Repost lovin report rawh

Tunlai khawvel digital age-ah hian awlsam takin tu pawhin digital content kan siam zung zung thei a. Chung kan suangtuahna ziah chhuah, thlalak, video leh a dangte chu mi hmuha pho chhuah mai theihna social media platform hrang hrang youtube, facebook, instagram, whatsapp leh a dangte kan nei bawk.

Tun hmaa tu khaw-kha hriatpui loha kan phun lungawina ṭhin ang kha mi zawng zawng hmuh theihin kan tar lang zut zut a. Ram inrelbawlna chungchang, mi dangte nena kan inlaichinna, keimahni leh mahni inkar thlengin social media-ah kan post ta chuah chuah mai. Ni e, kan account-ah na na na chuan danin a phal chin duh duh kan post a, kan post thiang bawk. Tin, tu pawhin chunga duh loh zawng, hmuhnawm leh ngaihnawm tih loh zawng kan hmuh fo chuan kan mute-in, kan unfollow thei a, duh leh kan block thei bawk.

Ti hian ngaihtuah ta ila, heng thlalak dukdak vak lo, thu chhiar nuam fahran lo leh thil dang dang siama mahni account-a post-tute nge huatthlala zawk a, vantlang hmuh tura rawn suan chhuah ching ho hi. Vantlang hmuh atana mawi lo nia kan ngaih tam tak, thu, thlalak leh video siamtute kan dem a, kan chuk luai luai lai hian, a boruak siamtu, a tipunluntu zawk hi kan hmuh hmaih si em?

Heng content siamtute aia kan vei tlan tur nia ka ngaih chu–mi fing fel leh zahawm tak nia kan ngaihte zawkin chung mite’n an follower-te tan liau liaua an siam vantlang hmuh theiha an rawn tar chhuak leh chut ṭhin ho hi. Chhuanlamah heng hi a ṭha lo a, kan ching tam tur a ni lo tiin mipui thil ṭha min zirtir an tum a ni thei; mahse, heng ho hian a original content creator aiin pawi an khawih nasa zawk fo.

Mi hmuh atana mawi lo ti si, kan repost avanga thil ṭha lo thleng ṭhin te:

• A tipunluntu mai kan ni: Tu pawhin eng pawh ama mimal account-a a post hian, a hmu duhtu amah follow-tute’n anmahni duhthlanna ngeiin an lo thlir ṭhin. Chutihlaiin, chu thil chu i ngaimawh a, i ngaimawh thu tlangaupui nana vantlang awmna hmuna i rawn suan chhuah chut khan, khang hmu ve duh lem lotute hmuh tura tlangzarhtu chu nangmah kha i ni. Hetiang tih i chin fo chuan bawlhlawh a bâwm aṭanga phawrha khawlaia paih darh ṭhin nen in inang thawthâng tihna a ni.

• Thil ṭha lo ngaia neihna: Hetianga tu emawte’n mi nazawng hmuh tura an post ni lem lo, vantlang hmaa kan ṭheh sek avang hian kar loah ngaia neihna a lo awm ṭhin. Hei hian kawng chi hnihin pawi a khawih thei a. Pakhatnaah chuan hetianga repost/forward hi thil narân ve mai a ngaihna a lo piang thei; a pahnihnaah chuan mi tam takin heng kan lo hmuh hian khuareiah a tur ve rênga ngaihna a lo piang a, chu chuan vantlang chhia leh ṭha hriatna a ṭha lo zawngin a kaihruai nasa a ni.

• Kan kutin miin rûl kua an zen reng thei: Mipui kan thuhmun vek lo tih ang khan, kan repost/forward-sakate hi thinrim awrphiarin a ṭhen chuan court-a khin hial min duh maithei. Chutih rualin, repost/forward châk reng renga hetiang tih ching an lo awm ve thei bawk. Hetia kan repost/forward sak hian eng anga sawiselna ṭawngkam bungraw ṭha leh an thu leh hla vawthla nalh viau pawhin inhre mah ila, a hmutu leh ngaihven an pun phah dawn hrim hrim. Chuvang chuan, a khawi ve veah pawh khian repost loh chu a ṭha ve ve tih kan hmu thei ang.

Engtin nge kan tih ang? ‘Repost’ lovin kan ‘report’ ang! Hetiang thil kan hmu a nih chuan repost/forward kual lovin report-na platform aṭang khan report zung zung ila. Chuti chuan buai nuaih nuaihna tam tak hi awlsam tein kan pumpelh dawn a lo ni.

Hetiang thu leh hla, thlalak leh video duhdaklo siamtute mawhphurna hi sawi nêp kan tum lam ni loin, a siamtuin kângmei a chhuah kha a pawi tawh tehlul nen, i va thehdarh khan kâng ṭhelh loin a alh i tipunlun tihna ang a ni. Sawiselna ṭawngkam nen share in, thil ṭha tia kan ingaih lai hian, a tipunluntu hi kan ni zawk thei tih tar lan tumna a ni.

Social media awm dan mawi tam tak kan hre tawh a. Veng chhung, hnathawhna hmun leh chhungkaw whatsapp group-ah tak ngial pawh mahni irâwm chhuak ni lo, mi thu leh hla nazawng, a pawi leh pawi lo chenin mi pangngai chin chuan kan thawn darh vak vak tawh lo.

I share hma khan ngaihtuah nawn la, a heksak lo tih vang khan ‘repost’ zung zung lo la, a chang chuan ngawi renga ‘report button’ hmeh kauh kauh kha a sawngsawhlawt zawk fo tih i hre thar leh ang u.

- Jonathan Lalrinmawia, ITI Veng