CHHUNG INKHAWM

Mizorama political party-te hian an party office-a chhung inkhawm an hman ṭhinah hian rilru leh tih tak zeta Pathian chibai bûkna tak taka inkhawm an niin i hria em? Nge, an party sawi mawina leh party dang sawi chhiatna inkhawm a ni zawk lo maw? Heti anga hmang mai an nih chuan chhung inkhawm ti lo vin, party inkhawm ti zawk se la, a inhmeh zawk i ti em? "Pathian chu Thlarau a ni a, a chibai buktuten Thlarau leh tih tak zetin chibai an buk tur a ni," (Joh 4:24) tih a ni si a.

Kristian chhungkuate’n chhung inkhawm kan neih hian mite sawichhiatna huna hman tur a ni ang em le? A ni lo vang ti rawh u. Pathian chibai bûkin a hnenah kan chhungkua bawhchhiatnate thupha chawiin, a ngaihdamna kan dil ang a, a hnenah kan inhlan tharin, eng tin nge hma lam kan pan zel ang tiin kan kal zel dan turte kan sawiho ṭhin tur a ni dawn lawm ni? Chuti lo a, chhung inkhawm kan hman ṭhinah hian mi ṭhat lohna te, mi chhungkua fel lohnate sawi nana kan hman ṭhin chuan, kan chhung inkhawm chuan Pathian kan tilungni lo zawk ngei ang le.

Mizo Kristiante hian chhung inkhawm kan ur ta hle mai a, chhung inkhawm nei tur pawhin kan infuih nasa hle hlawm a nih hi. Chhung inkhawm hi thil ṭha tak a ni a, nimahsela, tih takna nei miah lo a, kalphung pangngai anga hman mai mai theih a ni. Mizote hi lem chang thiam tak kan ni an ti a; mite hmuha Kristian chhungkua ṭha tak anga lan tumna avanga lem chan nan chhung inkhawm hi hmanrua atan hman mai theih a ni awm e.

Chhung inkhawm hmang ṭhin Kristian chhungkuate hi kan inenfiah a ngai hle a ni. Tute emawin chhung inkhawm in nei em, tiin min zawt ang a. Nei lo, tih chu a zahthlak ang tih vanga a hming maia takna awm si loa chhung inkhawm hi hman ve mai mai theih pawh a ni. Engtin nge, Pathian thuin min hrilh kha, "Naute u, thu chauhin i hmangaih suh ang u, lei chauhin i hmangaih hek suh ang u, thiltih leh tih tak zetin ni zawk rawh se, (1 Joh 3:18) tiin min hrilh a ni. Chuvangin, chhung tinte hian chhung inkhawm hi lem chan nan mai hmang loin Pathian pawlna tak tak nen hmang ṭheuh thei ila chuan, kan ram hi sualnain min sawisak nasat ang em em hi chuan min sawisa ngam lo mai thei a ni.

Mizoramah hian chhung inkhawm hi chhungkua chang ni loin political party-te pawhin chhung inkhawm an ching ve ta zel chu a ni a. Nimahsela, heng political party-te hian chhung inkhawm kan tih ṭhin chhungkuaa Pathian chibai kan bûk ang hi a phawk zo chiah em tih hi zawhna awm thei tak a ni awm e. Political party-te hian an chhung inkhawmah hian a bul ṭan nan Pathian thu thianghlim chu an chhiar ngei mai. Amaherawhchu, a zawmna erawh chu party dang sawichhiatna leh mahni party sawi mawinain an chhunzawm tlangpui ṭhin. Hei hi thil kalphung pangngaiah an ngai ta mai niin a lang, a pawi hle a ni. Kohhranin chhung tinte chhung inkhawm hmang tura kan inzirtirna tineptu chi khat a ni thei a ni. Chhung inkhawm an hmang duh tak tak a nih chuan an party-in an lo tih dik tawk lohte Pathian hnenah thupha chawiin ngaihdam an dil ang a, kan ram leh hnam Pathian duh dana kaihruai an tum dante Pathian hnenah thlein chumi ti thei turin malsawnna dil chungin in inhlan thar zawk tur a ni dawn lo'm ni?

Mizorama political party ṭhenkhatte hian Pathian thu hi inchei nan leh mite hip khawm nan chauh an hmang emaw tih tur a ni a. Nimahsela, rorelna ṭhutphaha an ṭhutin Pathian duh dan anga rorel chu an hlat hle ṭhin a nih hi; a pawi hle a ni. Engtin nge kan Pathian thuin min hrilh kha, "Mi tam takin Pathian thu hi mite buma sumdawn nan an hmangin keini zawngin kan hmang ve lo va, tih tak zet zawkin Pathian ṭih zawkin Pathian mit hmuhin Kristaah chuan thu kan sawi ṭhin a ni (11 Kor 2:17) ti thei ṭheuh ila a va duhawm tak em.

- Hausanga Hauzel