A THAR ZEL ṬHIN TUK TININ

2021 kumthar zíng takah kea kalin ka chhuak a, khua a nuamin a thiang ṭha hle mai. Ka kal zel a, Dr. Lalhmangaihi te in bula Tlaizawng, kum danga la par ngai vak lo, lo vul chûk mai ka hmu a, a mawi ka tiin ka rilru a khawih hle mai. A thla te ka la a, ka ngaihtuah zui ta zel a. “Kumthar te hre ve ni awm takin tukin chu i lo vùl hluah mai le?” te ka ti rilru mai mai a. 

Siamtu Pathian hian thilnung leh pangparte hi mawi leh ṭha a tih ang taka siam an nih ang hian a huntë ah an lo lang mai a. Mihringte erawh chu zirtir kan ngai em em a, nitina kan intuaithar a nih loh chuan tihboral mai tur, hmabak nei lo kan ni. Kum 2020 liam ta kha kan hre ṭheuh a. Khawvelin mu leh mal a nei lo va, damlohna leh thihnain ro a rel a; sumdawnna zawng zawng a tla chhia a hna nei lo leh retheihna avangin khawvel ram changkang ber thlengin an rûm anih kha! Kan Zoramah ngei pawh March ni 22 aṭang kha chuan engkim mai a buai zo a, sikul leh pisa pawh hawng thei mumal lovin kan awm ta nghal anih kha! 

Kumthar kan lo chuankai veleh a ka rilrua lo awm chu hei hi a ni, “Tihborala ka awm lo hi Lalpa zahngaihna a lo ni, a lainatnate chu a kang ngai loh avangin. A thar zel ṭhin tuk tinin, I rinawmna a ropui e….. Lalpa chu amah nghâktute tân a ṭha a, amah zawngtu tân chuan. Lalpa chhandamna beisei a nghah veng veng chu a ṭha a ni.” (Jeremia Ṭah Hla 3:22-26) Kan hun kal tawh zawng zawng a chhum lo chat lova Pathian min enkawlnate, hmangaihna leh A ngilneihna avanga nunna, hriselna, chaw eitur, awmna leh chenna tur in min buatsaiha; silh leh fen tur te, midang min hmangaihtu te thlengin, chhiar sen loh malsawmna min vûrna zawng zawngah hian lawmthu i sawi ang u.

Diane-i, sikul naupang sawiselbo, zirtirtute tilawm ṭhintu chu, a zirtirtu hmaah chuan thinlung puak keh leh hrehawm ti tih hriat ngawih ngawihin mittui nen ṭap chungin a ding a. Eng vangin maw? A exam-naa a paper chu a tichhe palh vek mai hi a lo ni a. “Zirtirtu, khawngaih takin a phêk thar dang min pe leh thei ang em?” tiin a dil a. A zirtirtu, mi khawngaih thei tak mai chuan amah thlamuan chungin phêk thar diai mai, bawlhhlawh kai lo chu a pe leh ta a. Diane-i hmelah chuan hlimna ropui tak a lo êng leh ta!

Khawngaiha min chhandamtu Lal Isua chuan nitinin a phêk thar min pe a. ‘A lainatna chu a kang ngai lo a ni’. Tuktinin a lo thar ṭhin. Chutichuan, beiseina leh a chhandamna tur a nitin lo nghah veng veng mai chu kan tana buatsaih sak kan ni. Chutiang buatsaihsak kan ni chungin kan tum reng vang emaw tihpalh leh hriatlohna avangte’n kan tisual reng mai si. Nimahsela, kan Lal Isua Krista chuan a phêk thar nitinin min pe mai ni lovin nitina hamṭhatna dang dang min la pe tel zel te hi a va lawmawm tak em!

Kum 2020 chhunga hripui lakah te Lalpa’n min chhanchhuahna zawng zawngah te A hnenah he kumthar 2021-ah hian lawm­thu i sawi ang u. Kumthar zinga Tlaizawng, Siamtu chawimawi tura a theihtawpa a lo parvul em em ang mai khan, hma lam panin kumhluia kan thil ṭha lo tih te kalsanin, ngaihtuahna thar nen he kumthar hi i hmachhawn ṭheuh ang u. Rinnain he kumthar hi Lal Isua nen a invuan tlatin a thutiam ropui tak chu chang ngei turin nitin ke I pên ṭan ang u khai! 

“Thil hluite chu a ral ta, ngai teh u, a lo thar ta” (II Korth 5:17)

- Vanhmingliana (Taua), Dawrpui