A thlawna thisen pek ṭulna leh pawimawina

William Harvey-a’n kum 1616-a mihring taksaa thisen kal kual dan (blood circulation) a hmuh chhuah aṭanga thisen inpek chhawn dan (blood transfusion) kawng chu thui hle mah se, kan mamawh ngai reng chu thisen petu (blood donor) an ni. Kum 1930-ah Austrian physicist Dr. Karl Lansteiner chuan mihring taksaa thisen group chi hrang hrang awm hi a hmu chhuak leh a ni. Khawvelah thiamna a sang tawh hle a, damdawi thiamna (medical science) lamah pawh hma kan sawn mek lain, mihring thisen mamawhna chu a la pangngai reng. Thisen dah khawlna hmun (blood bank/centre) changkang leh ṭha leh doctor thiam tak pawh awm mah se la, tun thengin thisen mamawhtu tana thisen aia ṭha an la hmu chhuak lo va, a thlakna a la awm lo.

Blood bank hmasa ber chu Spanish Civil War laiin December 10, 1936 khan Dr. Norman Bethune-a’n Madrid-ah a din a. Hemi hma hian thisen inpek chhawn dan chu thiam tawh mah se blood bank a la awm lo. Tunah chuan blood bank/centre awmzia sawifiah ngai a ni tawh lo va, a tel lo chuan khawi damdawi in mah hi a famkim lo a ni.

1. THISEN PEK DAN LEH THISEN

PE THEITE

1.1. Professional/Commercial Blood Donation: Khawvel ram hrang hranga blood bank-te hi a tir lam hun eng emaw ti chhung chu hralh suma thisen petute kutah an innghat lian hle a. India rama blood bank zawng zawng pawh a tir lam chuan thisen hralh ṭhinte hnenah an innghat ṭhin. Kum 1996 aṭangin Supreme Court chuan thisen lei leh hralh a khap ta a ni.

1.2. Replacement Donation: Chhungte emaw, ṭhiante emaw an dam lohva thisen pek an ngaihin blood bank-a thisen awm sa hmang a, a rulh leh nana thisen pek leh hi ‘replacement donation’ a ni. Tu emaw tan bika pek hrim hrim hi replacement donation-ah chhiar a ni bawk.

1.3. Voluntary Donation: Hei hi a thlawna thisen pek tiin kan sawi ṭhin. Tu emaw tan ti bik lova a mamawh apiangte hman tura thisen pek hi a ni. Mahni inpekna liau liau aṭanga chet chhuahna a ni a, mahni tana hlâwkna emaw, hamṭhatna emaw a tel lo. Mi dang zah leh hlauh vanga pek a ni lo va, a spirit hi a thianghlim em em. Mizo hnam zia nena inhmeh tak a ni a, tunlaiah phei chuan a thlawna thisen pek hi Mizo tlawmngaihna lan chhuah tirna pawimawh tak a ni ta.

1.4. Thisen pe theite: India ramah chuan kum 18-65 inkar, hrisel ṭha pangngai, kg. 45 bûk tling chinin an pe thei. Thisen hi thla thum dan zelah a pek theih a, kum khatah vawi 4 a pek theih a ni. Doctor-te’n thisen pe turte chu an hriselna an enfiah hmasa ṭhin a, zawhna chhan tur tam tak a awm a, zawhnate chu dik taka chhan tur a ni. Kum 18 tlin aṭangin thla thum dan zela thisen kan pek chuan, kum 65 kan tlinin thisen vawi 188 kan pe thei a; India ramah vawi 100 aia tam pe an awm ṭeuh a ni.

1.5. Thisen pek a hlauhawm lo: Ṭum khata thisen lak chhuah hi a tlangpuiin ml. 350 a ni. Hrisel ṭha pangngai taksa rih zawng kg. khat zelah mipain thisen ml. 76 a nei a, hmeichhiain ml. 66 a nei. Chutih lain, kan taksa mamawh zat chu kg. khat zelah ml. 50 a ni. Kan rih zawng azirin thisen chuang liam kan neih zat a inang lo. Thisen cell hi taksaah ni 120 bak a dam lo va, a thar a insiam zel. Chuvangin, thla thum dana thisen ml. 350 pek chhuah hi taksa tan chhiatna khawp a tling lo va, hrisel ṭha pangngai tan a hlauhawm lo. Pathianin thisen chuang liam kawl turin min siam vek a, kan thisen hmanga mi dangte nunna turin mi min siam vek a ni.2. A THLAWNA THISEN PEK

A ṬUL CHHAN

Thisen pek ṭulna chu sawi tam ngai lovin kan hria a, nunna chhanna a ni. Tu emaw tan bik ti lova thisen pek (voluntary donation) ṭulna hi mi tam zawkin kan ngaihtuah ngai lem lo. Mi thiamte’n a ṭulzia an hmu chhuak zel a, khawvel pum huapin hmalak chhoh mek a ni.

