Kan mamawh khawpui fai

Ministry of Housing and Urban Affairs (MoHUA) buatsaiha India rama khawpui fai inelna, Swachh Survekshan Award 2024-2025-ah Lunglei khawpui chuan state award pakhat, Mizoram khawpuite zinga faina kawnga hma hun êng ber lawmman 'Promising Swachh Shehar Award' a dawng a, a lawmawm hle.

Hetihlai hian faina lama kan khawpui ber Aizawl dinhmun erawh ngaihtuah ngai tak niin a lang a, mipui mimir kan chet velna hrim hrim hi chu lo dah ṭha ta ila, in leh lo, dawr neitute, a bik takin kawngpui kama mite chet dan hi uluk taka zirchian ngai niin ka hria.

Aizawl khawpui kawngkama in chhawng sang tam tak, tui chhe peihna nei ṭha mumal lo, ṭhenkhat chu pipe hlui tawh tak tak hmang, 'leak' tenawm tak tak a awm nual mai.

Hengte hi kea kal te leh two wheeler khalhtute tana tenawm tak, inchei taka khawilo chhuah dawn a, chutiang leak-in a per chu kan awm tawh nual mai thei, hengte hi kan AMC lam hian ngai pawimawhin hma la thei se, a duhawm ṭhin ngawt mai.

Tin, dawr leh kawng kama in tam tak hian, kan dawr/in bathlar vel kan phiah fai hian, bawlhhlawh bawma rut mai lo a, kawngpui lama phiat thla a, midang tana hnawk siam hi kan awm fo bawk–hei pawh hi vei awm tak a ni.

Kawng kama insakna bungrua zuar tam tak pawh hi ngaihtuah ngai tak chu a ni. A bik takin cement, balu leh brick zuarte hi mipui vei vak tana hnawksak ni thei an ni.

Ṭhenkhat chuan an cement zawrh an hralh chhuah dawnin, kawng kamah motor-ah dim lo takin an dah a, a khu leng vel bal tak chu office/college/school kal tur, fai taka incheite tan ngeiawm thei tak a ni–insakna bungrua kawngkama load leh unload hun hi, mipui veivah tam loh laia ti tura ruahmanna felfai tak siam chi a ni em? tih pawh hi kan khawpui enkawltu lam hian uluk taka zirchian ṭul a ni.

Tun hnaiah steel fabrication nei ṭhenkhatin, mipui kalna tura duan, footpath zah lo taka, hna an thawk mai lai video-te pawh hmuh tur a awm leh zel a, heng zawng zawng hi dan kengkawh tura kan beiseiten dan an kengkawh ṭhat tawk loh vang niin a lang.

Mizoram pawn lam miten khawpui nuam leh mipui hawihhawmna hmun, India khawpui dang ang lo tak nia min sawina hi chawi nun lehzual a nih theih nan kan khawpui tiṭawp leh hmel tibal thei hengte hi AMC lam hian ngaihtuah se, a rang lama hmalak dan tur duang thei se a duhawm tak zet a ni.

- Robin H.