NEET (UG) 2025 RESULT LEH MIZO ṬHALAITE DINHMUN

India ram chhunga sawrkar, private leh kohhran enkawla MBBS, BDS, BAMS, BUMS, BHMS, BSMS, BASLP, BVSc&AH zir turte thlanna (common entrance) hi National Eligibility Entrance Test (NEET-UG) tih a ni. NEET-UG pass lo tan a chunga course chi hrang hrang kan rawn tarlante hi zir theih a ni lo.

Kum 2024-a Mizoramin a chunga zirna kan han sawite kan neih zat chu hetiang hi a ni: MBBS-ah seat 79 (RIMS Imphal – seat 7, Agartala Medical College – seat 2 leh Zoram Medical College – seat 70). BDS-ah seat 12, BAMS-ah seat 2, BHMS-ah seats 3 leh GASLP-ah seat 1 a ni. Mizoram bikah chuan BVSc&AH hi NEET (UG) kaltlanga allotment pek a ni ngai lo (SMATEE aṭanga pek a ni ṭhin) a; kumin aṭang chuan NEET (UG) kaltlanga allotment siam tawh tur a ni.

NEET(UG) hi kum 2012 aṭanga buatsaih ṭan tura tih a nih laiin, state tam takin an sawisel avangin kum 2016 aṭangin ṭan a ni. A tirah chuan Central Board of Secondary Education (CBSE)-in a buatsaih a, kum 2019 aṭangin National Testing Agency (NTA)-in a conduct ta a. NEET-UG hi kum khatah vawi khat exam ṭhin niin, paper leh pen hmangin, offline-a exam a ni a, exam pattern tihdanglam a ni fo.

Kum 2025 aṭangin NEET(UG) exam-ah a vaiin multiple choice question 180 a awm a, heng question 180-te hi compulsory vek a ni. Hetah hian Physics leh Chemistry question 45 ve ve a ni a, Biology (Botany leh Zoology) question 90 a ni thung. Question pakhat chhan dikah mark 4 pek tur a ni a, pakhat chhan dik lohah mark 1 paih tur a ni thung. Full mark chu 720 a ni a; exam hun chhung minute 180 (darkar 3) a ni.

Mizoramah chuan a hma chuan Aizawlah chauh exam centre a awm ṭhin a, kum 2022 aṭangin Mamit hi exam centre turah an telh. Mamit a telna chhan chu Aspirational District a nih vang a ni. Mahse, Mamit hi kum 2025-ah an rawn paih a, Mizoramah chuan Aizawlah chauh NEET (UG) exam center a awm ta a ni. Aizawlah hian zirlai exam tam dan azirin institution hrang hrang – college leh HSS-ahte exam a ni ṭhin.

NEET(UG) 2024 result kha 4th June 2024-ah tihchhuah a ni a, India ram pumah full mark (720) hmu pha/thei mi 67 lai an awm. India ram puma ti ṭha ber chu Ved Sunilkumar Shende, Maharashtra-a mi a ni a (NTA-in criteria a siam hmangin full mark hmu zinga sang ber a ni). Mizoramah chuan Jonathan C. Lalhruaitluanga, St. Joseph HSS aṭanga Class 12 pass chu a sang ber. Kum 2024 thleng kha chuan Mizo zirlai zingah NEET (UG) exam awm tawhah chuan mark hmu sang ber nia hriat a ni a, mark 552 hmuin, 94.02125 percentile a hmu a, India ramah 1,38,862-na a ni.

NEET (UG) 2024 exam kha a tir aṭangin sawiselna a tam nghal hle. Zawhna pûtru a awm thu ring taka sawi a ni. NEET (UG) 2024 exam-ah thil fel tawk lo (irregularities) a awm ngei nia an hriat avangin Central Bureau Investigation (CBI) chuan FIR an thehlut a. A theih dan danin state hrang hranga complaint awmte pawh an chhui nghal a. Central sawrkar chuan Subodh Kumar, Director General, National Testing Agency (NTA) chu a hna aṭangin an chawlhtir. Ministry of Education chuan NEET–UG exam system siam ṭhatu tur High Level Expert Committee a din nghal bawk. Rajasthan-ah chuan question paper chhanna awm sa nei sem a ni, chu chu rang taka lak let leh a ni. Chu bakah, Hindi medium-a chhang turte English paper pek an ni. Zirlaite’n hun tam tak an hloh phah a ni, an ti. Hemi centre-a exam mi 1,563-te chu grace mark pek a ni zet a, sawiselna nasa tak a awm avangin a hnuah chhuhsak leh an ni. 23rd June 2024-ah retest neihtir an ni. A bak chu exam ṭhat awm loin, 4th June 2024-ah result a chhuak a, chu chu an pawm ta a ni.

