Pathian biak inkhawm chungchang

Tunlai hian Mizo ṭawng ziah dan chungchang zir hona Mizorama kohhran lian ṭhenkhatah neih a nih thu ka lo hre ve a, lawmawm ka tiin, Mizo ṭawng ziah dan kan inzirtir mek laiin, ṭawngkam kan hman dan chungchangah Mizo ṭawng kan hman dik zel dan tur pawh hi zir hona nasa zawk a kan neih a ṭul hlein ka hria.

Tun ṭumah pawh hian Pathian biak inkhawm neihnaa chanvo nei ṭhin ṭhenkhat, a bikin Pathian biak inkhawn hruai ṭhinte’n ṭawngkam an hman dan chungchang tlem azawng ka rawn thai lang a ni.

Pathian biak inkhawm hruaitu ṭhenkhatte hian an ṭhutna aṭangin an lo ding chhuak chiah a, ‘Kan lo ṭan dawn tawh ang a,’ tiin emaw, ‘Kan lo ṭan tawh ang a,’ tia ṭawngkam hmang hriat tur a awm leh ṭhin. Chutianga ti tawh lovin, ‘Pathian chibai i bûk ang u,’ tiin emaw, ‘Pathian thu i lo ngai thla ang u’ tiin emaw hman ni zawk se. Pathian biak inkhawm ṭan tawh hnua ṭantu han sawm leh ṭhinte hi a fuh lo mai thei. Pathian biak inkhawm kan ṭan tawh chuan ṭantu dang sawm tawh lovin, entir nan, ‘Baibul chhiara hun hmang turin Pu K Lalnghakliana i lo sawm ang,’ tih ni se.

Thawhlawm tih leh thilpek tih chungchangah pawh hian ngaihdan a inang lo hlawm mai thei. Tun hma khan kohhran ṭhenkhatah chuan Pathian biak inkhawm hruai ṭhinte’n thilpek tih leh thawhlawm tih hi an hman pawlh ṭhin a. Tun hnai deuh aṭang khan thawhlawm tih hi hman tam zawk a lo ni ta a. Hemi chungchangah hian kei ka ngaihdanah chuan, tun hma aṭang khan thawhlawm tih ṭawngkam hi Pathian biak inkhawmah hian hman zel atan a ṭha ka ti.

Pathian biak inkhawma thusawitu/thuhriltu ṭhenkhatte’n thusawina, thuhrilna an neih hmain emaw, thusawi/thuhrilna an neih zawhah emaw, Pathian hnena an ṭawngṭai hian, ‘Aw Lalpa min hmangaih ṭhintu,’ tia ṭawngkam hmang an awm ṭhin a. Ṭhintu tih ṭawngkam hi hmang tawh lovin, hmangaih tih lai hi kan hmang duh a nih pawhin, ‘Lalpa min hmangaihtu’ tiin emaw hman zel ni ṭhin se.

Tin, Pathian hnena kan ṭawngṭai a, thil kan dil hian, ṭawngṭai kan tihtawp dawn hian, ‘Chung zawng zawng chu kan Lalpa Isua Krista hmingin kan dil a che,’ ti duah lovin, ‘Isua hmingin chung chu kan dil a che,’ tih ṭhin ni bawk se. Hei hi thusawitu/thuhriltu tan bik chauh ni lovin, baibul chhiara hun hmangtu te, thawhlawm hlan ṭhin te leh inkhawm hruai ṭhinte pawhin kan hman tam a ṭha khawp mai.

Pathian biak inkhawm kan bân dawnin emaw inkhawm hruaitute’n entir nan, ‘Kan hun tihtawp nan’ emaw, ‘Kan hla hnuhnung atan’ emaw tia ‘Hla i lo sa ho ang u,’ ti lovin, ‘Pathian kan fak leh kan chawimawi nan’ tih ṭhin ni se.

- George L.Ralte, Vaivakawn