THE BIBLE SAYS SO!

Zoram kristiante hian ngaih sual lian pui kan nei a, chu Bible-a kan Lal Isuan “Zirtir” tia A sawi hi a ni. Ringtu tih chu piangtharte sawina niin kan ngai a, “Zirtir” tih erawh chu piangthar tihna mai ni lo, piangthar han tih mai aia sang, ringtu tha tak, kristian nuna nung deuh tak tak te hi niin kan ngai thin. Tichuan, “Ka zirtir a ni thei lo vang” tih hi kan bengkhawn tha duh hauh lo. Piangthara kan inngaih tawh chuan “Tu pawh mahni kraws pua mi zui lo chu ka zirtir a ni thei lo vang” A ti si a. Kan rilru-ah chuan “A zirtir tling lo mah ila chhandam chu ka ni tho vang” tiin kan ngaihtuah deuh vek niin a lang. Hetiang avang tak hian “Lalpa Lalpa” ti nazawng, Lal Isuan A hnawl turte kan awm ta teuh mai a ni (Math 7:21-23).

A nih, zirtir tih chu eng tihna nge ni ta ang? Ringtu tihna a ni a, tupawh Lal Isua ringtu chu zirtir an ni a, a zirtir ni thei lote kha chu piangthar an ni lo tihna a ni. Zirtir nih chu piangthar tihna a nih chuan, mahni kraws pua zui lo chu piangthar an ni lo tihna a lo ni dawn si a. Mahni chhungkhat laina hnai ber berte ai pawha Lal Isua hmangaih zawk lote pawh piangthar an ni dawn ta si lova (Math 10:37-39; Luka 14:25-27), kan Zoram ringtute dinhmunhan thlir hian a va lungngaih thlak dawn ve! Kawngka zauva kalte chu tam tak an ni a, boralnaah an lut ta si a, kawngka zima kal a ngai ta a ni e (Math 7:13,14).

Mahse kan ram chhandamna thuhril hi chuan kawngka zim hi a tin zawn si lo a nih hi. Sual simna kan sawi peih ta lo! Keimahni a sawitu ngeite pawh hi sual simna nuna kan nun loh avangin sual simna thu hi kan sawi thiam lova, kan sawi peih lo! A ngaithlatute lawmzawng lah a lo ni bawk si lo! Mahse Chanchin Tha puan darhna tur thupekah khan sual simte ngaihdamna thu chu kan Lalpan A sawi tel ngei kha le! (Luka 24:47).

Zirtir tih kha ringtu, piangthar, chatuan nunna changtu apiangte hi an ni a, chung mite chu an nuna LAL ATAN Lal Isua pawm tak zettute an ni. Thuthlung Thar bung leh changte han en ila, zirtir tih hi ringtu apiangte hi an ni tih chiang takin kan hmu a ni.

Chanchin Tha bute tih lovah chuan zirtir tih thumal hman hmasakna ber Tirhkohte bung 6 chang 1-na hi a ni a, tihian a inziaka “Tin, chung laia zirtirho an pun an pun lai chuan” tiin (Tirh 6:1). Zirtirho pung pung ta te chu ringtuho, ring thar hote kha maw le! Heng bung leh changte hi en chhuak teh- 6:1,2,7; bung 9:1,10,19,25,26,36,38; bung 11:26,29; bung 13:52; bung 14:20,22,28; bung 15:10; bung 20:1,2,30; bung 21:4,16. Heng bung leh changte hi taima takin en chhuak la,ringtute kha zirtir an ti zel tih i hmu ang.

Tichuan, zirtir, piangthar, chhandam fa ni tur chuan mahni thihna kraws putu, a nuna Setana lalna paithlaa Pathian lalrama lut, Isua Lal leh Chhandamtua pawmtu (cf Tirh 5:31; Johana 3:3-5) nih a lo ngai a ni. Chuchu Bible sawi dan a ni.

- F. Lal Thanzuala, 9436141242