2.1. Thisen thianghlim mamawh a ni: Damlovin thisen thianghlim a dawn theihna turin mamawh hun taka pek theih tura blood bank-ah thisen dah khawl lâwk a ngai. Drugs & Cosmetics Acts, 1940 dan angin thisen hi damdawi a ni a, a thianghlim ngei a ni tih finfiah hnuah chauh damlo hnenah pek tur a ni. Thisen thianghlim leh thianghlim loh endik (test) chhung hi a rei lo berah pawh darkar 3 a ngai a. Chuvangin, blood bank-ah thisen thianghlim a awm reng theih nan a thlawna pek a ṭul a ni.

2.2. Thisen thlakna a awm loh vangin: Mihring tan thisen siam chawp a hman tlak lo va, ran thisen a hman tlak hek lo; a mihringpui thisen ngei pek a ngai. Damdawi lam thiamna sang tak awm hnuah pawh thisen aia hman tur thil dang, a thlâkna tur an la hmu chhuak lo. Chuvangin, thisen mamawhna hi a la pangngai reng a, a thlawn pek a ṭul em em reng a ni.

2.3. Petu nei ve lo tan: Damlo ṭhenkhat chuan thisen petu tur chhungte emaw, ṭhiante emaw an neih lain, petu nei ve lo tam tak an awm ṭhin. Hmun hla tak aṭanga damdawi ina awm damlo, thisen pek ngai hi engtik lai pawhin an awm reng. A mamawh apiangte hman tura a thlawna thisen pek hi a ṭul tak zet a ni.

2.4. Thisen mamawhna a pung zel: Natna chi hrang hrang a awm zel a, damdawi inah thisen pek ngai damlo an pung zel. Damdawi lama kan thiamna a san zel avangin Mizoramah pawh thisen mamawh a sang chho zel a, tun hma lama vai ram damdawi in lian kan panna ang kha Mizoramah pawh tih theih a tam ta hle a; damlo zai ngai (operate) an tam chuan thisen mamawh a pung ṭhin.

2.5. Rîkrum thilah a ṭangkai: Chhiatna lo thleng thutah thisen mamawh a ni ṭhin a, hetiang hunah hian blood bank-ah thisen dah khawl sa neih a ngai ṭhin. Lirthei chesual vanga hliampui tuar an awm châng te, nau neih vanga thi pûtte leh rîkrum thilah hman mai theih tura thisen thianghlim blood bank-a dah khawl sa a awm a ṭul tak zet.

3. A THAWNA THISEN PEK HLUTNA

Thisen pek ṭulna leh pawimawhna hrang hrang kan hre ta a; chutiang taka pawimawh chuan hlutna tam tak a nei. Thil pawimawh tak chu a hlu ṭhin ang hian voluntary blood donation pawh hi a hlu bik a ni.

3.1. A thianghlim bik: A thlawna thisen petu (voluntary donor)-te chu tihluihna emaw, loh theih loh thil emaw vanga pe an ni lo va, an thisen a thianghlim bik. Regular donor-te phei chuan hriselna an ngai pawimawh a, a thlawna thisen petute hi mi hrisel ṭha pangngai tak an ni zel. An hriselna a lo pan deuh a nih chuan an pe lo mai a, zêp rûk an nei ngai lo. Khawvel hmun tinah a thlawna thisen petute thisen hi a thianghlim bik tih hmuh chhuah zel a ni.

3.2. Hlâwkna ûm a ni lo: A thlawna thisen pek hi mi dangte ṭanpui duhna rilru, mi tlawmngaite thil tih a ni a, kan chhuan em em Zo nun ze mawi tlawmgaihna nena kal dun tlat a nih avangin a ropui bik. A thlawna thisen petute hi mahni tana hlâwkna ûma thisen pe an ni lo va, an thisen chang a thianghlim a ni lo va, an rilru pawh a thianghlim a ni. Chuvangin, a thlawna thisen petute hi an hluin an ngaihsanawm tak zet.

