Mizo ṭawng dik lo ka ngaimawh ve

Vanglaini August 24&25, 2025 chhuakah khan, “Ṭawng dik lo i ngaimawh ve ṭhin em?” tih Pu HK Lalbiaksanga, Mamit khan a rawn sawi a. Ngaimawh ve ṭhin e, tiin ka rilruin ka lo chhang thuai a. Khami ni tak khan Editorial-a thupuiah chuan, “Dik taka sawrkar hna thawk tur lak” tih a rawn ziak a. Sawrkar hna dik lo taka thawk tura lak an awm ngai emaw ni, ka lo ti rilru hman a. Dik taka hna thawk turin sawrkar hna thawktu tur an lak thu a sawi dawn emaw ka ti a; CM-in Mizorama police constable recruitment neih tawh zawng zawngah belhchian dâwl ber leh fair ber tia sawi ngam a nih a chhuan thu a sawina a lo ni zawk a. Mi 259 an lak dan a dik thu a sawina a lo ni zawk a; dik taka thawk tur tihna lam ni lovin. Kan chanchinbu lian leh darh zau berah pawh Editorial berah hetiang hi a lo ni ve tho mai. “Sawrkar hna thawk tur dik taka lak” tih ni zawk se, hriatthiam a awm deuh awm e.

Vanglaini ka chhiar zawh hian Youtube ka ngaithla leh a. Youtuber pakhat chuan Maubawka Pi Runliani, kum 80-a upa thattu an man tawh thu a rawn sawi a. A sawi zelnaah chuan, Pi Runliani tualthattu tih hi vawi hnih lai a sawi a. Pi Runliani an that zawk a ni si a, Pi Runliani tualthattu han tih tlat mai chu, Pi Runliani hi man tur zawk ni awmin a ngaih theih a. Police lak thua editorial thupui leh a chhung thu a inpersan hlauh pawh a ang e.

Tun hnai mai khan Whatsapp group pakhatah, Kulikawn lama kan mi lâr pakhat chuan St Pauls High School-a an kal laiin thingtlang lam mi a lo lut ve a, a tirah chuan a sapṭawng lam dan leh thil dangah an hmu sang vak lo a ni ang. Mahse, term exam-ah a sang ber a ni ta zel a. Matric-ah phei chuan Assam Board hnuaia exam-ah an school-a distinction a pass awm chhun a nih thu a sawi a. A hnuah phei chuan VC-in a pension ta, tih thu hi a rawn sawi a. Comment-tu pakhat chuan Pu Thantluanga a ni ang maw? A rawn ti a. A rawn chhangtu chuan, “Ani lo Mizovah VC pension an la awm lo” a rawn ti a. Heta a tum hi chu, Ani (Pu thantluanga ni lo) Mizovah VC pension an la awm lo), a tihna a ni si a. Chhiar sual awl tak a ni reng a ni. Mizovah Pu Thantluanga lo VC pension an la awm lo, ti se chuan an chhiar sual lo tur a ni a. A hnua rawn sawi lehtu chuan, Pu Thantluanga ni turah ka ngai a, a ni lo, an rawn ti tlat mai, tunge ni ta ang? a rawn ti ve leh a. Pakhat chuan a rawn hrilhfiah dik ta a.

Hun a rei ta deuh a, hman deuh tawh khan, “Police-in naupang vaw duh lo entir nan, kawng zawh” tih hi an rawn ziak a. An tum chu, police-in school naupang an vua a, chu chu duh loh entir nan school naupangin kawng an zawh zawk a ni awm a. A thu en ngawt chuan Police-in naupang a vaw duh lo kha an dem zawk emaw tih a awl khawp mai.

Hetiang sawi takah chuan, sapṭawng pawhin a lo awl ve a ni ang e. Aizawl dawrkai pakhat chuan phai lamah bungrua a chah ve chu a ni awm a. A lehkha chu an rawn chhang vat a, “I bungrua rawn sawite hi i rawn thawn dawn nge kan rawn thawn tur zawk?” an rawn ti e, an ti ve tho mai.

‘Ni se’ tih pawh hi kan uar mah mah lo maw? Kohhran hruaitu emaw, khawtlang hotute emawin mipui hmaah thu an han sawi a, “Tih thu hi ka’n sawi ni se,” an ti a; an thusawi a tiho zo vek zawkin ka hria. Heng hi kohhran ho hriatah ka’n sawi ni se, an ti a; thu pawimawh tak tak an han sawi zo chiah a, ‘Chungte chu ka’n sawi ni se,” an han ti hi a ṭul lo hlein ka hria.

Heng lo pawh, ‘Nunna chân’ tih te, ‘Exam ka pe’ tih te, sawi tur a tam khawp mai. Mi dang sawiah khêk rih ang.

- VL Hruaia, Tuikual South