Zirlai huaisen leh tumruh khawiah nge?

Ka van zak tehlul êm! National University of Educational Planning and Administration (NUEPA), New Delhi-a training kharna inkhawma ka tel ve tumin Vice Chancellor chuan, NE 7 sisters states Education Report a khaikhawmnaah, ”Mizoram state report thlir hian literacy percentage a san ber laiin, zirlai dropout rate a sang ber bawk si hi thil ni thei a ni lo, Kristian tamna in ni a, hetiang thil hi a awm thei ngai em ni?” a ti a. A zahthlak duh rem rem kher mai!

A va'n hmu fuh tehlul êm! Mizorama ziak leh chhiar thiamna rate hnuhnung ber chu 98.2% a ni a, hei vang hian India rama fully literate state hmasa ber a ni. He hlawhtlinna hi May 20, 2025 khan Chief Minister Lalduhawma chuan a puang a, Ministry of Education-in 95% literacy rate a tehna a khum hial. A thawm a van thang mawi tehlul êm! Mahse, hlauh ngah Mizo lehkha thiam rualte hian hlauh kan nei tlat, chu kan hlauh chu han thlir teh lawk ang.

All India services exam hian a tlangpuiin Civil Services Examination (CSE) a kâwk a, chu chuan Indian Administrative Service (IAS) leh Indian Police Service (IPS) ang chi lakna a ni. CSE hi Union Public Service Commission (UPSC) chuan a kaihruai a; all India service dang, a bik takin Indian Forest Service (IFS) leh group hrang hrang ‘A’ leh ‘B’ civil service-te tan pawh a ni bawk. Recruitment process-ah hian multi-stage exam a awm a, chutah chuan preliminary leh main written exam-te pawh a tel a, chumi hnuah interview neih a ni ṭhin. Hei tak hi a ni, kan Mizo ṭhalai lehkhathiam rualte’n an hlauh êm êm ṭhin chu?

Kan vela kan tribal-puite chuan huaisen taka hmachhawnin an pawm chilh a, an bei ngat ngat a, a tawpah an hlawhtling nge nge ṭhin. Mizo lehkhathiamte erawhin an hlau tlat a, an hmachhawn ngam meuh ṭhin lo. Hei vang hian all India service kan tlem sawt ta hle a ni. Kan literacy rate sanzia ngaihtuah hi chuan heng service hrang hrangte hi hui zo vek thei awm tak kan ni a, mahse, kan lang pha ve ngai meuh lo a ni ber.

CADC huam chhungah sawn Chakma 62,094 an awm mek niin a lang a. Tribhuvan University record-a lan danin, he University aṭang hian Chakma zirlai 14,308-in graduate an zo tawh. An literacy rate chu 40-50% vel chauh a ni. Mahse, ṭan an la nasa hle a, an huaisen hle bawk. Tunah hian CADC sponsor-in Chakma ṭhalai 50 chu N. Delhi-ah awmin, UPSC & IAS exam hmachhawn turin an inbuatsaih mup mup mai! Hun rei lo têah Mizoram state sawrkar department hotu lu an la ni fur dawn a ni. Chutih hunah chuan inchhirin bân a chen ang a, phengphehlepa khua kan tlai zo tawh ang.

Aw! Zoram lanu, val rual, ṭhalai lehkhathiamte u, ṭan la ve hram teh u. In van dawizep ve? In tum a van hniam ve? Icon, Idol, fashion, Hnahsin Kut, inkhawm tam, inkhawmpui kal kim ringawt lam a ni lo. Ruihhlo, ralthuam tawlhruk, smuggling, corruption, HIV+, cancer, LSC lem, compensation, etc-ahte kan hmingthana kan lâr tehlul nen, UPSC & IAS exam lamah hian mi hrât khawkheng, ramvachal ni turin ṭan la ve mawlh teh u. Hnunga kawlêk thai atan zawng kan phal mawlh lo che u asin.

-Dr. C. Lalrampana