MIN CHOTU CHU TU NGE NI?

Tu nge mi chotu chu? Engtin nge ka lo invên ang a, engtin nge ka lo chhan ang? Kuttum nen em ni ang? Hnai lo ve. Min chotu chhân lêt nana kuttum emaw, silai emaw ka lek a nih chuan, â tak, mahni chhiat zelna tura thil ti ka ni ngei ang. A nih, engtin nge ni ta ang le?

Tunlai khawvel thiamna sân lutuk tawhnaah hian mi account rawk te, pawisa tipung vak tura insawmna te leh social media Whatsapp, IG, Facebook, adt hmangtute tibuai theiin ze hrang hrang nei bumna ang chiin he pa pui roh (AI) hian thil ṭha tam tak a tih laiin, kawng lehlamah ve thung chuan a ze pâwnlâng a rawn chhuah hmasa a, chu chu kan lo hma chhawn ta zeuh zeuh ta a nih hi. Hetiang hi thil lo awm tur reng a ni. Daniala lehkhabuah pawh, "... mi tam tak an tlân vel ang a, hriatnate a la pung dawn a ni..." tih thu kan hmuh hi (Daniela 12: 4b&c); chu hriatna pung ta vak chu Pathian ropuina a ni fo mai ni lovin, a huat zawng tak pawh a tel zel ang tih hi ringtute tan hrilh lawk ngam a ni.

Tunlai khawvela mipuite hnena dikna thlentirna dan leh hrai peng hrang hranga finna siam chawp emaw, mihring lem, a ṭhen azar hman a nih tawh chinah hian dan siamtu, hmangtu, lekkawhtu leh thubuai, hlabuai remtute chotu a lo awm thei ta a; chu chu engtia tih tur nge ni ang tia inrawn khawm a ngai ta a ni. A nih leh chu'ng chonate chu khawi aṭanga lo kal nge tih kan inzawt nghal ngei ang. A chhânna chu, computer hmanruaa hna thawh dan hrang hrang algorithm-ah hian a awm. Ṭan lam nei nghal programme siam sa ' algorithmic bias' an tithe chu mihring lemin kawchhûng dum lai 'blackbox' a neih si avanga a thu tihtluknaa thil inthup leh lang tlang lo a awm theih vang te, state sawrkar inrelbawlnaa dan awm sa dik tawk lo awm theite lâk sawn a hnêka tinghet zawktu a nih theih avangte a ni.

Hengte hi Artificial Intelligence (AI) hman tak tak hmaa lo chinfel vek tur a ni. AI-in a dân awm sa intluk tlân lohna awm palh leh awm sate a ṭha zawnga thlak danglam ahnêkin a rawn tihngheh zawk dawn avangin inven lawk a ngai a ni. Dik taka ro relna dodal theitu dang leh chu, a dik a dawk thlu lova AI-in hna a thawh dan kuah khawma thununtu dân rel (legal framework) awm loh vang te, hre lo turte pawhin an lo hriat pawisakna nei hauh lova mimal thurûk a lo sem chhuah ve ngawt theihnate leh AI rorel a chunga mawhphurtu bel chungchangte chu ro reltute kalhtu, a rûka chona, chhâng let tura kan la inpeih si loh, dan siamtu leh lekkawhtu, thubuai remtu leh dan hremi (lawyer)-te hmaa chona inchhawp thar chu a ni.

Chotu chu

1. Hleihneihna leh fair lohna (algorithmic bias): He mihring lem taksa leh kawchhunga hna thawhtu pêng hrang hrangte hi hriatna (data) awm sa ringa hna thawk an nih avangin, henga thil lo awm sate hi intluk tlan lohna leh hleihneihna lam hawi a nih hlauh chuan, chungte chu a thu tihtluk nan behchhanin a hmang nghal a, siam rem hna thawk lovin a awm sate chu a tinghet zual sauh dawn a ni. Entir nan, sawrkar inawpnaah hian hna hniam lam group D adt hna ruak dil thei chin hi bithliah ila, a pawl sang ber berte thlenga diltir lovin, lehkha zir zata a dil âwm takte chauhvin dil theih ni se. Chuti ni lova hna ruakah a pâwl sang apiang kan la ṭhin a nih chuan mi lehkha zir hniam zawk pawl 8, pawl 10 leh 12 adt chu graduate, master degree, doctoral degree, adt neite’n an luahlân kumkhua mai ang. Tichuan, hna an hmuh hunah hna ṭha dang zawngin an buai leh ang a, mipuiin office an dawrin, ‘A awm lo, chu chu a exam...,’ tih ang te, pisa tibuaitu hi kan siam tam tial tial palh thei. Hna hrim hrim hi a dil thei tur thiamna hlawm khawm (qualificational group for candidates) hi siam ni ta se.

