Ka pa pu ka hre lo

Dr. Jekyll-a inpuanna anga ropui leh hringnun nghawr nghing lawih khawp puan turte nei lem lo mah ila, ka chanchina thil inthupte hi ka han sawi chhuak teh ang.

Ka pa kha pa thlir thui ang reng tak a ni vein ka hre ṭhin a. Kan khuaa zirna sikul awm bakah khaw thenawma ka ûteho lehkha an zir lai khan an la tê viau mai a, an kal thlen zawh loh avanga nghawngkawla ka pain a phurh chang te pawh a awm a ni awm e. A sawi fo ṭhin chu, ‘Lehkha in thiam loh chuan keimahni ang hian in la rawn rethei ve palh ang, ṭha deuhin zir ṭang ṭang rawh u,’ a ti ṭhin a. Khaw ṭhenawmah a theih ang angin min dah ve hram hram ṭhin. Kan û Rinenga fapa upa ber phei kha chu, a pa Thankhuma, BA (MA zawk nge ka chiang ta lo) pass leh a pian a inhnai vai deuh va, chumi chawi chuan Zirthanga a sa hial.

Khati taka pa dawn thui ve si khan a pu hming min hrilh nachang hi a lo hre lo nge maw ni, ka pa pu hi ka hre hauh lo mai. Keima mimal, chhungkua leh office lama ka mawhphurhna hrang hrangah pawh hmasawn duh mi ka lo ni bawk nen, hetiang thil hlui hi ka ngaihtuah vak hman lo ve hrim hrim a; thlahtu lama ka chian loh dan hi chiang tak a ni, zia lo khawpin a ni ka bo ni.

Hengte vang hi emaw ni dawn ni, chhungkhat han tlawh chhuah tih vel, mahni chipui han chû ê khâ vel hi ka ngaihven zawng a ni vak lo chho va. Hnamah hian ka chiang lo te pawh a ni ber awm e. Shillong-ah YMA lama phak tawk tawka kan inhman ve lain group YMA committee-ah hnam chungchang kan sawi a. “Kan sap missionary-te khan A AW B hi min siamsak lovin A B C neituah hian min lo siam ve mai se la, sap ṭawng neitu hnam kan ni ve mai tur,” ka ti pek a. Ka kianga mite an hawi he haw! Ka hetih vang hi a ni ang, chi leh kuang, hnam chhui chhui maiho kiangah hian ka awm peih vak lo.

Tunlai chu heti lam hi kan sawi kan sawi a, hman ni Facebook-a putar pakhat an kawm, hnam leh ṭawng tih vel intihre deuh mai pawh, ka va comment ve a, “Nangni ang chi, hnam leh ṭawng chhui chhuiho hi kan hnam inunauna tichhetu in ni tih inhria u la ṭha tur,” ka va ti nghe nghe a. Lehkha ziak peih tak tak, chu lai kha laia kan awm lai chuan chumite chu chutah an awm a, anni chu chutiang an ni a, keini chu hetah tih vel mai mai ziak ziakho hi pi leh pu aṭanga Mizorama awm hlun an ni duh lo khawp a. A rama awm hlunho lah hi, a khaw hawi zim zawng, a ṭawng thiam tlem zawnga intih Mizo kan lo ching deuh bawk nen, kan lo chung en thuai a, ka chawimawi e te hi kan han ti leh lawi ṭhin bawk si a!

Thufing inziah khawmna bu, nunna bu Bible bawk hian belhchian a dawl leh ṭhin, “Thawnthu mai mai leh thlahtute hming chhui sen loh chhui bansan rawh se; chung chuan rinnaa Pathian lama intihsawtna thlen lovin inhnialna mai mai a thlen zawk si a,” (I Tim. 1:4) a lo ti fel et mai. Chutah pawh kan lo awm tawh a, chu chu kan ni a, anni pawh saw chu chu an ni awm e tih vel, hriat phak loh sawi sawi ai chuan, Mizoram leh a chhunga chengte hi engtin nge intodelh taka kan khawsak ang a, engtin nge he ram Pathianin min pek ram hi kan tihhmasawn ang tih ngawt hi ngaihtuah ila. Mi tinin mahni in chhungah chaw ṭha ei tur leh tui in tur thianghlim leh power hnianghnar takte hmu ila. Education leh health care te ṭha em em se la, kan ṭhalaiten job nei bawk se la! ‘Mizoram second hand car chu a ṭha, an kawngpui a mam reng a,’ an tih turin kan kawngpuite hi mam ṭha se la a tha mai e. Nangni pawh in ni ve a lawm kan tihte’n, ‘Kan ni lo’ an tih chuan pawm mai ila. Mizo nihna hi ‘trade’ a ngai ve ngai lo, ‘In ni ve lo’ kan ti chung chung pawha ‘Keima chu pi leh pu pawh Mijorama piang bek lawm’ ti lawm lawm chunga Mizoram leh Mizo nih thlahlel ve ngawih ngawihtute nen hian chanvo inang tlangin he ramah hian Isua hming hi fakho ila a ṭha maiin ka hre ta.

Bethlehem Venga Thazuala Pa pawh hi ṭum khat chu kan office rawng hnawih turin ka zuk sawm a. Non Mizo inkhawmpuia a lâm nasat lutuk avanga hna a thawh peih loh thuin min lo chhang a, ka ngaihtuahna a kal thui hle. Rawng hnawiha eizawng a ni, sum hmuh theihna a nih dawn phawt chuan Mizoram leh Mizote chhiat vekna tur pawh ti hreh lo ang hi a ni lo. Chawlhni zana Pathian faka lâm nasat avanga Thawhṭana hna thawh peih loh lai kha ropui ka ti. Thazuala Pa hi Pu Das-a a nia!

Ka ‘Home away from home’ ka tih ve, Seṭhawn kan kal changa Bualpuia kan Nepali unaute hotel-a chaw han ei a, masala flavoured chicken curry chaw chawm chunga nimbu tui han sawr sak te tui ka tih danah mahni pa te pu pawh hre lo awm reng chu ka lo ni e. Anni hovin hmanlaia Bualpui khaw awm dan ka hriat phak lohte min hrilh chang phei hi chuan, ‘Ka pa’ tia pawm nawlh mai te hi ka duh ṭhin. Ka pa pute khan sanpiau hi tui an lo ti viau pawh a ni mahna, kei chuan ‘Sukha roti leh chicken curry’ tui ka ti zawk tlat si, ka pa pu pawh ka hriat si loh!

- Paula Pu