THE BIBLE SAYS SO!
Kan Zoram hi kan han thlir a, lungawi a har hle. India ram pum hna lian inelna UPSC lamah kan hniam ta em em a, hriselna lamah kan hniam em em. Cancer vei nasa ram, AIDS hrik darh chakna ram, pawngsual tamna ram, India rama kum tling lo pawngsual tam berna, HIV pawh inngaihna sual vanga pung nasa nihna ram. Mipa ṭhalai thih tam em emna ram kan ni. Hei hi hnam ral tur kalhmang a ni mithiamte’n min tih khum leh nghal nen. India rama nupa inṭhen tamna ber kan ni bawk.
Kohhran lam han thlir ila, nun thianghlim kan tlachham em em a, Krista kan thianghlimna a nih hi (I Kor 1:30) kan sawi deuh reng ringawt a. Thianghlimna thu hi khawmpui thupui atan pawh kan hmang mang lo a nih hi. Piangthar dâk thuaina ram, suala cheng reng chunga piangthara inchhal tlatna ram kan nih hi.
Bible erawh chuan, “Tu pawh Pathian hrin chuan thil a ti sual ṭhin lo,” a ti si (1 John 3:9). “Pathian hrin tawh phawt chuan khawvel a ngam zel si a,” a ti bawk (I John 5:4). Chhandam fa piangthar tak takte chu khawvel sual ngamtu leh nun thianghlima nung an ni ṭhin.
Bible chuan khawvel hneha ngamna chu Lal Isua kan rinna hi a ni e a ti a (I John 5:4). Heti reng renga kan khawtlang nun awm ta mai hi Lal Isua kan ring lo em ni ang? Zoram kristiante ngaihnat loh ber thu chu thianghlimna hi a ni. Khawmpui thupui atan pawh kan hman duh mang hauh loh hi. Bible sawi ang Kristian nih hi i tum ang u.
Pathian thuin, “Khawvel hnehna chu rinna a ni,” a tih laia ringtu intite’n khawvel sualna kan hneh lo em em si chuan a fel lo lai chu keimahni lam kan ni tih a lang ta a. “Lal Isua ka ring” kan tih hi kan lo ring tak tak lo tihna a ni ta a ni. Lal Isua thihna leh thawhlehna awmzia kan hrethiam a, kan awih a. Mahse, hemi mai hi chu rinna a ni hauh lo va; hriatthiamna, awihna, a dik tih pawmna mai a ni.
Rinna tak tak chu Lal Isua kuta inpek, inpumpek a ni tlat. Lal Isua lalrama luh (John 3:3,5), Pathian thu thua awm tura inpekna a ni. Thuhriltu ropui tak, piangtharna thu sawi ṭhin Billy Graham chuan, “I nun a puma (100%) i pek loh chuan Lal Isua’n a pawm lo vang che,” a ti ṭhin (Peace with God, 1953).
Chutianga Lal Isua ringtute chu he khawvel hi an hneh zel ṭhin. Khawvel hi mahni chaknaa hneh theih a ni lo. Khawvel hnehtu Lal Isua thu thua awm tura a chaknaa i innghah chuan khawvel sualna hi i hneh khawp ang. “Hei hi a ni khawvel hneha ngamna chu, kan rinna hi,” tih hi Pathian thutak a nihzia a takin i hre telh telh dawn a ni.
- Lalthanzuala Fanai