Congress ho hi eng nge an awmzia?

ZPM chuan Dampa bye-election atana an candidate tur August ni 25, 2025 khan an puang a, Pu CVanlalsailova a ni. Candidate puan tuk August ni 26-ah Congress ṭhalaite chuan press release siamin, ZPM-in candidate an puang chu an dem thu an tichhuak a nih chu!

Congress ṭhalaite chuan "Mizoram chhungah MLA By-election vawi eng emaw zat neih a lo ni tawh a. Thihna avanga inthlan ṭhat a nih ṭum phei chuan eng party mahin inthlan buaipuitu Election lamin inthlan ṭhat tur thuchhuah an neih hmain Candidate an puang ngai lo," an ti. "Election aṭanga inthlan ṭhat a nih tur thuchhuah pawh a awm hmaa ZPM Candidate an puang hi Congress Ṭhalai chuan a dem takzet a, mihring inzah lohna lian takah a ngai... Hetiang inthlan ṭhat tur anih thu sorkar thuneituten an chhuah hmaa Candidate an puang ta mai hi ZPM Party-in pawisak an neih lohzia leh midang an zah lohzia an nemnghetah Congress Ṭhalai chuan a ngai a ni," an ti.

Hetih lai hian MNF chuan September ni 4 khan Dampa bye-election neiha an candidate tur an puang ve leh a, Minister hlui Dr. R. Lalthangliana a ni. MNF-in candidate an puan tuk mai, September ni 5 khan Congress President Pu Lal Thanzara chuan ZPM leh MNF ten candidate an puang ta chu a sawisel leh nghal zat zu nia!

Pu Lal Thanzara hian September ni 5 khan Aizawl West-I Block-I a tlawh a, MNF party aṭangin mi 9 Congress party-ah a lawm lut a ni. Pu Thanzara hian thu a sawi a, "Dampa bialtu Pu Lalrintluanga Sailo hun lo taka a boral avangin inthlan ṭhat a ngai a. Mahse, Election neih a nih tur thu leh a hun puan a nih hma Pu Lalrintluanga Sailo boral sarhu laia ZPM leh MNF Candidate an puang hi thil mak leh chhiat tawk chhungte leh bial mipui tawrhpuina aiin palzutna a ni," a ti. Hei hi Congress press release-a an ziah dan a ni.

Election Commission-in Dampa bye-election neih hun tur a puan hmaa ZPM leh MNF ten candidate tur an puang kha Congress party ho hian an pu ber Pu Lal Thanzara hovin an sawisel a, an dem a ni. Mahse, eng nge thleng zel? Election Commission-in tun thlengin Dampa bye-election neih hun tur a la puang lo; mahse, Congress ho hian September ni 10, 2025 (Nilaini) chhun khan an bye-election an candidate tur an puang ve leh ta tho si zu nia!

Congress ho hi eng nge an awmzia? Political party dangin candidate an puana lo buai em em tâwk an ni hi a mak hle mai! An tlakhniamzia leh bye-election an huphurhzia tihlanna a ni thei mai lo maw?

Bye-election neih hun tur puan a nih hmaa party dangin candidate an puang an sawisel a, an dem a. An sawisel ang chiahin an awm ve zui nghal zat tho si! An duh hunah candidate an puang a, party dang pawhin an duh hunah an puang ve ang chu. Party dangin candidate an puan hun leh zela an lo buai hi a nêpthlak hle a ni lawm ni?

A awmzia ber chu – Congress ho hian a dik a dawk thlu lovin party dang thil tih apiang sawisel an tum char char tihna a ni. An lêlo ngawt mai; an thil tih dan hi a zahthlak. Mahse, anni chu an zak chuang hauh lo ang.

- Hlanpuia Ralte