3.3. Khua leh tui ṭha nihna: Thisen kan pek hian sawrkar emaw, doctor leh nurse-te emaw kan ṭanpui a ni ngawt lo va; kan ṭhenawm khawveng te, kan khua leh tuite kan ṭanpui a ni. Chuvangin, thisen petute chu khua leh tui ṭhaan ni. Khawtlang tana mi hnawksak ai chuan mi ṭangkai khua leh tui ṭha chu an hlu em em. Chutiang mi, khawtlang tana mi hlute chu an lo pun zel theih nan kan chawimawi thiam pawh a pawimawh a ni.

4. RAM DANGTE TIH DAN

Khawvel ram changkang apiang hian thisen pek an uar emaw tih tur a ni. Tunah hian khawvel ram 193 vel zinga ram 62 chu an thisen pek zawng zawng a thlawna pek (100% voluntary donation) a ni. Ram changkangte’n thisen pek an uar dan hi mipui (population) tam dan aṭanga thisen pek zat chhûtna (population based blood donation) aṭangin kan hre thei a; mihring 1,000 zelah thisen pe ṭhin an chhûtna aṭanga a ti ṭha zual ramte chu:

Switzerland - 113

Japan - 70

Australia - 58

New Zealand - 56

Canada - 55

United Kingdom - 40

Singapore - 24

Korea - 22

Spain - 21

Ram changkangah chuan campaign/awareness programme neih pawh a ṭul tawh meuh lo. Kum tling an nih a, an hriselna a ṭhat bawk chuan thisen pe turin blood bank-ah an kal a, an pek hunbi pagngaiah an pe mai ṭhin. Mi thiamte chhût danin ram mipui 1,000 zelah mi 8-in regular taka thisen an pek chuan chu ramah chuan thisen pek zawng zawng chu a thlawn pek (100% voluntary donation)-a ngaih a ni a. India ramah hian mi 1,000 zelah thisen pe ṭhin chu mi 4 vel anga chhût a ni a, tunah chuan 100% chu kan la hlat deuh hlek.

5. MIZORAM DINHMUN TLANGPUI

A thlawna thisen pek kawngah Mizoram hian hma kan sawn viau a; thisen mamawhtu a pun ang bawkin thisen petu pawh kan pung ve zel. Tun hma chuan India ramah a thlawna thisen pekah kan lang ngai lo. National AIDS Control Organisation (NACO)-in a tarlan danin, kum 2007 aṭang khan India ram state/UT zingah Mizoram chu a thlawn thisen pek ti ṭha zual state 10 zingah kan tel ve phak ta hial a, North East-ah phei chuan a ti ṭha ber pawl kan ni reng. A thlawna thisen petute avangin blood donation-ah hian India ramah a sang pawl kan ni ve ta reng mai hi thil ropui tak a ni.

A thlawna thisen peka kan hmasawn dan:

A thlawna thisen pek kawngah hma kan sawn theih nan kum 1991 khan Association for Voluntary Blood Donation (AVBD) din a ni a. AVBD hruaitute chuan tlawmngaia thisen petu tur an zawng nghal a. A din kum hian YMA Day pualin Aizawl veng hrang hrang aṭangin mi parukin Civil Hospital, Aizawlah thisen an pe a, hei hi a thlawna thisen peka Mizoram record hmasa ber a ni. Kum 2000 hma lam kha chuan thisen pe tura inpun chûk chûk a tam hle a, zanlai pawh sawi lovin vantlang aurinna hmangin kan inpun khawm fo a nih kha. Khang hun laia thisen pek kha a petu thinlungah chuan tlawmngaihna vek a ni. Mahse, thisen thianghlim a ni ngei tih finfiah hmasa lova inpek chûk chûk kha thil awm thei a nih avangin thisen dawngtu tan a him tâwk lo thei. Tunah erawh chuan ni tin deuh thawin tlawmngai pawl, zirlaite leh kohhran ṭhalaite thisen pek thawm chu kan chanchin thar ngaihnawm ber ber zinga mi a lo ni ta a; a lawmawm tak zet a ni.