Pahnihna, technical training kum 2/3/5, etc nei tawhtena direct-a hna an dilah hian training inang leh qualify rau rau zîngah chuan training nei hmasa leh upa zawk, ni danga hun ṭha nei tlêm zawhte tana (ruat sa reserved ni si lovin), interview-a thlan dana tlema bûk rihtirna dan dik (fair regulations) kan siam chhuah theih a, a junior-te hnâwl si lova thlan dan ṭha 'judicious judgement & selection' ang chi kan ruahman theih phawt chuan hetiang hi bias a ni lo ang. Hei hi entirna mai a ni, kan ûm (comment) zui hman rih lo vang.

2. Lan tlang lohna leh sawifiah theih loh (lack of transparency and explainability): Artificial Intelligence hian pumpui lang tlang lo (blackbox) ang chi hi a nei hrim hrim a, hei hian hleih nei taka thu tlukna a siamtir thei. Mahse, khawvel thiamnain hei hi a siam ṭha thei ang em tih chu ngaihtuahna tithuitu a ni reng.

3. Mimal thurûk himna (data privacy and security): AI hian mimal thu rûk thlengin, a hna thawh nan hriat tur tam tak a mamawh a. Hetiang mimal thila pawi thei ang chi leh dan phal loh thil huanga a va luh rûk dûk dûk loh nan, a zawm ngei ngei turin dân (legal system) pawh hemi chona hma chhawn thei ngei tura siam ṭhat ve zel a ngai a ni.

4. Thil tiha mawh inphurhtirna (accountability and liability): AI hian mi dangte pawi lo khawih ta se, tu'n nge mawh phur ang? A siam chhuaktu (developer) nge, a hmangtu nge, a kawchhung (system)? Dân lên hrui phiar (legal system) chuan heng mihring lemin thutlukna a siama thil sual a tih a, awh/man chhuah a nih theih nan hna thawhnaa a hmanrua leh a mawh phurhna leh hrem theih a nih dan zawng zawngte siamin ram ri a khamsak vek a ngai a ni.

5. Mahni hna thawha neitu nihna hauh theihna (intellectual property and copyright): Zaimite, thu ziakmite, lem ziakmite leh mi tam takin an thil tih chhuah achu'nga thu an neihnate hi AI-te hian copyright chungchanga zirtirna pêk an nih lai hian an dai lut vê mawlh mawlh a. Chuvangin, he mihring lem hian hna ropui leh mawi tak (creative works)–rimawi (music) leh a dangte a siam chhuah ve theih avangin a thil deh chhuah chu tu nge a neitu dik tak (copyright owner) ni ta ang le? Tunlai dan chipchiar tawh hunah hian hei hi chona tling a ni bawk.

6. Mihring rorel leh court indaidanna a nghawng dan (impact on human judgement and judicial independence): Mihringte hian an ro rel nan leh thu tihtluk nan AI-a an innghah lutuk chuan an thiamnate leh fim taka thu an tih tluk theihna te chu a ti kiam ngei dawn a, chu chuan dikna nihphung dik tak (quality of justice) a tihhniam theih dawn avangin dan hmanga rorelna tlatfâlna/indaidanna (independence of judiciary) a tidanglam thei dawn bawka hriat a ni. Chuvang chuan, mihring ro rel thiamna tihhniamtir lo emaw, luahlantir emaw lo va dan hrui zamte chu ruahman zel a ngai dawn a ni.

7. Dân leh hraia thil hmaihṭhelh awm leh chian lohna (regulatory and uncertainty): AI ṭhang zel hian ama hnathawh nan mihring dan hman lai ṭhang zelte hi a lehpelin, a duh ang angin a hmang mai thei zel a. Hei hian hriat lohna khawvelah min rawn chêntîrin, AI hmangtu sumdawng pawl leh mimalte chu dan zâwm chunga thil hlauhawm sut tur (legal risk) min siamsak phah a ni.

Hmasawnna kawng zawh zelin, he'ng min chotu kan sawi zawng zawngte hi pumpelh theih ngawt a ni dâwn lo va, thiam taka hma chhawn thei zel tur hian dan siamtute leh mi tin kan inlâk fit ve zel a ngai dawn hle mai.

– Dr J.T.Vanlalngheta

ADVOCATE

Writer's Lexis & Law