Mitthi puan leh pangpar pêk kan uar lutuk i ti maw?

A petu lam aṭangin eng nge kan tih theih le? Ngaihtuah tlân atan aw.

Mizote chin dan ṭha tak mai, mî an thihin an chhungte hnêm tur leh kan tuarpuina kan tihlan nân pangpar leh puan khuhna tur kengin mithi in lam kan pan thuai ṭhin. Mizo ze mâwi tak a va ni em! Tihtâwp phal chi rual a ni lo. Tih dan mawi tak, tih zui reng tur a ni.

Mahse, thil ṭha nîa lang, a tam lutuk (over) châng chu a awm ngei alawm! Mi tih dan entawn vang maia puan leh pangpar pe kan tam a ni ber. Mi tam takin puan leh pangpar tam an ngaihmawh thu ziak an awm mêk reng a, tidanglam hret theitu kan ni ṭheuh tih hre rengin aw.

Keini a pêtu lam rilru sên deuh ṭha nia ka hriat ka lo sawi ve ang e.

Kan mi hriat leh ngainat takte an thihin, an hmêl phûm bo mai tur va hmuh ve ngei kan duh ṭhin. A châng chuan, mipui tam kârah kan lokal ngei a ni tih lusûn chhungte hnenah va inhriattir pawh ṭul viau châng a awm thei. Hêng hunah hian engmah keng lova ruang va bih inthlahrun vanga zahzêl atan puan leh pangpar pêk kan uar a ni thei. Hawht’u, huaisen taka ruang bulah kut hma lamah suihin zahna chibai bûka va din zawk chu i ngam ang u.

Hmeichhe tan zahzêl tel lova luh kan la harsat viau chuan pangpar kuang khat lek hi a man a tam lo va, a âwmah ka dah ve mai hi intihhmuh ang u. Pangpar kuang mal hi thlâna zuk thlâk atan mitthi chhungte’n kan intihhmuh mêk a ni tho va, a man tam lo. Ṭhiante nen rose fresh tel khat inlei ṭawmte pawh ching ta ila. Puan leh pangpar bouquet pe ho hian râlna pawisa an pe lo fo. Mitthi chhungte tan pawisa a hlû êm êm a ni. Damlo rei deuh tan phei chuan râlna pawisa pêk ngei hi i ching zawk ang u.

Chhungte leh ṭhian ṭha bikte chu puan emaw, pangpar emaw pêk ngei kan duh thei a, hei hi mimal zalênna ni se. Hetiang hunah hian tih dan ṭha deuh chu, pâwl anga mithi râlna atan bungbel emaw, banga tar chi emaw, anmahni hriatrengna thil hlu kan inpek ang hi, mimalah pawh kan ṭhian ṭha bik chu bungbel leh a dang, hriatrengna inpek pawh tih chî tak a ni.

Ngaihtuahna hman ṭul chu, mitthi chhungte dinhmun azirin pangpar leh puan pêk lam chu thliar thiam ila. Mi hausa leh awm theite chuan pangpar leh puan dawn tam an inhmeh a, pawisa lamah an buai lo tih hriat sa chu, râlna aiah chawimawi nan pawh puan leh pangpar pêkah buaithlak awm lo se. Puan an dawn tam pawhin an sem chhuah zâr lo zotu tur an tam a ni mai a. Bible-ah pawh a nei tam pek belh thu pawh kan hmu alawm. Milian leh ropui te, chawimawi phû te an awm a, thîk lo ila.

Kan vêngah ṭheuh mi harsa zâwk leh pangpar dawn tur nei tlêm turte erawh chu pangpar pe bawk, râl bawk ching thung ila. "Heng mi tê ber chunga tite hi keima chunga tî in ni" tih Lal Isua thusawi kha hre reng ila.

- Pari Varte