6. THINGTLANG LAM MITE TAN AN ṬANGKAI

Mizorama district khawpui tinah blood bank a awm a, kohhran damdawi in tiamin ram pumah blood bank 11 lai kan nei tawh a. Blood bank awm lohna khuaah thisen mamawh an awmin a buaithlak ṭhin hle. Thisen lam turin blood bank pan pawh ni se, blood bank-ah thisen dah khawl sa a awm loh chuan thisen petu tur inzawn chawp a ngai ṭhin. Damlo dinhmun azirin a hmanhmawhthlak phei chuan a manganthlak hle ṭhin a ni. Chuvangin, kan awmna/khua aṭanga blood bank hnai ber hi thingtlang mite’n kan ngaih pawimawh a, thisen dah khawl sa tam tak a awm theih nan kan ṭanpui a ṭul. Kan khaw mi leh sa, khawpui damdawi in pantu damlote’n an mamawh huna thisen pek tur a awm loh chuan a manganthlak em em a, chhungte leh hmelhriat awm lohna hmunah phei chuan thisen petu zawn a buaithlak hle. Blood bank-ah thisen dah khawl sa eng lai pawhin awm reng ta se, thisen mamawh hun apianga hman mai theih tur a awm reng tihna a ni a, tu tan pawh a thlamuanthlak hle dawn a ni. Thingtlang mite kan ṭangkai ve theih dan kawng hetiang hian han sawi ila.

6.1. Mawhphurhna: Thil ṭha tih kawnga hmasawn tur chuan mi dangte tih atana dah bik lovin, mawhphurhtu nia inngaihna rilru neih a pawimawh. Thisen pek hi khua leh tuite tih tur a ni a, kum puitling leh mi hrisel apiangte mawhphurhna a ni. Khawpui mite tih atan chauhva dah lovin thingtlang mite pawhin mawhphurhna lian tak kan nei a, kan ṭangkai ve thei tih vawn tlat tur a ni. Chutiang rilru kan neih hmasak phawt chuan kan remchan ang zelin thisen pek kawngah kan thawk chhuak thei ang.

6.2. Thisen pek rûnpui huaihawt leh mimala pek: YMA hming te, kohhran ṭhalai pawl hming te, zirlai pawl hming te, khaw din champha denchhhente leh ni pawimawh bik pualin thisen pek rûnpui huaihawt a ni ṭhin a. Blood donation camp huaihawt dawnin kan khua aṭanga blood bank hnai bera thuneitute biakràwn hmasak a ṭha. Khaw kar kawng hlat avangin kan khuaah blood donation camp kan huaihawt thei lo a nih pawhin, hun remchangah ṭhian zaho emaw, mimalin emaw kan pe thei. Thisen pek rûnpui hi hlimawm deuhvin a huaihawt theih a, a bik takin ṭhalaite intihlimna chi khat atan a remchang em em a; khawtlang mipui hriat thamin huaihawt ni se a ṭangkai lehzual ang. Blood donation camp huaihawt kher lo pawhin kan zin remchan apiangin blood bank-ah thisen kan pe thei bawk.

6.3. Mi dangte fuihna: Thisen pe thei lote pawh hi mi dangte fuihtu ṭangkai tak an ni thei a, kan thlan tui leh rilru tal kan pek ve a ngai. Hemi kawngah hian medical degree neih kher a ngai lo a, doctor ni lo pawhin mite fuihtu (motivator) ṭha tak kan ni thei. Thil ṭha tih inhriatpuina (recognition) hi infuihna ṭha tak a ni a, thisen petute chawimawi thiam hi thisen petu an pun zel theih nan a ṭangkai hle. Kan khawtlanga chawimawi tlakte kan chawimawi thiam a pawimawh a ni.

7. TLANGKAWMNA

A thlawna thisen pek ṭulna leh pawimawhna tlangpui kan hre ta a. Vawiinah hian eng nge kan tih ve theih ang, tiin hengte hi ngaihtuah zui ni se:

7.1. Kumin chhungin kan awmna pawl hming emaw, ṭhianzaho emawin a thlawna thisen pek rûnpui vawi khat tal huaihawt.

7.2. Pawl hmingin emaw, thianzahoin emawa kan chhe chhuak thei lo a nih pawhin kei/mimal hian thla tum dana pek emaw kum khatah vawi hnih tal pek.

7.3. Kan khawtlangah leh in chhungkhurah thisen pek ṭulna leh pawimawhna sawi fo.

Ka lawm e.

––––––––––––––––––––––––––––––––––––

Lehkhabu rawnte:

1. National Guide book on Blood Donor Recruitment- MoH&FW/NACO

2. Thisen-Thilthlawn pek hlu ber – MSACS

3. Annual Number 2009- AVBD West Bengal

4. National Workshop on Blood Donor Recruitment 2005 – AVBD, West Bengal

5. Annual VBD Statistics- MSACS

- C. Lalnunnema
President, AVBD, Mizoram