hi kan luhchilh ang. ZPM-in sawrkarna a chan hnua department hmasawn nasa bera chhiar ngam chu Land Revenue & Settlement Department hi a ni awm e.

LRS Department-ah hian Administrative Reform & Decentralisation chak taka kalpui a ni a, mawhphurhna hrang hrangte nasa taka siamremin, semzai a ni. Tun hma chuan Secretariat-in Directorate level-a khawih awm tak hna eng emaw zat an khawih ṭhin a, Directorate-in district office khawih tur ngei ngei hna tam tak an khawih ṭhin bawk. Aizawl District leh khawpui chhung bikah phei chuan Directorate kha surveyor officer (SO) office lianpui ang maiin hna an thawk a ni.

Hna chi hrang hrang an khawih pawlh ṭhinte chu Settlement Office leh DC level l-ah te pek ṭhen mek an ni ta a. Revenue Director-in a tih tur dik tak heng–hna thawh dan tur duan, SO-te hnathawh dan vil, ram chhung hmun tlawh kual, adt. te a takin a thawk chho ṭan mek a. Secretariat lam pawn policy leh programme tak tak an ngaihtuah theih nan tunah hian ruahmannate siam mek niin, nakin lawkah chuan Secretariat leh Directorate thlen ngai lovin Revenue hna tam zawk hi district leh sub-division-a chinfel theih a ni dawn a ni. DC-te hi Revenue Administration-ah mawhphurhna lian zawk pek zel tum an ni a; hei hi India ram hmun tam zawka an kalphung a ni.

Revenue Minister ten thuneihna pumhmawm a, AMC area chhunga house pass dilna form anmahni (minister) 'recommend' loha lei theih loh tura an lo kalpui ṭhin pawh ZPM sawrkar chuan January 2024 aṭang khan a titawp nghal bawk.

Directorate-in survey leh ram endik, LSC issue leh field office-te thawh ang an thawh ve ṭhin kha tihtawp a ni a, July 25, 2024 khan SO Aizawl North leh South siam niin (geographical area base-a ramri ṭhenin), hei hian mipuite tan nasa takin awlsamna a thlen a, Directorate Office chu Department hmasawnna tur leh district office-te buaipui theiin a siam ta a ni.

SDO (Civil)-te hi an nihna tur anga hman ṭangkai an ni lo nasa ṭhin em em a. Mipuiin sawrkar awlsam zawka an ban theihna atan SDO Civil-te hi Revenue Court-ah May 1, 2024 leh Sub-Registration Office-ah February 19, 2025-ah te puan an ni. A taka hna an thawh theih nan hmalak mek a ni a, Thenzawl leh Vairengte Sub-Division te hi pilot atana thlan an ni a, ram thua buaina nei leh ram inlei leh hralh leh dahkhamahte SDO Civil-ah thil tam tak a tih theih tawh dawn a ni.

ZPM-in sawrkarna a chan hnuah Settlement Office hmun thum–Saitual, Khawzawl leh Hnahthial-ah te hawn belh tura hmalak nghal a ni. July ni 8, 2025 khan Revenue Office, Saitual hawn a ni a; department leh DC, Saitual te hmalaknain Saitual Revenue Office chu mipuite dawr theih turin a lo 'function' ta. Khawzawlah August ni 13, 2025 khan SO Office hawn a ni ta bawk a, Hnahthial District-ah pawh tihhlawhtlin thuai tum a ni.

Hei bakah hian survey hna outsource a ni ta bawk. Surveyor indaih lohna avanga survey hnathawh muang lutuk phuhru turin survey hna chu November ni 8, 2024 aṭang khan firm sawmpathum (13)-te chhawrin 'outsource' ṭan a ni. Hei bakah hian mimal survey lama thiamna neite license pein, licensed surveyor nei tura hmalak mek a ni bawk. Hei hian Department surveyor-te kut chauha innghahna a tikiam a, chak zawkin ram teh kawngah hmasawnna hmel thar kan hmuh theih phah dawn a ni.

Online hmanga tax pekna tihchangtlung zel a ni a. Aizawl Municipal area chauha pek theih ṭhin kha tunah chuan Hnahthial district tih loh chu online-a ram chhiah pek theih vek a ni tawh. Non Tax leh fee hrang hrang pawh SBI Main Branch-a kal leh zel ngai lova SO Office-a pek theih turin district tin office-ah bun a ni tawh bawk.

Record of Rights (ROR) kan neih zawng zawngte digitize zawh vek a ni tawh a, tun hmaa land record neih zat zawhna a awm apianga district office-te leh Directorate-a an inchhiar mum mum ṭhin leh figure inang lo zung ṭhin kha a awm tawh lo. RoR kan neih zat hi awlsam takin hmeh chhuah theih tawh a ni.

Hun hmasa lamah khan land record digitisation kalpui mumal a ni lo a, sawrkar thar a lo pian aṭangin chak taka hmalak a ni ta a, January ni 7, 2025 thleng khan RoR 3,61,188 neih mek a ni.

Survey of Villages and Mapping with Improvised technology in VIillage Areas Scheme (SVAMITVA) hnuaiah ram la ṭheh lohna khaw 319-ah drone survey neih tawh a ni a, ground verification pawh zawh vek tawh a ni. Property card (LSC tlukpui) pawh 2,973 lai pek chhuah a ni tawh a; India ramah a ti ṭha ber pawl niin, hmarchhak state dangte pawn Mizoram kalpui dan hi an rawn ngaihven ṭhin.

National Geospatial Knowledge Based Land Survey of Urban Habitation (NAKSHA)-ah nasa taka hmalakna kalpui a ni. He hmalakna hi kum khat atana India sawrkar hmalakna a ni a, India ram khawpui Urban Local Bodies (ULB) thlan bik eng emaw zata Urban Land Record thuam chakin, GIS l-integrated data base leh land ownership transparency lam hawi project a ni. Aizawl South atan bik AMC Ward XI & XIX, locality pali-ah kal pui mek a ni a, aerial rurvey tih zawh a ni tawh. He hmalakna hi Department of Land Record (DoLR)-in Digital India Land Record Modernisation Programme (DILRMP) hnuaia kalpui a ni.

ZPM sawrkarna hnuaia Revenue Department hmalakna langsar tak pakhat dang leh chu ‘e-ram’ hi a ni. E-ram hi February ni 19, 2025 khan hman ṭan a ni a, he online platform hmang hian Revenue dawrtuteṭ’n Revenue office tlawh kher ngai lovin, e-ram portal kaltlang hian dilna (ram ruak dil, hming thlak, partition, redemarcation, etc.) an thehlut thei tawh a; dilna pawh 2,800 vel a lut tawh a, 600 vel chinfel a ni tawh bawk.

Hei bakah hian tun hmain Revenue Department dawr nawm loh thu sawi a tam ṭhin a. Chumi hre reng chuan department dawr nuam tak an nihna tur kawngah ‘Customer Care Policy’ duan a ni. Hei hian an hnathawhna kawngah a pui hle dawn a, hmun hrang hranga Revenue office-ah te Customer Care Policy hi a takin hman chhoh a ni dawn. Tunah pawh hian Revenue Department hi sawrkar office dawr nuam ber pawlah a chang chho mek tawh a ni.

- Eddy Zosangliana Colney,

General Secretary (GAD), ZPM Gen.Hqrs, Aizawl