Thawk rim turin inpeih ila

Lalpa’n a malsawmna Zion tlang aṭanga min pek tur chu kan thawhrimnaah a rawn enfiah a, chutah chuan min rawn thlen ṭhin a ni. Mi taimain a thawhrimna avanga malsawmna a dawn chu hma lam pana hmasawnna a ni a, mi thatchhiain thatchhiatna rah a seng erawh chu tlakhniamna panin a hnung lamah a tawlh kir ṭhin.

Tunlai hunah hi chuan eizawnna hi awmze nei taka kan kalpui a ṭul tawh a. Hmanlai hunah khan kum khat ei tur atan an thawk rim a, tun hunah hi chuan kum tam tak atan kan kalpui a ṭul a, chutiang atan chuan kan tunlai sawrkar hian a kalpui mek a. Ram hruaitute pawh rilru zelthel an put a thiang lo va, ngaihtuahna rim tak hmang chung zelin an tih tur duan chhuahte chu an bawhzui char char reng a ṭul a ni.

Mizote hi kan taima em em hlawm a, mahse, kan duham lutukna avangin kan thawh sên lovin hma kan la a, chumi avang chuan kan hmalaknate chu a lo phuailuaiin a felfai thei lo va; chu chuan kan thawhrimna pawh a lo hliah bo zo leh ṭhin. Duham tak chungin kan hnathawhnaah hma la fo lo ila, sawrkarin min ṭanpui a nih pawhin hlim takin thawkrim ila, min pui lo a nih pawhin mahni thawk rim ila Lalpa’n a malsawmna hlu dik taka thawkrimte tana a dah chu kan dawng ngei ang.

Thawhrimna chuan hlimna nun dik leh taksa hrisel leh rilru hriselna a thlen a. Mi chapote thil neih ve chu thawhrimna aṭanga an neih a ni ngai lo a ni. Mahni thawhrimna rah sengtu chu a nun a chapo ngai lo.

Tunlaiin sawrkarin mipuite hnenah eizawnna kawngah tih tur a duang chhuak hnem hle mai a; hengte hi thawhrimna tel lo chuan a hlawhtling thei dawn lo a ni.

Mahni hna chanpual hlen peih lo kan tam em em a, sorkarin eizawnna kawngah mipuite hnena tih tur a tlangzarhte hi mi harsa zawkte khai chhuahna turte a ni.

Heng tih turte hi hlen chhuah a nih theih nan sawrkarin mipuite zingah mi taima thawkrim peih a zawng zel a, mi taimate tan dinchhuah theihna hun ṭha a inhawng zel a ni. Hun ṭha kan neih chhung hian tih tur kan neihte chu thawhrimnain hlen zel i tum tlat ang u.

- H. Neihchungnunga, Durtlang North