State Games-ah Indigenous Games

Mizoram State Games lo thleng mai tur hi infiammite tan chuan a nghah­hlelhawm hle mai thei. Indeginous Games zingah hian hmasang aṭanga Mizoten in­fiamnaa kan uar ber leh naupang te ber aṭanga nu leh nula thlangval tlenga kan hlim pui em em, Kawi hmanga infiamna chi hnih tal kan telh lo hi chuan Mizote infiamna a tikhingbai deuhin a lang. 

Kawi hmanga in­fiamnate hi Mizote kut chhuak ngat infiamna kan neih leh Mizote culture a bet tlat ṭhin a ni a, kan bosal mai ang tih a hlauhawm ta. Inkawibah ngat phei chu a khaw nawta hmeichhe naupang aṭanga nula leh nuho thlenga infiamna kan neih, kan hlimpui em em ṭhin a ni. Nula lo sul haw hmasa apiang­in, Tualzawl nuam tak maia a huho a nula, nu leh hmeichhe naupang thlengin, an han inbah suau suau mai ṭhin te khan hmanlai khawtlang nun lo nawmzia leh zalen ṭhinzia a tarlang ni ngei tur a ni. 

Kawi hmanga infiamna chi hrang hrang- inbah (bapui leh bah te), inchheu, inhnawk leh inkutte hi a zavai-te hi chuan Mizoram State Games-ah hian telh theih ni lo mah se, pahnih tal hi chu items zingah han tel ve thei hram se aw. 

Kawi hmanga in­fiamna kan neihte hi a huho a infiamna a ni tlangpui a, hman­rua a hautak lo a, hmanlai phei chuan ramhnuaiah awlsam taka hmuh mai theih leh lawh mai theiin a awm ṭhin a. Tunlaiah pawh hian hmanraw hautak lo pawl tak a nih a rinawm. 

Mizotena Kawi hmanga infiamna kan neihte hi Mizote hmuhchhuah leh infiamna nuam tak leh hlimawm tak a ni a. Mizoram mai bakah State Level, National Level-ah te leh Inter­national thleng pawha kan hnam rohlu ‘Indi­genous Games’ infiam­na kan neih ve a nih avangin khawvel deng chhuak hial thei khawpin chawi sang thiam ila a duhawm hle. Hnam dang chuan khawvel tawp thleng pawh hian min chawi nun sak dawn si lo a. 

- HC Thanchungnunga, J