ZPM leh eirukna (lawmman)

ZPM MLA candidate te khan inthlan hma khan thutiam ropui leh lawmawm em em an nei a. “Chhung leh khat, mahni mi leh sa leh mi dang tute pawh duhsak bikna lakah ka inthiar fihlim ang” an ti rual dap dap mai a, a thlamuanthlak hle. Mahse, dawt sawi rual angah puh ta ila, “a dik” titu hi an tam zawk hial mai thei.

ZPM MLA candidate te khan eiru lo turin an intiam bawk a. A tirah kha chuan a thlamuanthlak a ni. Mi tam tak rilru pawh an hneh. Mahse, eiru lo tura an intiam hi a ho leh viau thei. Enga ti maw?

Inthlan hma khan Dampa bialtu Pu Lalrintluanga (L) thusawi ka hriat reng, ṭha ka tih em em chu, “Lawmmanah hian kel a chin chunglam chu ka la ve dawn lo” a ti. “Khaw pakhat VC -in thilpek atan ram min pek an tum a, ‘kel a chin chunglam chu ka la thei lo’ ka ti tlat si a. Ka nupui pawhin pawm ve mai kha a duh a, mahse, kel aia sang lawmman lak ka tum lo” a ti tlat. Ram zau tak an pek kha eirukna a ni lo, lawmman a ni. Mahse, kela chin chunglam lawmman lak loh a tum. Kan ram hruaitute mai ni lo, kohhrana rawngbawltute thleng hian Pu Rintluanga thil tih hi kan entawn atan a lo pawimawh hle mai.

Kan ram hruaitu hmasa te leh politician te hi eiruah kan chhuah vak vak ṭhin. An eiruk hi ka ring lo a ni. Tun laiin officer eiru, rorelnaa thiam loh chang an awm chho malh malh a. Mahse, politician eiru hrem tur an la awm mang lo. Zoram politician te hian an eiru mai mai dawn lo. Kan ram hruaitute kan hmu khaw lo lutuk hi chu a thim zawnga thil thlirtute thu leh hlain min hneh vang a ni thei. Chuvangin, ZPM MLA te hian eiru ve lo tura an intiam hi ṭha mah se, kan ram buaina chu eirukna ni loin lawmman lam zawk hi niin a lang.

Inthlan dawn khan politician pahnihin contractor hnen aṭanga cheng nuai 25 vel an dawn chungchang kan khel luih luih a. Eirukna a ni lo, lawmman a ni. Pakhat chuan a lawmman dawn kha a pe kir leh a nih kha. Kan ram politician te hausak thur thurna chhan hi an eiruk vang ni loin lawmman an dawng nasa lutuk hi an hausakpui zawk chu a ni ngei ang.

Lawmman petuten hna an thawk ṭha lo a, minister-in lawmman tam tham tak petu chu an hna ṭha lo mah se a enliam mai mai a ngai, a duhsak bik zui zel a ngai. Chu chu kan ram hian a tuar ta chiah a ni.

ZPM hian ram hruaitu dangte ang bawkin an eiruk ka ring lo. Mahse, ram hruaitu hmasa hausa thur thurte angin lawmman an la ve dawn em? Eiruk loh ai chuan lawmman lak loh hi an invenna tur zawk chu a ni. Lawmman lak hi eiruknaah ngai hmiah rawh se.

- Lalmuanzova Khiangte