Vei tur thar kan nei e!
Kan tunlai boruakah Zohnahtlak, ramri kham hrang hranga chengte zingah buaina hrang hrang tualchhung buainain a nghawng chhuah avanga sahimna zawnga Mizoram chhunga rawn lut an tam hle mai. Heng kan unaute tia kan chhal, state hrang leh ram hranga chengte hian kan Jerusalem tiin mahni sahimna turin Mizoramah kan tlan chhe lut hlawm a, mahse heng sahimna zawnga Mizoram lo lut te hian mahni chenna ṭhan huamchhunga hnam bil chhinchhiahna Flag ang chi te ual au taka Mizo nih ve tum hauh lo ni awm hrim a, inlak hran duhna an rawn lantir ngam hi a vei awm hle.
Heng hnam bil in lak hrang na ang chi hi hman ata tawh Mizoram chhungah bansan in hnam bil chawi lar aiin, Mizo hnam tia in vuahin lungrual takin kum eng emaw zat kan lo cheng ho ta. Hetiang inlungrualna Mizo anga kan neihsa ti chhe thei tur leh nghawng ṭha lo nei thei tur ang chi kan chawi lar hi kan vei thar a ṭul hle mai.
Vanglaini chanchin bu in nikum a Zoram Titi a buatsaih ṭum khan 'Raltlan engtia lo dawnsawn tur nge' tih thupuiah hmangin talk show an buatsaih a, kha mi ṭum khan chhimtu zing aṭangin heng ramdang leh state danga chengte lo en unau mai chu thil har a nih tawh zia an sawi a. Hemi ṭum hian hnam ang chuan kan lo in unau pawh a ni thei a, mahse politically leh regionally a cheng ho leh rorelna angkhat ni lo a awm kan nih avanga nunphung leh zia rang in ang tawh lo kan nihnate sawi a ni a, a dik ka ti hle.
Hengte a nih avang hian chenna tur leh seilenna tur ram bung hrang leh rorelna hrang a seilian kan nih tawh avangin lo in lak tawngpawng unau vak hi a rem lohna chin a awm tawh. Chuvang chuan heng Zohnahthlak ti a, kan unaute kan tih hian kan in lungrualna Mizo nihna hi an pawm ve theih si loh a, mahni hnam bil chawi lar bik duhna an neih hian kan inlungrualna hi nasa taka a chhe zawnga a nghawng theih avangin lo tawngpawng lawm hurh loh hi kan tih a ṭul niin a lang dawn ta riau a, vei thar a ṭul a ni.
Hnam bil in lak hranna leh chawilarnate hian inpumkhatna a tih chhiat avangin ṭhenawm state ah pawh chibil buaina a chhuak a, nunna hial chan phah a ni. Hengte a nih vang hian inlungrual taka kan chen ho theihna leh hnambil awm hauh lova Mizo kan nih theihna hi, tih chhiat a buaina lian tham a thlen phah hial hma hian hawh u 'Hnam bil' in lak hranna ang chi chawi larnate hi Zoram chhunga ual au taka tarlan a nih ṭhin na hi i vei thar ang u. Kan hmalam hun hi tuna kan siam loh chuan siam ṭhat theih loh a nih hunah zawng inchhirin ban a chen tawh ngei ang.
- BIG Mike