NEET (UG) 2025 exam chu 4th May 2025 (Sunday)-ah neih a ni a; India ram pumah hian NEET (UG) exam center 5,468 a awm a, India ram khawpui hrang hrang 552-ah exam buatsaih a ni. NEET (UG) 2025 hi mi 22,09,318-in an exam a, pass mark (cut off) hmu zat mi 12,36,531 (55.97%) an ni. Mizoram bikah chuan mi 2,417-in an exam a, chuta ṭangin mi 1,243 (51.42%)-in pass mark (cut off) an hmu.

NEET (UG) 2025 result 13th June 2025 (Saturday)-ah a chhuak a. NEET (UG) 2025 exam hi a felfai thawkhat viauin a lang, sawiselna liam tham lutuk awm loin an zo thei niin a lang. India ram pumah Mahesh Kumar, Rajasthan-a mi chu pakhatna niin, mark 686 (out of 720) a hmu a, 99.9999547 percentile a ni. Mark 650 aia tam hmu hi mi 73 lai an awm a; perfect score an tih, full mark (720) hmu thei an awm lo.

Mizoram bikah chuan Cynthia Lalhlupuii Shangpliang d/o Dr Zonunthari, St. Paul HSS-a Class 12 zir chhuak hlim chu pakhatna a ni a; mark 474 hmuin, a percentile chu 96.0882934 a ni a, India ram pumah 85,125-na a ni pha. Cynthia Lalhlupuii Shangpliang hian NEET(UG) 2024-a Mizoram aṭanga pakhatna Jonathan C. Lalhruaitluanga aiin mark hmu tlem zawk mah se, a percentile hmuh zat leh all India ranking a neih hi a sang fe zawk a ni. Cynthia Lalhlupuii hi NEET (UG) exam neih tawhah chuan Mizo zirlai zingah percentile sang ber leh all India ranking sang ber a nia hriat a ni.

JEE (Main) leh NEET (UG) te mark pek danah hian an percentile hi sawi lar zawk a ni. Lehkhathiam tak takte zingah pawh percentile leh percentage hi thil thuhmuna ngai kan la awm tlat a; a danglamna hi kan hriat a pawimawh hle awm e. A chian zawk nan English-in han dah hmasa ta ila: ‘A percentage indicates a proportion out of 100, while a percentile indicates the position of a score relative to other scores in a data set.”

Percentage chu mark za-ah mark kan hmuh zat kha a ni mai a, kan hman thiam leh hman ṭhan zawk a ni a, sawifiah ngai loin kan hre thei ang.

Percentile erawh chu mi pakhat dinhmun exam ve tho mi dangte nen khaikhinna a ni. Entir nan, mi pakhat chuan NEET (UG) exam-ah 90th percentile a hmu a. Chumi awmzia chu exam zawng zawng aṭanga 90% kha amah aiin an tichhia (mark an hmu tlem), 10% erawh chu amah aiin an ti ṭha, mark pawh an hmu sang zawk tihna a ni.

India rama state lian zawkte khu chu han tluk phak chi an ni lo. Mahse, North East state – Meghalaya, Manipur, Nagaland, Tripura, etc-a mite nen khaikhinin Mizo naupangte NEET(UG) exam-a kan mark hmuh hi a la hniam hle a, ṭan kan ngai tak zet a ni.

NEET (UG) 2025 result-a NE state hrang hrang topper-te’n all India ranking-a an dinhmun hi han tarlang ila:

Assam 500-na

Tripura 1,621-na

Arunachal Pradesh 2,686-na

Manipur 3,706-na

Meghalaya 12,899-na

Sikkim 20,438-na

Nagaland 38,878-na

Mizoram 85,125-na

NEET (UG) exam ṭan tirh aṭanga kan mark hmuh dan hi NE state-a kan tribal-puite nen han khaikhin chuan kan la hniam hle, a lungawithlak vak loh a ni. NEET (UG) exam ṭhinte hi MBSE hnuaia Class 10 leh Class 12 board exam-a a ti ṭha ṭhate an ni tlangpui lehnghal. Kan result ngun taka han chîk chet chet hian UPSC exam-a Mizo ṭhalaite kan tling thei ta meuh lo hi thil mak vak niin a lang lo. NEET–UG exam aṭang hian zirnaah kan level hi a lang chiang viauin a hriat. Zirna pêng hrang hrangah Mizote ṭan lak kan ngai tak zet a ni.

- Dr Zirlianngura, Ramhlun North Basic Mual